الماتى وبلىسىندا پەرزەنتحانادا جاتقان ەكى ايەل جاڭا تۋعان نارەستەلەرىن ايىباستىپ العان. بۇل تۋرالى «قامشى» پورتالى NUR.KZ-كە سىلتەمە جاساي وتىرىپ حابارلايدى.

وقيعا كۋاگەرى بولعان دارىگەردىڭ ايتۋىشا، قاراقالپاقستاننان كەلگەن ايەل مەن الماتى وبلىسىنىڭ تۇرعىنى پەرزەنتحانا پالاتاسىندا جاقسى ءتىل تابىسىپ كەتكەن.  ورالمان ايەلدىڭ وسىعان دەيىن دۇنيەگە اكەلگەن 4 ۇلى بار ەكەن، بەسىنشىسى دە ۇل بولىپ تۋىلعان. ال الماتىلىق ايەلدىڭ كەرىسىنشە، 5 قىزى بولعان، التىنشىسى دا قىز بولىپ تۋىلعان. ەكى ايەل دە جاسى كەلگەندىكتەن، ەندىگى جەردە بوسانا المايتىندىقتارىن جاقسى تۇسىنگەن.كەيىن ولار ءوز نارەستەلەرىن ايىرباستاپ الۋعا كەلىسكەن.

الايدا، ولاردىڭ وتىرىكتەرى نارەستەگە قۇجات الۋ بارىسىندا اشىلىپ قالعان. نارەستەنىڭ دۇنيەگە كەلگەن ساتىندەگى مالىمەتتەردە كورسەتىلگەنمەن بالالاردىڭ جىنىسى سايكەس كەلمەگەندىكتەن، ولار قۇجات بەرۋدەن باس تارتقان.

العاشىندا كۇدىكتى رەتىندە دارىگەرلەر جاۋاپقا تارتىلعانىمەن، كەيىن «ايەلدەردىڭ ءوزارا كەلىسىمى بويىنشا بۇل قادامنىڭ جاسالعانى انىقتالعان.

ارادا 9 ايدان كەيىن سوت شەشىمىن شىعارار كەزدە وتباسىلار سوت ءتوراعاسىنان ءبارىن وسىلاي قالدىرۋدى سۇراعان. ونىڭ ۇستىنە ولار نارەستەلەرگە باۋىر باسىپ قالعان.

ءوز كەزەگىندە سوت ءتوراعاسى دا،  اتا-انالاردىڭ بۇل تالاپتارىمەن كەلىسكەن.

نۇرزات توعجان