21-23 تامىزدا وبلىستىق ءبىلىم، جاستار ساياساتى جانە تىلدەردى دامىتۋ باسقارماسىنىڭ تاپسىرماسى بويىنشا «قازىنا جاستارى» قوعامدىق بىرلەستىگىنىڭ ۇيىمداستىرۋىمەن بىركولىك شاتقالى "بايشەشەك" لاگەرىندە "بىرلىگىمىز جاراسقان "دوستىق" لاگەرى" ءوتتى. 3 كۇندىك لاگەردە اۋدان، قالالاردان كەلگەن بەلسەندى جاستار سپورتتىق سايىستار مەن ونەر بايقاۋلارىنا قاتىسىپ، جاستاردىڭ دوستىعى مەن بەلسەندىلىگىن ارتتىرۋعا باعىتتالعان سەمينار-ترەنيگتەردەن ءوتتى.

جاستار وبلىس اكىمىنىڭ ورىنباسارى ايتاحانوۆ ەرلان قۋانىشۇلىمەن كەزدەسىپ، كوكەيىندە جۇرگەن سۇراقتارىنا جاۋاپ الدى. قازاقستانداعى قارجىلىق جاعداي، ستۋدەنتتەردىڭ جول اقى ماسەلەلەرى، جاستاردى باسپانامەن قامتۋ، تالانتتى جاستاردى ارنايى نوميناسيالار بويىنشا ماراپاتتاۋ سىندى ۇسىنىستار مەن سۇراقتار قويىلدى.

ەرلان قۋانىش ۇلى جاستاردى سولتۇستىك وڭىرلەرگە جۇمىس جاساۋعا شاقىردى. قونىستانۋشىلارعا تەگىن ءۇي-جاي، جەر ۋچاسكەسى بەرىلىپ، الەۋمەتتىك قولداۋ كورسەتىلەتىندىگىن ايتتى. قازاقستانداعى قارجىلىق جاعداي بويىنشا حالىق اراسىندا تۇسىندىرمە جۇمىستارىنىڭ جۇرگىزىلىپ جاتقاندىعىن، ۇكىمەتتە سەلەكتور وتكەندىگىن، ءتيىستى كومەكتەر كورسەتىلەتىندىگىن جەتكىزىپ، حالىقتى داۋرىقپاۋعا شاقىردى.

لاگەردە وبلىسىمىزدىڭ 200-گە جۋىق جاستارى 4 توپقا ءبولىنىپ، ءوزارا ءتۇرلى ۇلتتاردىڭ مادەنيەتىن، ءسالت-داستۇرىن كورسەتىپ، تاعامدارىن ازىرلەۋ بويىنشا سايىستارعا ءتۇستى. تانىستىعىنا از ۋاقىت بولسا دا جاستار توپپەن جۇمىس جاساي الاتىندىعىن كورسەتىپ، دوستىق لاگەرىنىڭ شىرايىن كىرگىزدى.

 دوستىق لاگەرىنىڭ سوڭىندا بەلسەندى جاستار ماراپاتتالدى. كەنتاۋ قالاسىنان №6 مەكتەپتىڭ وقۋشىسى چارىكۋلييەۆ كەمال مەن №24 مەكتەپتىڭ وقۋشىسى تورەبەك ەركەبۇلان "روبوت" بيىمەن كورەرمەندەردىڭ كوزايىمىنا اينالدى. قاشعاري مەكتەبىنىڭ 10 سىنىپ وقۋشىلارى ساتانوۆا ديارا، ابدۋكاديروۆا ديانا، اينيتدينوۆا گۋلباحور، اينيتدينوۆ ميرسايد جانە ككك تۇلەگى ءابدىرامان ۇلدانا بەلسەندىلىك كورسەتتى.

جاستار دوستىق لاگەرىن ۇيىمداستىرۋشىسى «قازىنا جاستارى» قوعامدىق بىرلەستىگىنە جانە قالالىق «جاستار ورتالىعىنا» العىستارىن ايتىپ، كەلەسى جىلى دا وسىنداي ءىس-شارالاردىڭ وتۋىنە تىلەك ءبىلدىردى.

«جاستار ورتالىعىنىڭ» ينسپەكتورى م.مامۋدجانوۆا