نۇربەك ءسابيرا ۇلى – 1990 جىلى موڭعوليا بايان-ولگيي ايماعىنىڭ التاي سۇمىنىندا دۇنيەگە كەلگەن.
قىلىشىن قانعا باتىرعان،
ايداھارداي اقىرعان.
زامانىندا قالماققا،
ارىستان بولىپ اتىلعان،
قاھارمان باتىل قازاقپىن.
قارشىعاداي قىراعى،
اق كوبىك شاشىپ پىراعى،
زۋلاعاندا قالماققا،
ابىلاي بولعان ۇرانى،
قالماقتى جەڭگەن قازاقپىن.
قاھارمان باتىل ۇلانى،
اقيىق قۇستاي قىراعى،
زۋلاعان جەبە وعىنداي،
استىندا تۇلپار پىراعى،
قالماقتى قىرعان قازاقپىن.
قامشىسىن جاۋعا بىلەگەن،
اللادان مەدەت تىلەگەن.
زىميان جاۋدىڭ كەگىنەن،
اتا مەن ۇل جۇدەگەن،
قايعى دا كورگەن قازاقپىن.
قانجار، قىلىش اسىنعان،
ايبىنىن جاۋدان اسىرعان،
زامانىندا جاۋلارى،
اياعىنا باس ۇرعان،
قايراتتى اسىل قازاقپىن.
قارا بالا قامى ءۇشىن،
الاشتىڭ باقىت باعى ءۇشىن.
زار جىلاعان تاپتالعان،
انالاردىڭ ارى ءۇشىن،
قان توگىس كورگەن قازاقپىن.
قۇرمەتتەپ دوستىق پارىزىن،
اتانىڭ اقىل، ءار-ىزىن.
زۋلاعان جاۋدىڭ وعىنا،
انانىڭ اقتاپ قارىزىن،
قارسى تۇرعان قازاقپىن.
قاستاندىق كورىپ قىرىلعان،
اق تابان بولىپ شۇبىرعان.
زامانىندا ناۋبەتتىڭ،
القىمعا جانى تىعىلعان،
قاسىرەت تە كورگەن قازاقپىن.
قان ساسىپ جازىق دالاسى،
اڭىراپ تالاي اناسى،
زار جىلاپ جەتىم جەسىرلەر،
اۋىرساداعى جاراسى،
قايىسپاعان قازاقپىن.
قازاقپىن ءادىل داۋىنا،
ايبارلى، قاتال جاۋىنا،
زاماندا بەيبىت مامىرجاي،
اق وردا تىگىپ تاۋىنا،
قىر جايلاعان قازاقپىن.
نامىسىن قولدان بەرمەگەن،
ۇل مەنەن قىزىن تەڭ كورگەن.
رازى بولسا جاتتى دا،
باۋىرىمەنەن تەڭگەرگەن.
ەڭبەكپەن ەگىز جارالعان،
كوك ءبورى تەكتەس قازاقپىن.
باتىر اقىن بي دە تۋعان قازاقپىن،
ەگەمەندى ەل، تاۋەلسىزبىن ازاتپىن.
باسقا ۇلتتاردان تاعى ەرەكشە ءبىر سىرىم،
دۇرىس وقى، تەرىس وقى قازاق-پىن.
ارۋلار – انالار
بار الەمدى الديىمەن تەربەتكەن،
جۇرەكتەردى پاك سەزىمگە مەڭدەتكەن.
ارۋلار ول – اسىل جاندار، انالار،
ۇرپاعىم دەپ اركەز ماڭداي تەرلەتكەن.
ارۋلار ول – قىزىل گ ۇلى قىرقانىڭ،
اقىنداردىڭ بولىسەتىن جىر تاڭىن.
انالار ول – اكەلەتىن ومىرگە،
ءار حالىقتىڭ باتىرى مەن سۇلتانىن.
ارۋلار ول – سۇلۋلىقتان ءنار العان،
بۇل ءومىردىڭ قىزىعى بوپ جارالعان.
انالار ول – ارداقتىسى الەمنىڭ،
بۇكىل الەم قۇرساعىنان تارالعان.
ارۋلار ول – اسەم اۋەن شىرقالعان،
جىر بوپ جەتكەن ءبىر تاڭىڭا ءبىر تاڭنان.
انالار ول – بار باقىتتىڭ جىرشىسى،
الديىمەن بۇكىل الەم قىمتالعان.
ارۋلار ول – ءتاتتى قيال، ءبىر ارمان،
سۇلۋلىق جوق اساتۇعىن بۇلاردان.
انالار ول – ماحابباتتىڭ ۇلىسى،
ءارقاشان دا جار بولسىن تەك ءبىر اللام.
نۇربەك ءسابيرا ۇلى
