الماتى الىپ شاھار عوي. ءبىراق استانا ستاتۋسىنان ايىرىلىپ قالعانىنا كەشە ءبىرىنشى رەت قۋاندىم. قازاقستاننىڭ استاناسىن سەل باسىپ جاتىر دەگەن اقپارات ايداي الەمگە تاراسا، ۇيات بولار ەدى عوي. ال الماتى استانا بولماعاندىقتان، اقىرىنداپ، شۇرقىراعان جۇرتقا باسۋ ايتا وتىرىپ، سىرتقا سىر بىلدىرمەي، بۇل كۇندى دە وتكەرۋگە بولادى. الماتى وبلىسىنىڭ جامبىل اۋدانىنا قاراستى دەگەرەس دەگەن اۋىل بار. ول اۋىلدا جىل سايىن تاسقىن بولادى. ءبىراق ول الماتىدان ءجۇز شاقىرىمداي قاشىقتىقتا ورنالاسقاندىقتان ول مەكەننىڭ سەلىنىڭ «داۋىسى» الماتىعا جەتپەيدى. الماتىعا جەتپەگەن سوڭ، استانا دا ءبىر اۋىلدى جىل سايىن لايلى تاسقىن شايىپ وتىراتىنىن بىلمەيدى دە. جىل سايىن اعاتىن سەلگە تۇرعىندار دا ۇيرەنىپ العان. قۇزىرلى ورىندارعا شاعىمدانىپ، اكىمىنە وكپەلەپ جاتپايدى. تاسقىندى سەلگە مالدىڭ تولدەرى اعىپ كەتەدى. قىرعا ەككەن كارتوپتارىن تاسقىننان سوڭ، شەلەكپەن سايدان تەرىپ جۇرەدى. ولار شىنىمەن دە ەڭبەگىنىڭ ەش كەتىپ، كارتوپتارىنىڭ سايعا اعىپ كەتكەنىن، ءتولىنىڭ سەلگە تۇنشىعىپ ولگەنىن تابيعي اپات دەپ ەسەپتەيدى. قۇدايعا جالبارىنىپ، جاۋىن كوبەيىپ كەتسە تاساتتىق تا بەرىپ قويادى. اۋىلدىڭ ىشىندەگى توعانداردى تازارتىپ، ارتىق سۋدىڭ اۋىلدىق تۇرعىنداردى ابىگەرگە سالماۋىنا قاتىستى جۇمىستار اكىمشىلىك تاراپىنان جۇرگىزىلۋى ءتيىس قوي دەگەن ۋاجىڭە ولار قۇلاق تا اسپايدى. قۇلاق اسقاندارى بولا قالسا، ءومىر سۇرگەنىمىز اكىمگە مىندەت پە، ول جالعىز ءوزى اسپاننان كەلگەن الاپاتقا ءقايتىپ توتەپ بەرە الادى دەگەن ءۋاج ايتادى. دەگەرەستىڭ سۋى تاسىسا- ونىڭ تومەنگى جاعىندا ورنالاسقان تارعاپ اۋىلىنىڭ سۋ بوگەنى دە ارناسىنان اسىپ تۇسەدى دەگەن ءسوز. بيىلعى تاسقىننىڭ سۋى تارعاپقا جەتكەن جوق. ءبىراق وسىدان ءۇش اپتا بۇرىن دەگەرەستە جىلداعى زاڭدىلىق بويىنشا تاسقىن ءجۇردى. مالدىڭ ءتولى تۇگىلى، سول سەلدى جىل سايىن كورىپ جۇرگەن ۇلكەن سيىردىڭ ءوزى «ساسقالاقتادى». وزەننىڭ كوپىرلەرى اعىپ كەتتى. ءۇش اپتادان بەرى تۇرعىندار وزەننىڭ ارعى جاعى مەن بەرگى جاعىنا بالاعىن ءتۇرىپ تاستاپ، اياق كيىمىن قولىنا ۇستاپ، سۋدى كەشىپ وتەدى. كۇن قاتتى ىسىعاندا الگى وزەن يرەلەڭدەگەن جىلان سەكىلدى جىڭىشكەرىپ، ءوزى جۇپ-جۋاس بولا قالادى. الگىنى مىناۋ ءبىزدىڭ اۋىلدىڭ وزەنى دەپ ايتۋعا ۇيالاسىڭ. سەبەبى وزەن سۋى اۋىلدىقتاردىڭ ارىعىمەن جان-جاققا تارامدالىپ بولىنەدى ەمەس پە؟ ال جاۋىن جاۋعان كۇنى وزەن ەشكىمگە كەرەك ەمەس. سوندىقتان ول ارناسىنان اسىپ، كەمەرىنە ءمىنىپ مىنەز تانىتا باستايدى. ءسىز وسىدان ءۇش اپتا بۇرىنعى دەگەستىڭ سەلى تۋرالى ەستىدىڭىز بە؟ جوق. سەبەبى اۋىلدىقتاردىڭ اشۋىن جىلى سوزبەن باسۋعا بولادى. ولار اڭعال عوي، الداپ قويساڭ سەنەدى. تابانىڭا تيسە، ميىڭدى زىرق ەتكىزەتىن تاۋدىڭ تاستاي سۋىن تاڭعى ۋاقىتتا بالاعىن ءتۇرىپ كەشىپ ءوتىپ، مالىن جايعاپ جۇرە بەرەدى.
اينۇر تولەۋ
