الماتى. قامشى پورتالى - وقۋشىلارىنىڭ قاتارى ەڭ كوپ ءوڭىردىڭ ءبىرى وڭتۇستىك قازاقستان وبلىسى. وندا  بيىل 70 448 بالا مەكتەپ تابالدىرىعىن العاش رەت اتتاپ، كۇمىس قوڭىراۋدىڭ داۋىسىن ەسىتتى. 

بيىل جىل سوڭىنا دەيىن وڭتۇستىك قازاقستان وبلىسىندا 67 ءبىلىم بەرۋ نىسانى عيماراتىنىڭ قۇرىلىسى اياقتالادى. وبلىس اكىمدىگىنىڭ باسپا ءسوز قىزمەتىنىڭ حابارلاۋىنشا،بيىل 104 ءبىلىم بەرۋ نىسانىنىڭ قۇرىلىسى جۇرگىزىلدى، سونىڭ 37ء-سى پايدالانۋعا بەرىلگەن.  

«بۇل مەكتەپتەردىڭ قۇرىلىسى وبلىستىق جانە رەسپۋبليكالىق بيۋدجەتتەر ەسەبىنەن ءجۇرىپ جاتىر. پايدالانۋعا بەرىلگەن مەكتەپتەردىڭ اراسىندا 19 نىسان كەزىندە اپاتتى بولىپ تانىلعان»، - دەپ حابارلادى وبلىستىق اكىمدىكتىڭ باسپا ءسوز قىزمەتىنەن.

اپاتتى عيمارات ساناتىنا جاتقىزىلعان تاعى 10 مەكتەپتىڭ قۇرىلىسى دا بيىل اياقتالادى. قالعان 27 ءبىلىم وشاعىنىڭ ماسەلەسىن 2017 جىلعا دەيىن شەشۋ جوسپارلانعان. بيىل 100 مەكتەپتە كۇردەلى جوندەۋ جۇرگىزىلدى.

«وقو اكىمى بەيبىت اتامقۇلوۆ قۇرىلىس الاڭدارىنا بارۋ كەزىندە مەردىگەرلەردەن بارلىق جۇمىستاردى مەرزىمىندە اياقتاۋدى تالاپ ەتتى. تەك ساپالى قۇرىلىس ماتەريالدارىن پايدالانىپ، ولاردى مۇقيات تەكسەرۋدى، مەكتەپ ماڭىنداعى اۋلالاردىڭ اباتتاندىرىلۋىنا مۇقيات كوڭىل ءبولۋ كەرەك ەكەنىن تاپسىردى»، - دەپ اتاپ ءوتتى وبلىس اكىمدىگىنىڭ باسپا ءسوز قىزمەتىنەن.

دەرەككوزى: قازاقپارات