قازاقستاننىڭ ۇزدىك اۋىل اكىمى انىقتالدى. بۇل تۋرالى مەملەكەتتىك قىزمەت ىستەرى اگەنتتىگىنىڭ باسپا ءسوز قىزمەتى حابارلادى.
"مەملەكەتتىك قىزمەت ىستەرى اگەنتتىگىنىڭ باستاماسىمەن "رۋحاني جاڭعىرۋ" باعدارلاماسى اياسىندا "ۇزدىك اۋىل اكىمى" رەسپۋبليكالىق بايقاۋى اياقتالدى.
ۇزدىك اۋىل اكىمى بولىپ الماتى وبلىسى ىلە اۋدانى بورالداي كەنتىنىڭ اكىمى دانيار قوڭىربايەۆ تانىلدى. ول داۋىس بەرۋ كەزىندە ەڭ كوپ ۇپاي جيناپ، 1-جۇلدەلى ورىنعا يە بولدى. سونداي-اق ءوز ايماعىنىڭ الەۋمەتتىك-ەكونوميكالىق جاعدايىن جاقسارتۋ بويىنشا جوباسىن ءساتتى قورعاپ شىقتى" دەلىنگەن حابارلامادا.
2-ورىندى 2 اكىم يەلەندى. ولار: اقمولا وبلىسى سەلينوگراد اۋدانى مانشۇك اۋىلدىق وكرۋگىنىڭ اكىمى عاني يسايەۆ جانە اقتوبە وبلىسى مۇعالجار اۋدانى تالدىساي اۋىلدىق وكرۋگىنىڭ اكىمى قازبەك اققايىر.
3-ورىندى دا 2 اكىم يەلەندى: پاۆلودار وبلىسى اقتوعاي اۋدانى جالاۋلى اۋىلدىق وكرىگىنىڭ اكىمى ازامات مەدەتوۆ جانە شقو جارما اۋدانى شالاباي اۋىلدىق وكرىگىنىڭ اكىمى جانار ەسەمبايەۆا.
سونداي-اق "ۇزدىك الەۋمەتتىك-ەكونوميكالىق جوبا" نوميناسياسى جامبىل وبلىسى رىسقۇلوۆ اۋدانى اباي اۋىلدىق وكرىگىنىڭ اكىمى مۇراتبەك ارىستامبەكوۆكە، "حالىققا اشىق اكىم" نوميناسياسى قاراعاندى وبلىسى بۇقار جىراۋ اۋدانى سەنترالنىي اۋىلدىق وكرۋگىنىڭ اكىمى سامات مەيرمانوۆقا، "ۇزدىك ىسكەر-شارۋا اكىم" نوميناسياسى اتىراۋ وبلىسى يساتاي اۋدانى تۇششىقۇدىق اۋىلدىق وكرۋگىنىڭ اكىمى ءمادي وتەعالييەۆكە تابىستالدى.
"كونكۋرستىڭ ماقساتى ەلدىڭ اۋىلدىق ەلدى مەكەندەرىندەگى جەرگىلىكتى ءوزىن-وزى باسقارۋدى دامىتۋ، جەرگىلىكتى باستامالاردى، ونىڭ ىشىندە قوعامدىق ءوزىن-وزى باسقارۋ ۇيىمدارىن ىنتالاندىرۋ، جۇمىستا جوعارى ناتيجەلەرگە قول جەتكىزگەن، اۋىلدىق ەلدى مەكەندەردى دامىتۋعا ەلەۋلى ۇلەس قوساتىن ۇزدىك اۋىل اكىمدەرىن انىقتاۋ جانە كوتەرمەلەۋ" دەلىنگەن مەملەكەتتىك قىزمەت ىستەرى اگەنتتىگىنىڭ باسپا ءسوز قىزمەتىنىڭ حابارلاماسىندا.
پىكىر قالدىرۋ