كەنتاۋ قالالىق ءبىلىم بەرۋ ءبولىمىنىڭ ۇيىمداستىرۋمەن، قازاقساتان مۇسىلماندارى ءدىني باسقارماسىنا قاراستى «زەكەت» قورىنىڭ وڭتۇستىك قازاقستان وبلىسى بويىنشا وكىلدىگىنىڭ دەمەۋشىلىگىمەن تۇرار رىسقۇلوۆ اتىنداعى №24 جالپى ورتا مەكتەبىندە «مەكتەپكە جول» اكسياسى اياسىندا «بالالارعا بىرگە كومەك بەرەيىك!» اتتى قايرىمدىلىق ءىس-شاراسى بولىپ ءوتتى.

اتالعان شاراعا قالالىق ورتالىق مەشىتتىڭ نايب يمامى جومارت تولەن، وبلىستىق «زەكەت» قورىنىڭ جەتەكشىسى وركەن ساپارقۇلوۆ، «ار-راحيم» مەشىتىنىڭ يمامى باقىتجان اكاۋوۆ، قالالىق ءبىلىم بەرۋ ءبولىمىنىڭ ادىسكەرى ءنۇريپا كۇزەمبايەۆا جانە ءبىلىم وشاقتارىنىڭ مۇعالىمدەرى مەن اتا-انالار، وقۋشى جاستار قاتىستى.

قايىرىمدىلىق شارادا مەشىت يمامدارى مەن «زەكەت» قورىنىڭ جەتەكشىسى ءسوز سويلەپ، از قامتاماسىز ەتىلگەن وقۋشى بالالارعا قول ۇشىن بەرىپ، كومەك قولىن سوزۋ ءاربىر ازاماتتىڭ پارىزى ەكەندىگىن ەسكەرتىپ، وقۋشىلارعا وقۋ قۇرالدارىن تابىستادى. اكسيا بارىسىندا «سامۇرىق» بي توبى بي-بيلەپ، وقۋشىلار ءۇيىنىڭ «كوڭىلدى دىبىستار» ۇيىرمەسىنىڭ وقۋشىلارى ءان ايتىپ، قوناقتارعا كوتەرىڭكى كوڭىل كۇي سىيلادى. ءىس شاراعا قاتىسقان №12 ورتا مەكتەپتىڭ اتا-اناسى كۇلتاي ەشيموۆا مەن №14 مەكتەپتىڭ اتا-اناسى كۇلاش اشيروۆا ءسوز سويلەپ، كومەك كورسەتۋشىلەرگە وزدەرىنىڭ العىستارىن ءبىلدىردى. جيىن سوڭىندا بالالارعا ارنالعان تاتتىلەر قويىلىپ، داستارحان جايىلدى.

ءدال وسىنداي قايىرىمدىلىق اكسياسى كەنتاۋ قالاسىنىڭ وزگە دە ءبىلىم وشاقتارىندا ءوز جالعاسىن تابۋدا.

دەرەككوزى: كەنتاۋ قالاسى اكىمدىگىنىڭ سايتى