جاقىندا قازاقستاندىق باق-تا اسا ءىرى كولەمدە پارا الىپ ۇستىلعان ق ر تابيعي مونوپوليالاردى رەتتەۋ اگەنتتىگىنىڭ ەكس-توراعاسى مۇرات وسپانوۆقا قاتىستى داۋلى پىكىر-تالاس تۋعان بولاتىن.  ەكس-توراعا 7 جىلدان كەيىن مەملەكەتتىك قىزمەتكە ورالادى دەگەن قاۋەسەت وقىرمانداردىڭ اراسىندا داۋلى سۇراقتىڭ تۋىنداۋىنا سەبەپ بولعان. وسىعان وراي، ق ر باس پروكۋراتۋراسى رەسمي سايتىندا تۇسىنىكتەمە بەرگەن.

بۇل تۋرالى «قامشى» پورتالى www.nur.kz-كە سىلتەمە جاسايدى.

 «باس پروكۋراتۋرا وسى جاعدايدى ءتۇسىندىرىپ ءوتۋدى ءجون كوردى. 2015 جىلدىڭ 23 شىلدەسىندە استانا قالالىق سوتىنىڭ كاسساسيالىق ساتىسى مۇرات وسپانوۆ ادۆوكاتىنىڭ سوت شەشىمىمەن كەلىسپەيتىنى تۋرالى ءوتىنىشىن قارادى. بۇل رەتتە، نەگىزگى جازا رەتىندە بەرىلگەن ۇكىم، ياعني ايىپپۇل سالۋ ۇكىمى وزگەرىسسىز قالدى دا، قوسىمشا جازا – ءومىر بويى مەملەكەتتىك قىزمەتتە جۇمىس ىستەي المايتىن جازا وزگەردى. بۇل مەرزىم جەتى جىلعا دەيىن قىسقارتىلدى»،-دەلىنگەن باس پروكۋراتۋرانىڭ اقپاراتىندا.

«نەگە مۇنداي شەشىم قابىلداندى؟ وسپانوۆ قىلمىستى بۇرىنعى قىلمىستىق زاڭ ارەكەت ەتكەن كەزەڭدە، ياعني، مەملەكەتتىك قىزمەتتەگى لاۋازىمدى اتقارۋ قۇقىعىنان ماكسيمالدى ايىرۋ جەتى جىلعا دەيىن قاراستىرىلعان كەزدە جاسادى. ءىستى قايتا قاراۋ كەزىندە جوعارىدا ايتىلعان سوت قىلمىستىق قۇقىقتىڭ نەگىزىن قالايتىن – سوتتالعان ادامنىڭ جاعدايىن ناشارلاتۋعا جول بەرمەۋ تۋرالى ءپرينسيپىن نەگىزگە الدى. سوتتالعان ادامنىڭ جاعدايىن ناشارلاتاتىن زاڭنىڭ كەرى كۇشى جوق ەكەنى بارشاعا ءمالىم. ءسويتىپ، جوعارىدا ايتىلعان سوت شەشىمىمەن جازا زاڭدى تۇردە وسپانوۆ قىلمىس جاساعان مەزەتتە قولدانىستاعى قىلمىستىق كودەكسپەن سايكەس كەلتىرىلدى»، – دەپ تۇسىندىرەدى قۇزىرلى ورگان.

«الايدا، بۇل وسى ازامات جەتى جىلدان كەيىن مەملەكەتتىك قىزمەتكە قايتىپ كەلە الادى دەگەندى بىلدىرمەيدى. سەبەبى، «مەملەكەتتىك قىزمەت تۋرالى» زاڭنىڭ 10-بابىنىڭ 4-تارماعى 6-2-تارماقشاسىنا سايكەس سىبايلاس جەمقورلىق قىلمىسىن جاساعانى جانە سول ءۇشىن سوتتالعان ادامدى مەملەكەتتىك قىزمەتكە ەشقاشان قابىلداۋعا بولمايدى. سوندىقتان، كورسەتىلگەن مەملەكەتتىك قىزمەتتەگى لاۋازىمدى اتقارۋ قۇقىعىن 7 جىلعا شەكتەيتىن سوت شەشىمىنە قاراماستان، وسپانوۆ قولدانىستاعى مەملەكەتتىك قىزمەت تۋرالى زاڭعا سايكەس مەملەكەتتىك ورگاندارداعى قانداي دا ءبىر لاۋازىمدى يەلەنۋگە ءتىپتى، ەشقاشان ۇمىتتەنە دە المايدى»،-دەلىنگەن حابارلامادا