بۇگىن وڭتۇستىك قازاقستان وبلىسىنىڭ اكىمى بەيبىت اتامقۇلوۆتىڭ توراعالىعىمەن وتكەن ماجىلىستە وڭىردەگى ءبىلىم مەكەمەلەرىنىڭ جاڭا وقۋ جىلىنا دايىندىعى جانە مەكتەپ وقۋشىلارىن وقۋلىقتارمەن قامتۋ جايى قارالدى. جيىنعا باسقارما باسشىلارى مەن اۋدان، قالا اكىمدەرى قاتىسىپ، كۇن تارتىبىنە قويىلعان ماسەلە بويىنشا وبلىس اكىمىنىڭ ورىنباسارى ەرلان ايتاحانوۆ بايانداما جاسادى.
ءبىلىم سالاسىندا اتقارىلعان جۇمىستار جونىندە حابارلاما جاساعان ە.ايتاحانوۆ بۇگىنگى تاڭدا وڭىرىمىزدە مەكتەپكە دەيىنگى ۇيىمداردىڭ سانى 1454 بىرلىككە جەتىپ، ولارعا 157780 بالا قامتىلعاندىعىن اتاپ ءوتتى. وبلىسىمىز رەسپۋبليكا كولەمىندە ءبىرىنشى بولىپ بالاباقشا جۇيەسىن مەملەكەتتىك-جەكەمەنشىك ارىپتەستىك شەڭبەرىندە كەڭەيتۋدى قولعا العاندىعىن مالىمدەگەن وبلىس اكىمىنىڭ ورىنباسارى ءقازىردىڭ وزىندە مەملەكەتتىك-جەكەمەنشىك ارىپتەستىك نەگىزىندە 647 بالاباقشا ىسكە قوسىلىپ، ول وڭىرىمىزدەگى جالپى مەكتەپكە دەيىنگى ۇيىمدار ۇلەسىنىڭ 44،4 پايىزىن قۇراپ وتىرعاندىعىن جەتكىزدى.
– جالپى مەكتەپكە دەيىنگى ۇيىمدارعا 3-6 جاستاعى بالالاردى قامتۋ كورسەتكىشى 78،3 پايىزعا جەتىپ، مەملەكەتتىك باعدارلامانىڭ جىلدىق جوسپار ارتىعىمەن ورىندالدى، – دەدى ەرلان قۋانىش ۇلى.
بىلتىرعى وقۋ جىلىندا 1022 مەكتەپتە 562621 وقۋشى ءبىلىم الىپ، ۇبت-عا مەكتەپ بىتىرۋشىلەردىڭ 69،8 پايىزى قاتىسقان. وبلىستىڭ ورتا بالى وتكەن جىلدان 4،2 باللعا كوتەرىلىپ، 78،7 بالدى قۇراعان. ال «التىن بەلگىگە» 608 تۇلەك يە بولىپ، وتكەن جىلمەن سالىستىرعاندا 172 تۇلەككە ارتقان. – بۇل رەسپۋبليكاداعى «التىن بەلگى» يەگەرلەرىنىڭ 30%-ىن قۇرايدى، – دەپ اتاپ ءوتتى وبلىس اكىمىنىڭ ورىنباسارى.
بۇدان كەيىن ءبىلىم بەرۋ ۇيىمدارىنىڭ قۇرىلىسى مەن جوندەۋ جۇمىستارى باياندالدى. بيىل وبلىستا رەسپۋبليكالىق جانە وبلىستىق بيۋدجەت ەسەبىنەن 104 ءبىلىم نىسانىنىڭ قۇرىلىسى قولعا الىنعان. ونىڭ ىشىندە جىل اياعىنا دەيىن 67 جاڭا ءبىلىم نىسانىنىڭ قۇرىلىسىن اياقتاۋ جوسپارلانىپ، قازىرگە دەيىن 37ء-سى پايدالانۋعا بەرىلگەن. سونىمەن قاتار، جىل باسىنان بەرى عيماراتى اپاتتى دەپ تانىلعان مەكتەپتەرگە جاڭا 19 مەكتەپ عيماراتى سالىنعان. جىل سوڭىنا دەيىن وسى ساناتتاعى تاعى 10 مەكتەپتىڭ قۇرىلىسىن اياقتاۋ جوسپاردا بار. قالعان 17 مەكتەپتىڭ قۇرىلىسىن الداعى ەكى جىلدا اياقتاۋ كوزدەلگەن. سونداي-اق، 100 ءبىلىم نىساندارىندا ءجۇرىپ جاتقان كۇردەلى، 697 ءبىلىم مەكەمەسىندەگى اعىمداعى جوندەۋ جۇمىستارى تاياۋ ارادا اياقتالادى.
ءبىلىم مەكەمەلەرىنىڭ قىسقى جىلىتۋ ماۋسىمىنا دايىندىعى جونىندە اقپار بەرگەن وبلىس اكىمىنىڭ ورىنباسارى 1479 ءبىلىم بەرەتىن مەكەمەلەردىڭ جىلۋ جۇيەلەرىنە قىسىمداۋ-سىعىمداۋ جۇمىستارى 94 پايىزعا اتقارىلعاندىعىن، قاجەتتى قاتتى وتىننىڭ 72 پايىزى، سۇيىق وتىننىڭ 80 پايىزى تاسىمالدانعاندىعىن، تابيعي گازبەن جىلىتىلاتىن 355 ءبىلىم مەكەمەلەرى گاز تاسىمالداۋشى مەكەمەلەرمەن كەلىسىمشارتتار تۇزگەندىگىن تىلگە تيەك ەتتى.
ق ر ءبىلىم جانە عىلىم مينيسترلىگى ازىرلەگەن كەستەگە سايكەس وبلىستاعى مەكتەپتەر 2015 جىلى 4، 5، 6، 11-سىنىپتارعا ارنالعان وقۋلىقتار مەن وقۋ-ادىستەمەلىك كەشەندەرىنە جانە 3-سىنىپتىڭ اعىلشىن ءتىلى مەن 7-سىنىپتىڭ ينفورماتيكا ءپانى وقۋلىقتارىمەن قامتىلۋى ءتيىس. وسى ورايدا اۋدان، قالا اكىمدىكتەرى 12 باسپامەن جاساعان كەلىسىمشارتتار نەگىزىندە كەلىپ تۇسكەن وقۋلىقتاردى مەكتەپتەرگە تاراتۋ جۇمىستارىن جۇرگىزۋدە. بۇل باعىتتاعى مەجەلەنگەن جۇمىستار جاڭا وقۋ جىلى باستالعانعا دەيىن جالعاسىپ، ءبىلىم مەكەمەلەرى قاجەتتى وقۋلىقتارمەن تولىق قامتىلماق.
ءماجىلىستى قورىتىندىلاعان وبلىس اكىمى بەيبىت اتامقۇلوۆ جاڭا وقۋ جىلىنا دايىندىق كۇن تارتىبىندەگى ەڭ وزەكتى ماسەلە ەكەندىگىنە ەرەكشە توقتالىپ، اۋدان، قالا اكىمدەرى مەن باسقارما باسشىلارىنا ءبىلىم بەرۋ ۇيىمدارىنداعى قۇرىلىس، جوندەۋ جۇمىستارىنىڭ ءوز مەرزىمىندە اتقارىلۋىن باقىلاپ، ساپاسىن قاداعالاۋدى جانە قۇرىلىسى جوسپارلانعان نىساندارعا جەر ءبولۋدى تەزدەتۋ، ءبىلىم بەرۋ ۇيىمدارى الدىندا وقۋشىلار قاۋىپسىزىدىگىن قامتاماسىز ەتۋ ءۇشىن ارنايى جول بەلگىلەرىن ورناتۋ جايىندا ءبىرقاتار ناقتىلى مىندەتتەر جۇكتەدى.
وقو اكىمى اپپاراتىنىڭ
باسپا ءسوز قىزمەتى
