وڭتۇستىك قازاقستان وبلىسىنىڭ اكىمى بەيبىت اتامقۇلوۆ «وڭتۇستىك» يندۋستريالدى ايماعى مەن «وڭتۇستىك» ارنايى ەكونوميكالىق ايماعىندا بولىپ، اتقارىلىپ جاتقان جۇمىستارمەن تانىستى. وبلىس باسشىسى ارنايى ەكونوميكالىق ايماقتاردا جىلدار بويى اتقارىلعان جۇمىستار ناتيجەسىن بەرە باستاعانىن، وندىرىستىك قۋاتتىلىقتىڭ ارقانىن اتاپ ءوتتى. «يندۋستريالدى ايماقتار ۇلكەن الەۋەتكە يە. وسى جىلداردا ىستەلگەن جۇمىستار ەلەۋلى ناتيجەلەر بەرە باستادى. ەندى وسى قارقىندى ارتتىرا ءتۇسۋ قاجەت»، - دەدى ب.اتامقۇلوۆ.

«وڭتۇستىك» يا-دا جالپى قۇنى 66 ملرد. تەڭگەنى قۇرايتىن 128 جوبا ىسكە اسىرىلۋدا. ونىڭ ىشىندە 18،5 ملرد. تەڭگەنى قۇرايتىن 36 جوباسى ءقازىردىڭ وزىندە ىسكە قوسىلدى. بۇل كاسىپورىنداردا 2 782 جاڭا جۇمىس ورنى اشىلدى. مۇندا كەلەشەكتە جالپى قۇنى 81.67 ملرد. تەڭگەنى قۇرايتىن ينۆەستيسيالىق جوبالار ىسكە اسىرىلىپ، 6 مىڭ جاڭا جۇمىس ورىندارى اشىلادى دەپ كۇتىلۋدە. وسى يندۋستريالدى ايماق اشىلعالى بەرى مۇندا 53 ملرد. تەڭگەنىڭ ءونىمى شىعارىلىپ، بيۋدجەتكە سالىقتىق تۇسىمدەر رەتىندە 3،5 ملرد. تەڭگە قۇرىلدى.

بۇگىنگى تاڭدا «وڭتۇستىك» ارنايى ەكونوميكالىق ايماعىندا جالپى ينۆەستيسيا كولەمى 22.6 ملرد. تەڭگەنى قۇرايتىن 8 ءىرى كومپانيا جۇمىس جۇرگىزەدى. مۇندا 1 445 جاڭا جۇمىس ورىندارى اشىلعان. وبلىس اكىمى جۇمىس ساپارى بارىسىندا كىلەم توقيتىن، ءجىپ يىرەتىن، گوفرالىق كارتون، قاعاز وندىرەتىن، ماقتا تالشىعى مەن ماقتا سەلليۋلوزاسىن شىعاراتىن كاسىپورىنداردىڭ جۇمىسىمەن تانىستى. ايتا كەتەيىك، بۇل تاۋارلاردىڭ بارلىعى ەلىمىزدىڭ ەكسپورتتىق الەۋەتىن ارتتىرىپ، شەتەلدىك نارىققا شىعارىلۋدا.

دايىنداعان ايدار قۇلجانوۆ.