كەيبىر ساراپشىلاردىڭ پىكىرى بويىنشا قازاقستاندا قايتالاما نارىقتا باسپانا قۇنى (دوللار ەكۆيۆالەنتىندە) كەلەسى جىلدىڭ سوڭىنا قاراي 20 پايىزعا تومەندەيدى. بۇل تۋرالى «قامشى» پورتالى Tengrinews.kz-كە سىلتەمە جاساي وتىرىپ حابارلايدى.  كەشە استانادا "قازاقستان-2050" جالپىۇلتتىق قوزعالىسىنىڭ ۇيىمداستىرۋىمەن ساراپتاۋ كلۋبىنىڭ وتىرىسى وتكەن بولاتىن.

اڭگىمەلەسۋ بارىسىندا تەڭگە ەركىن اۋىتقۋ باعامىنا وتكەننەن كەيىن جىلجىمايتىن مۇلىك نارىعىندا قانداي وزگەرىستەر بولدى دەگەن تاقىرىپتا پىكىرلەر الۋاندىعى تۋعان.  

"وسىعان دەيىنگى، ياعني 2014 جىلى اقپانداعى تەڭگە باعامىنا تۇزەتۋ جاساۋ جۇيەسىنە مىسال رەتىندە قارايتىن بولساق، ءبىز دوللار باعاسىنىڭ قازىرگى تاڭدا 16 پايىزعا تۇسكەنىن كورەمىز. ءبىز ءقازىر تەڭگە باعاسىنىڭ ديەۆالۆاسيالىق دەڭگەيگە قايتا ورالعانىن كورىپ وتىرمىز. قازىرگى جاعدايعا بايلانىستى ايتاتىن بولساق، بۇل جەردەگى تەڭگە باعامىنىڭ وزگەرىسىنەن ءبىز حالىق تابىسىنىڭ تومەندەگەنىن، وتاندىق كومپانيالار كىرىسىنىڭ ازايعانىن كورەمىز، سەبەبى داعدارىس قالاي بولعاندا دا ولارعا اسەر ەتەدى. مۇنىڭ بارلىعى باسپانا قۇنىنىڭ تۇسۋىنە اكەپ سوعادى. ءبىزدىڭ بولجام بويىنشا، 2016 جىلدىڭ سوڭىنا قاراي باعا 20 پايىزعا تومەندەيدى"، - دەدى  kn.kz اقپاراتتىق پورتالىنىڭ اناليتيكالىق قىزمەتىنىڭ باسشىسى اننا شاسكايا.

اننا شاسكايانىڭ ايتۋىنشا، قازىرگى تاڭدا استانادا ءۇيدىڭ ءار شارشى مەترىنىڭ باعاسى - 1820 دوللار. ايتا كەتەيىك، بۇل جەردەگى اڭگىمە قايتالاما نارىقتاعى باسپانالاردىڭ قۇنى جونىندە.

«ءقازىر جىلجىمايتىن مۇلىك نارىعىندا "كەيىن شەگىنۋشىلىك" بايقالادى، ياعني باعا بۇرىنعى تەڭگەگە قايتىپ ورالادى. "باعانىڭ قۇلاۋى ودان دا تەرەڭىرەك بولۋى مۇمكىن"، - دەيدى ول.