جاقىندا الماتى قالاسىندا ەر ادام جالعا العان پاتەرىنىڭ يەسىن زورلاپ كەتكەن. بۇل تۋرالى «قامشى» پورتالى tengrinews.kz-كە سىلتەمە جاساي وتىرىپ حابارلايدى.
3 تامىز كۇنى تاڭعا جۋىق الماتى پوليسياسىنا الماتىلىق ازاماتشا حابارلاسىپ، ءوزىن بەلگىسىز بىرەۋلەردىڭ زورلاپ كەتكەنىن ايتقان. ايەلدىڭ ايتۋىنشا، ول تاۋلىك جانە بەلگىلى ءبىر ساعاتقا پاتەرىن جالعا بەرۋمەن اينالىسادى ەكەن. وعان قورلىق كورسەتكەن ازامات تا پاتەرىن سونداي جالعا الۋشىلاردىڭ ءبىرى كورىنەدى.
انىقتالعانداي، قىلمىستىق ارەكەت سول جالدامالى پاتەردىڭ ىشىندە بولعان.
پوليسيا قىزمەتكەرلەرى وقيعا ورنىن تەكسەرۋگە كەلگەن كەزدە پاتەردىڭ ەسىگى ىشىنەن قۇلىپتاۋلى بولعان.
پوليسيا قىزمەتكەرلەرىنىڭ ءبىرى 7-قاباتتا ورنالاسقان الگى پاتەردىڭ ىشىنە سىم ارقىلى 8-قاباتتان ءتۇسىپ، ەسىكتى اشادى. سول ۋاقىتتا جابىرلەنۋشىنىڭ نۇسقاعان كۇدىكتىسى ۇيىقتاپ جاتقان ەكەن. قازىرگى تاڭدا ۇستالعان ەر ادام اۋداندىق ىشكى ىستەر باسقارماسىنا جەتكىزىلدى.
