الماتى. قامشى پورتالى - بالالاردى مەكتەپكە دەيىنگى تاربيە مەن وقىتۋ بويىنشا ەلباسى 2020 جىلى بالالاردى 100 پايىزعا قامتۋ جونىندە تاپسىرما بەرگەن بولاتىن. وسى تاپسىرما تۇلكىباس اۋدانىندا ورىندالىپ وتىر.

ويتكەنى اۋداندا «بالاپان» باعدارلاماسى اياسىندا 3-6 جاس ارالىعىنداعى بالالاردى قامتۋ وتكەن جىلى 76،6 پايىزدى قۇراسا، بيىلعى جىلى بۇل كورسەتكىش 93 پايىزدى قۇراپ وتىر. ارينە بۇل قۋانتارلىق جاعداي. الەۋمەتتىك ماسەلەلەر وڭ شەشىمىن تاپقان اۋدانداعى شالعاي ورنالاسقان ەلدى-مەكەندەردە بالاباقشالار اشىلىپ، جاڭا ءبىلىم وشاقتارى بالالارعا ەسىگىن ايقارا اشپاق. 

سونداي ءوڭىردىڭ ءبىرى رىسقۇلوۆ اۋىلدىق وكرۋگىنە قاراستى جاڭاتالاپ اۋىلىندا 150 ورىندىق مەكتەپتىڭ قۇرىلىسى جىل سوڭىنا دەيىن پايدالانۋعا بەرىلۋ جوسپارلانسا، ەندى مىنە اۋىلدا 100 ورىندىق «قاراقات» بالاباقشاسى ەل يگىلىگىنە بەرىلىپ وتىر. الەۋمەتتىك نىسان «بالاپان» باعدارلاماسى بويىنشا مەملەكەت پەن جەكەمەنشىك ارىپتەستىگى نەگىزىندە ىسكە قوسىلىپ وتىر. اتالعان بالاباقشاعا جاڭاتالاپ، جىلاندى، قاراباستاۋ اۋىلىنىڭ بۇلدىرشىندەرى قامتىلcا، 22 ازامات جۇمىسقا ورنالاستى. 

وسى كۇنى جاسكەشۋ اۋىلىندا جاڭا 100 ورىندىق بالاباقشا پايدالانۋعا بەرىلدى. 5500-گە جۋىق حالقى بار جاسكەشۋ اۋىلىندا بۇل 3ء-شى بالاباقشا بولىپ وتىر. حالىق سانى جىل سايىن ءوسىپ كەلە جاتقان اۋىلدا جاڭا بالاباقشاعا 25 ادام تۇراقتى جۇمىسقا تارتىلىپ وتىر. اتالعان بالاباقشالاردا ويىن الاڭدارى، جاتىن بولمەلەر، وقۋ سىنىپتارى، بەينەلەۋ ونەرى زالدارى زاماناۋي تالاپتارعا ساي جابدىقتالعان. جاڭا بالاباقشالاردىڭ اشىلۋىندا اۋدان اكىمى ق.ابدۋالييەۆ ءسوز سويلەپ، بۇگىنگى كۇنگە دەيىن ءاربىر اۋىلدىڭ ورتالىق اۋىلدارىنا ەرەكشە كوڭىل ءبولىنىپ كەلسە، ەندى شالعاي ورنالاسقان ەلدى مەكەندەردىڭ ىشكى كوشەلەرى جوندەلىپ، مەكتەپتەر مەن بالاباقشالار، سپورت الاڭشالارى جانە ساياباقتار اشىلىپ وتىرعاندىعىن ايتتى. سونداي-اق، جىل سوڭىنا دەيىن اۋداندا تاعى 3 بالاباقشا اشىلۋ جوسپارلانۋدا، دەپ حابارلايدى وقو اكىمىنىڭ باسپا ءسوز قىزمەتىنەن. 

دەرەككوزى: قازاقپارات