شىمكەنتتە تاۋەلسىزدىك مەرەكەسى قارساڭىندا جاستار قاۋىمىنا دا ەرەكشە تارتۋ جاسالدى. №6 كوللەدجدىڭ 300 ورىندىق جاڭا وقۋ عيماراتى پايدالانۋعا بەرىلدى. الەۋمەتتىك نىساندى تۇرعىزۋعا وبلىستىق بيۋدجەتتەن 260 ميلليون تەڭگە بولىنگەن.

80 جىلعا جۋىق تاريحى بار ءبىلىم مەكەمەسى اسپاز، كونديتەر، ناۋبايشى سياقتى بىلىكتى ورتا بۋىن ماماندارىن دايارلايدى. بۇعان دەيىن ءبىر قاباتتى ەسكى عيماراتتا جۇمىس اتقارعان. سوڭعى جىلدارى مۇندا ۋاقىت تالابىنا ساي بارمەندەر مەن داياشىلار، ماركەتولوگ-ساتۋشىلار دا ازىرلەنە باستادى. ءۇش قاباتتى ەڭسەلى جاڭا عيماراتتا ارنايى ءپان كابينەتتەرى، لينگافون بولمەسى جانە سپورت زالى بار. سوڭعى ۇلگىدەگى جاڭا قۇرال-جابدىقتار دا ءبىلىم ساپاسىن ارتتىرۋعا نەگىز بولادى، - دەيدى ۇستازدار قاۋىمى. بۇگىندە كوللەدج 140-تان استام مەكەمەمەن ستۋدەنتتەردى ەڭبەك تاجىريبەسىنەن وتكىزىپ، جۇمىسقا ورنالاستىرۋ جونىندە كەلىسىم-شارتقا وتىرعان. ستۋدەنتتەر مەن وقىتۋشىلار بىرلەسىپ دايىنداعان بىرنەشە جوبا رەسپۋبليكالىق، ءتىپتى، حالىقارالىق بايقاۋلاردا لايىقتى جوعارى باعاسىن الىپتى. راحيما قوجامجاروۆا، كوللەدج ديرەكتورى: – بىرنەشە جوبامەن جۇمىس ىستەپ جاتىرمىز. ونىڭ ءبىرى – ارنايى پاندەردى بەرۋ باعىتىندا جاڭا تەحنولوگيالار ەنگىزۋ. ەندى، سوعان جاعداي جاسالعان. EXPO-2017 بارىمىزگە ورتاق قۋانىشتى دا جاۋاپتى تىرلىك، سوعان ءبىز دە دايىندالىپ جاتىرمىز. وسىنىڭ الدىندا «قازاقستان برەندى – قۇرت» دەگەن جوبامەن شىعىپ، سول جوباعا پاتەنتتى الدىق.

دەرەككوز: baq.kz