بۇگىن جۇڭگو استاناسى بەيجىڭ قالاسىندا جاپون ميلليتاريستەرىنە قارسى سوعىستاعى جەڭىستىڭ 70 جىلدىعىنا ارنالعان اسكەري پاراد وتۋدە. بۇل تۋرالى «قامشى» پورتالى Tengrinews.kz-كە سىلتەمە جاساي وتىرىپ حابارلايدى.

قحر استاناسىنداعا اسكەري پارادتى تاماشالاۋعا قازاقستان پرەزيدەنتى نۇرسۇلتان نازاربايەۆ، رف پرەزيدەنتى ۆلاديمير پۋتين، بەلورۋس پرەزيدەنتى الەكساندر لۋكاشەنكو، قىرعىزستان پرەزيدەنتى المازبەك اتامبايەۆ، وزبەكستان پرەزيدەنتى يسلام كاريموۆ جانە وزگە دە مەملەكەت باسشىلارى قاتىسۋدا.

ال جۇڭگو حالىق رەسپۋبليكاسىنىڭ ءتوراعاسى ءار قۇرمەتتى قوناقتى جەكە قارسى الىپ، اسكەري شەرۋدى تاماشالايتىن ورنىنا دەيىن جەتكىزىپ وتىرعان.

ەسكەرتە كەتەيىك، قىتايداعى اسكەري پارادتا ق ر قارۋلى كۇشتەرىنىڭ اەروموبيلدى اسكەردىڭ قۇرمەتتى قاراۋىلى جاساعىنىڭ 76 ساربازى قاتىسادى. بارلىعى پارادقا 17 مەملەكەتتىڭ اسكەري قىزمەتكەرلەرى جۇمىلدىرىلعان.

ەستەرىڭىزدە بولسا، وسىعان دەيىن قازاقستان پرەزيدەنتى جۇڭگو حالقىن جەڭىستىڭ 70 جىلدىعىمەن قۇتتىقتاعان بولاتىن.

پرەزيدەنت نازاربايەۆ جۇڭگو ءتوراعاسى سي سزينپينگە العىسىن ايتا كەلە، اسكەري پارادتارعا قاتىستى ءوزىنىڭ تاعى ءبىر ويىن بىلدىرگەن.

«اسكەري پاراد، شەرۋ وتكىزۋ – كەڭەستىك كەزەڭنەن قالعان. وزدەرىڭىز بىلەتىندەي، ءقازىر الەم اسكەري پاراد، شەرۋ وتكىزۋگە قىزىعۋشىلىق تانىتپايدى. دەسەدە، ءبىزدىڭ ورتاق تاريحىمىز ءۇشىن ماسكەۋدەگى جانە بەيجىڭدەگى پارادتاردىڭ ماڭىزى زور بولماق»،-دەدى قازاقستان پرەزيدەنتى.

نۇرزات توعجان