مىسىرلىق  ميللياردەر ناگيب ساۆيريس يتاليا مەن گرەكيانىڭ بيلىك باسشىلارىنان بوسقىندارعا ارناپ ءبىر ارالدى ساتىپ العىسى كەلەتىنىن ايتتى. بۇل تۋرالى ول Twitter جەلىسىندەگى پاراقشاسىندا جازعان.

ال باتىستىڭ بۇقارالىق اقپارات قۇرالدارى ءساۆيريستىڭ بايلىعى 3،1 ميلليارد دوللارعا باعالانعانىن جانە  ءساۆيريستىڭ جەرورتا تەڭىزىندە 10-100 ميلليون دوللار ارالىعىندا ءبىر ارالدى ساتىپ الۋعا مۇمكىندىگى بار ەكەنىن جازادى. بۇل تۋرالى «قامشى» پورتالى Tengrinews.kz-كە سىلتەمە جاساي وتىرىپ حابارلايدى.

"گرەكيا نەمەسە يتاليا، ءوز ارالدارىڭىزدىڭ ءبىرىن ساتىڭىزدارشى. مەن ونى تاۋەلسىز ەتىپ جاريالاپ، بوسقىنداردى قابىلدايمىن، جۇمىسپەن قامتيمىن. وندا ولار وزدەرىنىڭ جاڭا وتانىن سالادى"، - دەپ جازدى ساۆيريس. 

2015 جىلدىڭ باسىنان بەرى ەۋرووداققا 340 مىڭنان اسا بوسقىن اۋىپ كەلگەن. بۇعان دەيىن ەۋروپالىق وداق وداققا مۇشە ەلدەردىڭ ءارقايسىسىنا گرەكيا مەن يتالياعا كەلىپ ۇلگەرگەن بوسقىنداردى 40 مىڭنان ۇلەستىرۋگە شەشىم قابىلداعان بولاتىن. ونىڭ ۇستىنە قوسىمشا 20 مىڭ بوسقىندى ءۇشىنشى ەلدەردەن اكەلۋگە مۇمكىندىك تۋعان. 

ايتا كەتەيىك، سيريالىق ءۇش جاسار ايلان كۋرديدىڭ ءولىمى بوسقىنداردىڭ ومىرىنە بۇكىل الەمنىڭ نازارىن اۋدارعان . بالانىڭ جاعالاۋعا شىعىپ قالعان جانسىز دەنەسىنىڭ سۋرەتتەرىن كورگەندەر جەلىگە بالانىڭ قۇرمەتىنە ارناپ سالعان سۋرەتتەرىن جاريالاي باستادى.

سيريالىق ءبۇلدىرشىننىڭ قازاسىنان كەيىن، بوسقىنداردىڭ ماسەلەسى ەۋرووداق كوشباسشىلارىن وڭتايلاندىرۋعا كوشكەن. Financial Times مالىمەتىنشە، بريۋسسەل ەو-عا مۇشە مەملەكەتتەر قابىلدانىپ جاتقان بوسقىنداردىڭ سانىن ءتورت ەسە كوبەيتەدى. فرانسيا بيلىگى بولسا ءوز كەزەگىندە بريۋسسەلدىڭ ۇسىنىسىن قابىل الاتىنىن مالىمدەپ، تاياۋ كۇندەرى بۇل ماسەلەنى گەرمانيامەن تالقىلايتىنىن جەتكىزدى. ۇلىبريتانيا پرەمەر-مينيسترى ديەۆيد كەمەرون بوسقىنداردىڭ سانىن كوبەيتۋگە دايىن ەكەنىن حابارلادى.

ال ەۋروكوميسسيانىڭ پرەزيدەنتى جان-كلود يۋنكەر كەلەسى اپتادا ەو-عا مۇشە ەلدەردى گرەكيادان، يتاليادان جانە ۆەنگريادان 160 مىڭ بوسقىندى قابىلداۋعا شاقىرعالى جاتىر. ال وسىدان ەكى اپتا بۇرىن تەك 40 مىڭ ادام تۋرالى ءسوز قوزعالعان ەدى.