بۇگىن - قازاقستان رەسپۋبليكاسىنىڭ تاۋەلسىزدىك كۇنى.

بۇل اتاۋلى كۇن 1991 جىلعى جەلتوقساننىڭ 16-سىندا قازاقستان رەسپۋبليكاسىنىڭ پرەزيدەنتى ن.ءا.نازاربايەۆ قول قويعان «قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى» جانە 25.06.2008 ج. جانە 22.04.2009 جىلعى زاڭدارىمەن وزگەرتۋلەر ەنگىزىلگەن 2001 جىلعى جەلتوقساننىڭ 13-دە «قازاقستان رەسپۋبليكاسىنداعى مەرەكەلەر تۋرالى» قازاقستان رەسپۋبليكاسى زاڭدارىنا سايكەس اتاپ وتىلەدى. رەسپۋبليكا ءوز بەتىنشە ىشكى-سىرتقى ساياساتتى جۇرگىزەتىن، ءوز اۋماعىندا بيلىكتى تولىق يەلەنگەن تاۋەلسىز دەموكراتيالىق جانە قۇقىقتىق مەملەكەت مارتەبەسىنە يە بولدى. دەموكراتيالانۋ جولىنداعى باعىت قازاقستاندى ەگەمەن، تاۋەلسىز مەملەكەت رەتىندە، قازاق حالقى ۇلتتىق ءتىلىن، مادەنيەتىن، ءداستۇرىن ساقتاپ، ءوز باستامالارى مەن ەرەكشەلىكتەرىن جاڭعىرتا الاتىندىعىن جاريا ەتۋگە مۇمكىندىك بەردى.

مىنەكي، ەل بولىپ، تەرەزەمىز باسقا جۇرتپەن تەڭ بولىپ، حالىقارالىق دەڭگەيدە تولىققاندى مويىندالعان مەملەكەت رەتىندە ءومىر ءسۇرىپ جاتقانىمىزعا دا 22 جىلدىڭ ءجۇزى بولىپ وتىر. تاريح ءۇشىن سونشالىقتى زور كەزەڭ بولماعانىمەن، وسى جىلدار ىشىندە عاسىرلارعا بەرگىسىز قىرۋار ىستەر اتقارىلدى. ەكونوميكالىق-الەۋمەتتىك، ساياسي، قاۋىپسىزدىك ماسەلەلەرىندە، ونىڭ ىشىندە جاھاندىق. وڭىرلىك پروبلەمالارعا قاتىستى ءوز الدىنا دەربەس شەشىم قابىلداي الاتىن، ءوز ۇستانىمىن پاش ەتە الاتىن ەگەمەن مەملەكەت بولا الاتىنىمىزدى بارلىق قىرىنان ايقىنداپ، مويىنداتتىق.

«جىلعا بەرگىسىز كۇندەر، عاسىرعا بەرگىسىز جىلدار بولادى. ءبىز ءۇشىن وتكەن 22 جىل ءدال وسىنداي كەزەڭ. ءبىز ۇيرەنەتىن ۇلتتان، ۇيرەتەتىن ۇلتقا، جىعۋعا ەمەس، جىعىلماۋعا ۇمتىلاتىن ەلگە اينالدىق. بۇگىنگى ىسىمىزگە قاراپ ەرتەڭگى ۇرپاق بىزگە باعا بەرەتىن بولادى. تاۋەلسىزدىك - جاسامپاز حالقىمىزعا سارقىلماس قۋات بەرەتىن، كوزىنە نۇر، كوڭىلىنە شۋاق قۇياتىن كاۋسار بۇلاعىمىز. ءبىز كەمەڭگەرلىگى مەن كورەگەندىگى، بىرلىگى مەن بىرەگەي ماقساتكەرلىگى قاتار ورىلگەن ماڭگىلىك ەلىمىزدى ماقتان تۇتامىز. تاۋەلسىزدىكتىڭ تۋىن تىگۋ باقىتى مەن ونى باياندى ەتىپ، نىعايتۋ مىندەتى ءبىزدىڭ ماڭدايىمىزعا جازىلدى. ءبىز ماڭگىلىك ەلدىڭ ىرگەتاسىن قالادىق. ماڭگىلىك ەلدىڭ جۇرەگىنە اينالعان ماڭگىلىك استانامىزدى تۇرعىزدىق. ماڭگىلىك مىزعىماس ەكونوميكا قالىپتاستىرىپ، ماڭگىلىك وشپەس جىلناما جازدىق. ماڭگىلىك بولاشاققا جول سالدىق. وسىنىڭ بارلىعى تاۋەلسىزدىگىمىزدىڭ تارتۋى، ازاتتىعىمىزدىڭ اسىل قازىناسى. تاۋەلسىزدىگىمىز تۇعىرلى، ەلدىگىمىز عۇمىرلى بولسىن! ماڭگىلىك ەلىمىزدىڭ كەلبەتى ءساندى، ەڭبەگى ءماندى بولسىن! كۇللى حالقىمىزعا بەرەكەلى بىرلىك پەن باياندى تىرلىك تىلەيمىن!»،-دەدى ەلباسى نۇرسۇلتان نازاربايەۆ تاۋەلسىزدىك كۇنىنە ارنالعان سالتاناتتى جيىندا.

inform.kz