كەنتاۋ قالاسىنىڭ ستۋدەنتتەرىنەن قۇرىلعان «جاسىل ەل» ەڭبەك جاساقتارى جايدارى جازدى قىزىقتى، ءارى تابىستى وتكىزدى. قالا كوللەدجدەرىندە ءبىلىم الۋشى 40 جاس ماۋسىم-شىلدە ايلارىندا قالانىڭ كوگالداندىرۋ مەن اباتتاندىرۋ ىستەرىنە اتسالىستى. ياعني، ساياباقتار مەن كوشەلەردەگى، اللەيالارداعى گۇلدەردى سۋارىپ، كۇتىپ باپتاۋ جۇمىستارىن اتقاردى. اعاشتاردىڭ قۋراعاندارىن وتاپ، جاسىل جەلەكتەردىڭ بويىن بىركەلكى قىرقىپ شىقتى.
بۇل جۇمىستاردى اتقارعان جاستاردى قارجىلاندىرۋ ماسەلەسى دە ءوز شەشىمىن تاپقان. «جاسىل ەل» رەسپۋبليكالىق ەڭبەك جاساقتارى شتابىنان ءار ستۋدەنتكە 17697 تەڭگە تولەنسە، قالالىق بيۋدجەتتەن 21364 تەڭگە ءبولىنىپ وتىر. سونداي-اق، جاستار كەپكا، فۋتبولكا، سپورتيۆكا، شالبار، اياق كيىممەن تولىقتاي قامتاماسسىز ەتىلدى.
- «جاسىل ەل» ەڭبەك جاساقتارىنىڭ جۇمىسى كەنتاۋ قالاسىندا 2010 جىلدان بەرى جۇرگىزىلمەگەن بولاتىن. بيىل جاستار ورتالىعىنىڭ ۇسىنىسىمەن، قالا اكىمى ءا.ماقۇلبايەۆتىڭ قولداۋىمەن قايتا قولعا الىندى. باعدارلاما بويىنشا كەنتاۋ مەديسينا كوللەدجى، كەنتاۋ كوپسالالى كوللەدجى، №7 كوللەدجىنىڭ ستۋدەنتتەرى قالادا جۇمىس اتقاردى. ءىس-شارالار اياسىندا قالالىق جاستار ورتالىعىنىڭ ۇيىمداستىرۋىمەن جاستاردىڭ تاريحي تاعىلىمدارىن ارتتىرۋ ماقساتىندا بايدىبەك، تۇركىستان، وتىرار اۋداندارىنىڭ تاريحي جەرلەرىنە ساياحات جانە جاستار قازاقستاندىق ءونىمدى تاڭدايدى اتتى فلەشموب وتكىزىلدى. الداعى ۋاقىتتا وبلىس ورتالىعىنداعى مادەني وشاقتارعا ساياحات جاساۋ جوسپاردا بار، - دەيدى كەنتاۋ قالالىق "جاستار ورتالىعى" كمم ديرەكتورى قانات بەكمەتوۆ.
جالپى باعدارلاما ەلىمىزدى كوگالداندىرۋعا جانە جاستاردى ەڭبەككە باۋلۋعا باعىتتالعان. جازعى دەمالىستا ۋاقىتتارىن ءتيىمدى پايدالانىپ جۇرگەن جاستار باعدارلامانىڭ كەلەر جىلى قايتالانعاندىعىن قالايدى.
- ءبىز قالامىزدىڭ كوركەيۋىنە اتسالىسىپ، گۇلدەنۋىنە ءوز ۇلەسىمىزدى قوسىپ جۇرگەنىمىزدى ماقتان تۇتامىز. ءارى اقشا تاۋىپ، جاڭا وقۋ جىلىنا كيىم الماقپىز. اتا-انالارىمىزعا ەشقانداي سالماق سالعىمىز كەلمەيدى. جاستاردى ەڭبەككە باۋليتىن «جاسىل ەل» باعدارلاماسى كەلەر جىلى دا جالعاسىن تاپسا دەگەن ۇسىنىسىمىز بار، - دەيدى كەنتاۋ مەديسينا كوللەدجىنىڭ 4 كۋرس ستۋدەنتى، «جاسىل ەل» ەڭبەك جاساقتارىنىڭ جەتەكشىسى مۇحاممەتالي مۇرادوۆ.
مىنە، وسىلايشا كەنتاۋلىق جاستار جازعى دەمالىسىن قىزىقتى ءارى تابىستى وتكىزۋدە.
