جاقىندا قازاقستاندىق بۇقارالىق اقپارات قۇرالدارىندا  ءۇش بىردەي وبلىس اكىمىنىڭ ساۋناداعى «سەرىلىگى» تۋرالى اقپارات تارادى. ءجاي سەرىلىك ەمەس، وزدەرىنىڭ قىزمەتتىك مانسابىن پايدالانا وتىرىپ، وبلىستىق تەاتر ترۋپپاسى مەن فيلورمونيا ارتىستەرىن ساۋنادا ءان سالدىرىپ قويعان-مىس. بۇل اقپارات اۋەلدە matritca.kz سايتىندا جاريالانعانمەن، ارادا كوپ ۇزاماي جاتىپ-اق، ماقالا الىنىپ تاستالعان. 

ال matritca.kz-كە سىلتەمە جاساعان tribunakz.com سايتى 29 تامىز كۇنى اقمولا، قوستاناي جانە سقو اكىمدەرى – سەرگەي كۋلاگين، نۇرالى سادۋاقاسوۆ جانە ەرىك سۇلتانوۆتاردىڭ اقمولا وبلىسىنا قاراستى زەرەندى اۋىلىندا دەمالىس ۇيىندەگى ساۋنادا كوڭىل كوتەرگەندەرىن جانە وبلىستىق تەاتر ترۋپپاسىن تۇگەل جانە فيلورمونيادان ارتىستەر شاقىرعاندىعى تۋرالى جازعان. سايت اقپاراتتارىنا سۇيەنسەك، 50 شاقىرىم قاشىقتىق جولدى ءجۇرىپ كەلگەن تەاتر ترۋپپاسى اۋەلدە تىر جالاڭاش اكىمدەردىڭ كوڭىلىن كوتەتەتىندىكتەرىن بىلمەگەن. ۇزىن-ىرعاسىندا، مانساپشىل اكىمدەردىڭ مونشاداعى شوۋى 1 ساعاتقا جالعاسقان. ايتپاقشى، زەرەندىدە زەرىگىپ جاتقان اكىمدەردىڭ كوڭىلدەرىن كوتەرگەنى ءۇشىن  ءۇش اكىمنىڭ بىرەۋى دە ونەرپازدارعا العىس ايتپاعان، قالاماقىلارىن بەرمەگەن-مىس.

بۇل تۋرالى matritca.kz-كە حابارلاسقان كوكشەتاۋ قالالىق ش.قۇساينوۆا اتىنداعى قازاق درامما تەاترى ءارتىسىنىڭ (ءاتى-جونى كورسەتىلمەگەن) اعاسى داۋلەت قۋانىشپايەۆ ايتىپ بەرگەن.

«مەنىڭ قارىنداسىم قۇساينوۆا اتىنداعى تەاتردا جۇمىس ىستەيدى. ەكى-ۇش كۇن بولدى، قاتتى شارشاپ ءجۇر. كوڭىل-كۇيى دە جوق. بۇكىل تەاتر ترۋپپاسىن زەرەندىدەگى «زەرەن» دەمالىس ۇيىنە اپارىپ، اقمولا، قوستاناي جانە پەتروپاۆلوسك (سقو) وبلىستارىنىڭ اكىمدەرىنىڭ الدىندا ونەر كورسەتۋگە ماجبۇرلەگەن. بۇنى ماعان قارىنداسىم كەيىن ايتىپ بەردى.  اكىم مىرزالاردىڭ وزدەرى ساۋنادا تىر جالاڭاش وتىرىپ، تەاتر ارتىستەرىنە ءان ايتقىزىپ قويعانى قاي باسىنعاندىعى؟ »،-دەيدى داۋلەت قۋانىشپايەۆ.

ونىڭ ايتۋىنشا، تەاترلاندىرىلعان كورىنىس ءبىر ساعاتقا سوزىلعان. بۇل ءۇشىن ونەرپازدارعا ەشكىم قوسىمشا اقى تولەمەگەن.

«بۇل 29 تامىز كۇنى بولعان. ول جەرگە قۇرامىندا 15 ادام بار تەاتر ترۋپپاسى مەن وبلىستىق فيلارمونيا ارتىستەرى بارعان. ارتىستەر ءىس-ساپار ەكەن دەپ، تاڭعى ساعات 07:00-دە جولعا شىققان. نەگىزگى جۇرىلەتىن قاشىقتىق 55 شاقىرىم بولعانىمەن، ونەرپازدار ءتۇن جارىمدا ءبىراق ۇيگە ورالعان. ال اكىم مىرزالاردىڭ پاتشا كوڭىلدەرى ونەرپازداردىڭ ونەر تاماشالاۋى ءۇشىن ءتۇن جارىمدى كۇتتىرگەن»،-دەيدى ءارتىستىڭ اعاسى.

تەاتر ارتىستەرى ساۋناداعى شەنەۋنىكتەردىڭ شەكتەن شىققان ارەكەتتەرى تۋرالى قۇزىرلى ورگاندارعا مالىمدەۋگە بەل بۋعانىمەن، ءوز قىزمەتتەرىنەن ايىرىلىپ قالۋدان قورقاتىنى دا راس ەكەندىكتەرىن جاسىرمايدى.

جوعارىداعى مالىمەتتەردى ساراپتاي كەلە تۇيگەن ءتۇيىنىمىز - ساۋناداعى «شەنەۋنىكتەر شوۋى» اكىم مىرزالاردىڭ انشەيىنگى ەركەلىگى مە، الدە تەاتر ارتىستەرى اتقارۋعا ءتيىس قالىپتى جۇمىس نورماسى ما؟..

ەستەرىڭىزدە بولسا، ويىن-ساۋىقتى جانى سۇيەتىن پاۆلودار وبلىسىنىڭ «ەركەلىگىن» اقوردا كەشىرمەپ ەدى عوي. قىلمىستىق ءىس قوزعاپ، قۋدالاۋعا تۇسكەن اكىم سوندا دا كىناسىن مويىنداۋدان باس تارتقان. ءيا، ءبىر كىسى تاققا مىنسە، قىرىق كىسى اتقا مىنەدى دەگەندى وسى جولى اكىم مىرزالار ءجۇز پايىزعا دالەلدەپ بەرگەندەي بولدى. ءۇش وبلىستىڭ اكىمدەرى  دەمالادىنى ەستىگەن قولشوقپارلار، جاندايشاپتار ارتىستەردى ابدەن ابىگەرگە سالعانى تۇسىنىكتى بولدى... سەرگەي كۋلاگين مەن ونىڭ قۇرمەتتى قوناقتارىنىڭ وسى ءبىر ارەكەتتەرى  بەينە ءبىر سويىس مالى مەن ساۋىن بيەلەرىن، انشى-بيشىلەرى مەن نوكەرلەرىن ەرتىپ جۇرەتىن باعزى زاماننىڭ بايلارىنان كەم تۇسپەسە كەرەك-تى. الدە مەملەكەتتىك تىلدەن گورى رەسمي ءتىلدىڭ مىسى باسىم وبلىستار ءۇشىن اكىم مىرزالارعا ايرىقشا ەرىك بەرىلگەن بە؟ قالاي بولعان كۇندە دە، ماسەلەمەن قۇزىرلى ورگاندار اينالىسىپ، تەرگەۋ جۇمىستارى جۇرگىزىلۋى  ءتيىس ەدى. الايدا بىزدەگى قالىپتاسقان جۇيە بويىنشا «كوماندا مۇشەلەرى» بىر-بىرلەرىن ساتپاعان... ال «كوماندالىق» جۇيەمەن جۇمىس جۇرگىزەتىن ساۋىقشىل اكىمدەردىڭ تىزگىن ۇستاپ تۇرعان داۋرەنىندە قاراپايىم ارتىستەر مەن انشى-بيشىلەردىڭ كورەتىن كۇندەرى وسى دا. «اقساقال بيلىكتىڭ» كىشى شەنەۋنىكتەرى كىمگە ارقا سۇيەپ، وسىنداي ارەكەتكە بارۋى مۇمكىن؟ بۇل ەركەلىك ەمەس – كۇش كورسەتۋ. ونەردى قورلاۋ، ونەرپازداردى مازاققا اينالدىرۋ ەمەس پە؟ مادەنيەتتى مونشادا قورلاعان اكىمدەر ءتيىستى جازالارىن الۋى ءتيىس!

تابانىنىڭ ءبۇرى جوق اكىمدەردەن نە ءۇمىت، نە قايىر؟!

نۇرگەلدى ءابدىعاني ۇلى