وسىنداي مالىمدەمەنى تۇركيانىڭ ءىرى وپپوزيسيالىق پارتياسى CHP (رەسپۋبليكالىق حالىق پارتياسى) جاساعان زەرتتەۋلەر ناتيجەسىندە قۇجاتتىق تۇردە جەتكىزدى. بۇل تۋرالى «قامشى» پورتالى تۇركيالىق «Bugün» گازەتىنە سىلتەمە جاسايدى.

شانلىۋرفا قالاسىنا قاراستى سۋرۋچ ايماعىندا ورىن العان لاڭكەستىك ارەكەتكە بايلانىستى تۇركيانىڭ شىعىس جانە وڭتۇستىك-شىعىس ايماقتارىن قاتاڭ باقىلاۋعا العان اتالمىش پارتيا مۇشەلەرى ادىيامان قالاسىندا جۇرگىزگەن زەرتتەۋ ناتيجەلەرىن مالىمدەدى.

CHP پارتياسىنىڭ ءتوراعا ورىنباسارى ۆەلي اعبابانىڭ جەتەكشىلىگىندەگى باقىلاۋ توبى تاراپىنان ازىرلەنگەن قۇجاتتا كەيبىر «يسلام مەملەكەتى» سودىرلارىنىڭ قاتارىنا ادام تارتۋ ماقساتىندا كافە مەن مەشىتتەردە ۇيىم وكىلدەرىنىڭ بار ەكەندىگى، سونداي-اق، بالالارى وسى ۇيىمعا كەتكەن وتباسىلاردىڭ تۇسىرگەن شاعىمدارى نازاردان تىس قالىپ جاتقاندىعى ايتىلعان.

ەكسترەميستىك ۇيىم مۇشەلەرىنىڭ جەدەل جاردەم كولىكتەرىمەن سيرياعا جونەلتىلىپ جاتقاندىقتارى ايتىلعان قۇجاتتا: «جۇمىسسىزدىق سالدارىنان شايحانالار مەن كافەلەر ادامعا تولى. ءتىپتى كەيبىر كافەلەر «يشيم مەن بايلانىس نىسانى» سەكىلدى... » دەگەن جولدار كوپشىلىكتىڭ نازارىن بۇردى.

تەررورلىق ۇيىمنىڭ ءوز «قۇرباندارىن» جيناۋعا ىڭعايلى ساناعان ەندىگى ءبىر نىسانى، سول جەردەگى كەيبىر مەشىتتەر ەكەن. اسىرەسە، ماراششىلار جانە فاتيح مەشىتتەرىندە سىرتتان كەلىپ، مەشىتتەردە ءتۇرلى «ۋاعىزدار» ايتىپ، جيھادقا ۇندەۋشىلەر بار كورىنەدى.  

مالىمدەمەنىڭ سوڭىندا تاعى دا مىناداي جاعا ۇستاتار جايت ورىن العان: «اتالعان ايماقتا شەكارا قاۋىپسىزدىگى جوق دەسە دە بولعانداي. بۇل جاعداي ءيشيم-نىڭ جاستاردى سيرياعا جانە باسقا ايماقتارعا اكەتۋلەرىنە مۇمكىندىك بەرىپ وتىر. قۇزىرلى ورگانداردىڭ ءيشيم-نىڭ بۇل ارەكەتتەرىنە قارسى ەشقانداي شارا قولدانباي وتىرعاندىقتان، ال بۇنداي سالعىرتتىقتاردىڭ ءيشيم-نىڭ سول ايماقتا «جالعاندى جالپاعىنان» باسقانداي ەركىن ارەكەت ەتۋلەرىنە جول اشىپ جاتقاندىعىن كورسەتەدى. بۇگىنگى تاڭدا كافەلەر ۇيىمعا مۇشە جيناۋعا ىڭعايلى ورىن رەتىندە قولدانىلۋدا. ۇيىم ناسيحاتتالعان كەيبىر مەشىتتەر دە قاتاڭ باقىلاۋعا الىنىپ، ال شاعىمدارعا سالعىرت قاراعاندار قاتاڭ جاۋاپقا تارتىلۋ كەرەك» دەلىنگەن.

نۇرزات توعجان «قامشى» پورتالى، «Bugün» گازەتى