جاقىندا «ششەبسكلاد» ساياجايىندا جالداپ تۇرىپ جاتقان پاتەرلەرى سۇرىلگەن سوڭ، اقوردا الدىنا نارازىلىق شاراسىن وتكىزگەن كوپ بالالى انانىڭ 6 بالاسى مەكتەپكە بارماي قالدى. بۇل تۋرالى قازاقستاندىق ب ا ق جازعان بولاتىن . بيىل شىلدەدە باسپاناسى جوقتىعىنا نالىپ، اقوردا الدىندا نارازىلىق تانىتقان 8 بالالى انا جەڭىسگۇل ەرمۇقامەت قىزىنىڭ 6 بالاسى – ايديدار، ۇلاعات، مۇحاممەت، سايىپقىران، مەرۋەرت پەن الماس 1 قىركۇيەكتە مەكتەپكە بارماي ۇيدە وتىر. بۇل تۋرالى «قامشى» پورتالى ازاتتىق سايتىنا سىلتەمە جاساي وتىرىپ حابارلايدى.

2004 جىلى قىتايدان اتاجۇرتقا قونىس اۋدارعان ەتنيكالىق قازاقتاردىڭ بالالارى بىلتىر استانا قالاسىنداعى 57-مەكتەپتە ءبىلىم العان بولاتىن.  8 بالانىڭ اناسى جەڭىسگۇل ەرمۇقامەت قىزى مەن مۇحامەدي ءشاننىڭ «ششەبسكلاد» ساياجايىندا جالداپ تۇرىپ جاتقان پاتەرلەرى سۇرىلگەن سوڭ، كوپ بالالى وتباسى اقوردانىڭ الدىندا نارازىلىق شاراسىن ۇيىمداستىرىپ، ۋاجدەرىن قازاقستان پرەزيدەنتىنىڭ وزىنە تىكەلەي جەتكىزۋگە تالپىنعان.  الايدا استانا قالالىق قۇقىق قورعاۋ وكىلدەرى ولاردى اقورداعا كىرگىزبەي، پوليسيا كۇشتەپ الىپ كەتكەن. وسى وقيعادان كەيىن ۇيسىز-كۇيسىز دالادا قالعان قانداستارعا استانانىڭ اۋەجايى قاسىنداعى «پريگرودنىي» اۋىلىنىڭ الەۋمەتتىك جاتاقحانىسىنان 17 شارشى مەترلىك بولمەنى ۋاقىتشا تۇرۋعا بەرگەن.

جەڭىسگۇل ەرمۇقامەت قىزى، 8 بالانىڭ اناسى، 3-توپتاعى مۇگەدەك:

– ءبىزدى بۇل جەرگە ۋاقىتشا ورنالاستىردى. «ەكى بولمەلى جاتاقحانا بەرىلەدى، ول بوساعانشا وسىندا تۇرا تۇرىڭدار» دەدى. كورىپ تۇرسىڭدار، مۇندا جارىق جوق. ءبىرىنشى قابات بولعان سوڭ با، سۋىق. قانشا كۇن تۇراتىنىمىزدى بىلمەيمىز. پاتەر ماسەلەسىن شەشىپ الماي مەكتەپكە قالاي بارامىز؟ بيىلعى وقۋ جىلى باستالار شاقتا 57-مەكتەپ مۇعالىمدەرى حابارلاسىپ، جاعدايىمىزدى سۇراعان. ءبىراق ول مەكتەپكە قاتىنايتىن جولدىڭ الىستىعىنا بايلانىستى بالالار مەكتەپكە بارا المايتىندىقتارىن ايتتىم.

باعلان سماتايەۆا، استانا قالالىق ءبىلىم باسقارماسى باسشىسىنىڭ ورىنباسارى:

– قالا تۇرعىندارى مۇقامەدي ءشان مەن جەڭىسگۇل ەرمۇقامەت قىزى بالالارىن مەكتەپكە ورنالاستىرۋ جونىندە كومەك سۇراپ كەلمەگەن. ەگەر كومەك  سۇراعان جاعدايدا ءتيىستى كومەك كورسەتىلەدى.

بۇنداي جاۋاپتى استانا قالالىق ءبىلىم باسقارماسىنىڭ باسشىسى «ازاتتىقا» جىبەرگەن.

ءلاززات ابۋيەۆا، استانا قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسى باسشىسى:

–  ول وتباسى دالادا قالمايدى دەپ ايتقانىم راس. ول كىسىلەر ءبىزدىڭ باسقارمادان جاردەماقى جانە باسقالاي دا كومەك الىپ جاتىر. ال پاتەر، جاتاقحانا ماسەلەسىن باسقا باسقارما، ءتۇرعىنۇي باسقارماسى شەشەدى. ولار سوندا وزدەرى حابارلاسۋلارى ءتيىس.

مۇحامەدي ءشان مەن جەڭىسگۇل ەرمۇقامەت قىزىنىڭ وتباسى 2004 جىلى شقو-عا قونىس اۋدارىپ كەلىپ، سول جەردە ازاماتتىق العان. بالالارىنىڭ ۇلكەنى 17 جاستا بولسا، كىشىسى 3 جاستا. جوعارىداعى 8 بالانىڭ التاۋى قازاقستاندا تۋعان. اۋەلگى كوشىپ كەلگەن اۋداننان جۇمىس تابا الماعاندىقتان «ورالمان زاڭى» بويىنشا مەملەكەتتەن بەرىلگەن ۇيلەرىن ساتىپ، استاناعا كوشىپ كەلگەن.  الايدا مۇندا دا ولاردىڭ جاعدايلارى كەلمەي وتىر. ولار باستارىندا بۇرىن باسپانا بولعاندىقتان زاڭداعى 5 جىلدىق شەكتەۋدىڭ كەسىرىنەن پاتەر كەزەگىنە تۇرا المايتىنى تاعى بار.

ايتا كەتەيىك، ەرلى-زايىپتىلاردىڭ ەكەۋى دە دەنساۋلىقتارىنا بايلانىستى ەڭبەككە جارامسىز بولىپ تابىلادى. مۇحامەدي ءشان قۇلاعى ەستىمەيتىندىكتەن – 2- توپتاعى مۇگەدەك بولسا، سەگىزىنشى بالاسىن بوسانعاننان كەيىن دەنساۋلىعى ناشارلاعان جەڭىسگۇل ەرمۇقامەت قىزى باسىنا وتا جاساتقان – 3-توپتاعى مۇگەدەك. وتباسىنىڭ ايلىق تابىسى – 60 مىڭ تەڭگە. ءار بالاعا مەملەكەتتەن بەرىلەتىن جاردەماقى، مۇگەدەكتىككە جانە «التىن القا» يەگەرىنە بەرىلەتىن ازىن-اۋلاق قاراجات وتباسىنىڭ نەگىزگى كىرىس كوزى بولىپ وتىر.

نۇرگەلدى ءابدىعاني ۇلى