جات تا كۇل، تۇر دا كۇل: ارنايى اباي تويى ءۇشىن شىعارىلماق بۇل "سىيلىق". قازاقستان كولىك ءوندىرىسىنىڭ ءسىز بەن ءبىز قابىلداي المايتىن كوركەم يلليۋزياسى وسى.

"ابايعا" ءمىن دە شابا بەر. قازاقتىڭ ھاكىمىنىڭ ەسىمى ەندى ورىستىڭ كولىك وندىرىسىندەگى «گرانتا» دەگەن ءبىر ۇرپاعىنا ات بولۋعا دا "جارادى" ەمەس پە؟!

وسى رەتتە، قازاقستاندىق «ازيا اۆتو» زاۋىتىنىڭ "ەڭبەگىن" ايرىقشا اتاپ وتپەي بولماس. ولار اباي تويى تۋرالى توگىلىپ ماقالا جازعان توقايەۆتىڭ: «ءبىراق مۇنىڭ ءبارى توي تويلاۋ ءۇشىن ەمەس، ءوي-ورىسىمىزدى كەڭەيتىپ، رۋحاني تۇرعىدان دامۋىمىز ءۇشىن وتكىزىلمەك» دەگەن سوزىنە «ءتىرى» پاروديا جاساپ بەردى دەۋگە دە بولادى.

«پاروديا» ەمەي نەمەنە، ونىڭ جىرى دا باستالار ەندى. ماسەلەن، ءسىز، الدا-جالدا سول ارنايى شىعارىلعان كولىكتى ساتىپ الدىڭىز دەلىك. ونسىز دا ساپاردا جۇرتتىڭ سەنىمى از ارتىلاتىن «لاداڭىز» سىر بەرمەسىنە كىم كەپىل. سوندا ءسىز جاقىنىڭىزعا: «شاعىلعىر «Abai» جولدا بۇزىلدى» دەپ ءبىر ايتارسىز اۋەلى. سوڭىنداعى «175» دەگەن سيفر سورىڭ قايناعان دالادا ءادىرام قالىپ. (ارنايى شىعارىلعان سەريا «Abai 175» دەپ اتالادى – رەد.)

ءمۇبادا، «اباي» دەپ اسپەتتەگەن الگى «گرانتا» ايداۋعا كەلمەسە شە؟ وندا «ابايدىڭ» استىنان ماي اعىپ تۇر» نەمەسە «اباي» قۋىپ تۇر» دەيتىن قۋارعان تىركەستەر ءسىزدىڭ كومەيىڭىزدە تۇرۋى ءلازىم. بالكىم، اشۋىڭ تۇسسە «ابايدى» ورتەپ جىبەرەردەي بوقتارسىڭ كەلىپ-كەلىپ. مۇنى ايتقىزعان ورىستىڭ «ادەپسىز» كولىگى سىزگە تاعى ءبىر كۇنى: «اباي» ءشىرىپ كەتتى» دەپ ايتقىزبايدى دەپ كىم ايتتى؟!

باقساڭىز، ابايعا كورسەتكەن قۇرمەتىمىزدىڭ سىيىق-سىقپىتى وسى... "مايى اققان "اباي"، "قۋعان "اباي"، "شىرىگەن "اباي". سوسىن "كوپ ايدالعان "اباي"، وكىنىشكە قاراي. 

مىنە، مەملەكەت باسشىسى ءوز ماقالاسىندا ايتقانداي، ءبىزدىڭ «رۋحاني جاڭعىرۋ»، «سانالىق ءوسۋ» ەكەن بۇل.

ايتپاقشى، پرەزيدەنت سول ماقالاسىندا تاعى: «ءبىز ابايدىڭ 175 جىلدىق مەرەيتويىنا قوعامدىق سانانى جاڭعىرتاتىن، ءبىر ەل، تۇتاس ۇلت بولىپ دامۋىمىزعا سەرپىن بەرەتىن ءىس-شارا رەتىندە زور ءمان بەرىپ وتىرمىز» دەپ كورسەتكەن ەدى.

قايتالاپ ايتامىز: "زور ءمان بەرىپ" دەپ تۇر. ەندى ناتيجە دەيسىز بە؟ داپ-دايىن ول دا. ءبىزدىڭ قوعام بولىپ قاتتى "ءمان" بەرگەنىمىزدىڭ ارقاسىندا اقىن ابايدىڭ اتى اۆتوكولىك «اباي»-عا اينالدى ءسويتىپ. ول ءتىپتى سىزگە «قولجەتىمدى» دە. ءوز "ابايىڭىزدى" اقپاننان باستاپ 2 ملن 820 مىڭ تەڭگەگە ساتىپ الىڭىز دا ايداي جونەلىڭىز. مايى اققانشا ايداي جونەلىڭىز...