ساعات تۇنگى ون ەكىگە جاقىنداعاندا مەيرامحانادان ۇزاتىلعان قىزدى الىپ شىعۋعا قۇدالار ىڭعايلانا باستاعان ەدى. شوۋ قىلىپ، اندەتىپ، زاپيسكە جازىلعان جاتتاندى سوزدەرىن قايتالاپ قازاقشا كيىنگەن قىزدار ءجۇردى.
-ايالاپ، بەتىنەن قاقپاي وسىرگەن اكەسىنە قۇرمەتىمىزدى ءبىلدىرىپ، شاپالاق سوعايىق، اعايىن!-دەگەن كۇندە تويدا ايتاتىن ءسوزىن قىزدار قايتالاعان ساتتە ونىڭ كوزىنەن جاس ىتقىپ كەتتى. ءمولت-مولت...
ونىڭ اكەسى جوق ەدى.
اكەسىنىڭ ولگەنىنە عانا ەمەس، شەشەسىنىڭ جالعىزدان-جالعىز ءويتىپ-بۇيتىپ، قاتارىنان قالدىرماي باعىپ-قاققانى ەسىنە ورالدى. اناسىنىڭ كوبىنە كوڭىل كۇيى بولمايتىن. رازى ەمەس، ءجۇزى سولعىن تارتىپ تۇراتىن. نەگە ەكەنى، توي-تومالاققا بارا قالسا، قاتتى بويانىپ الاتىن... شەشەسىنىڭ ءوزىن جۇرتتان كەم سەزىنەتىنى ءدال سول مەزەتتە ونىڭ ەسىنە ءتۇستى. اناسىمەن اندا-ساندا پىكىرلەرى سايكەس كەلمەي دە قالاتىن... قاتىپ قالعان كوڭىلىن ۇرىسپەن سىرتقا شىعارىپ، اقىرى ەكەۋى كوزدەرىنىڭ جاسىن سىعىپ الاتىن ەدى. ءبىراق ءسويتىپ ءجۇرىپ-اق، شەشەسى نەسيە السا دا، دۇرىلدەتىپ تويىن جاساپ بەرىپ جاتقانى ونىڭ كوڭىلىن بوساتىپ، جاستىڭ ۇستىنەن جاس ىرشىتتى... وسى ءبىر اقپاراتتىڭ ءبارى بىرىگىپ ونىڭ جانىن قيناپ، كەۋدەسىن قىسىپ تۇرعان بولاتىن.
سول ءبىر كوڭىلسىز الەمنەن كۇيەۋ جىگىت ونى كوتەرىپ الىپ كەتىپ بارا جاتقاندا، جانارى جاساۋراپ قانا تۇرعان اناسىنىڭ بۇگىن ۇيدە جالعىز ءوزى قالاتىنىن ويلاپ، قىز كەتىپ بارا جاتتى.
الىشەر راحات
پىكىر قالدىرۋ