«استانا ەكسپو-2017» كومپانياسىنداعى جەمقورلىق ءىسى بويىنشا سوتتان بۇرىنعى تەكسەرۋ جۇمىستارى اياقتالدى. بۇل تۋرالى ق ر مەملەكەتتىك قىزمەت جانە جەمقورلىققا قارسى كۇرەس اگەنتتىگىنىڭ ءتوراعاسى قايرات قوجامجاروۆ پارلامەنتتىڭ تومەنگە پالاتاسى وكىلدەرىمەن كەزدەسۋىندە مالىمدەگەن.  بۇل تۋرالى «قامشى» پورتالى informburo.kz سايتىنا سىلتەمە جاساي وتىرىپ حابارلايدى.

«استانا ەكسپو-2017» ۇلتتىق كومپانياسىنداعى جەمقورلىق ءىسى بويىنشا كۇدىكتىلەرگە قاتىستى تەرگەۋ جۇمىستارى اياقتالعان. ءقازىر اتالمىش ءىس بويىنشا ايىپتالۋشىلاردى قىلمىستىق ءىس ماتەريالدارىمەن تانىستىرۋ پروسەدۋرالارى جۇرگىزىلۋدە. اگەنتتىك ءتوراعاسى قايرات قوجامجاروۆتىڭ ايتۋىنشا، ءدال «ەكسپو-2017» ءىسى بويىنشا 24 ادام جاۋاپقا تارتىلۋى مۇمكىن.

جەمقورلىقپەن كۇرەس اگەنتتىگىنىڭ ءتوراعاسى ايتقان اقپاراتتارعا سۇيەنسەك، «استانا ەكسپو-2017» ۇلتتىق كومپانياسىنداعى ەكس-قىزمەتكەرلەرگە «مەملەكەتتەن بولىنگەن  قاراجاتتان 10 ميلليارد تەڭگەنى تالان-تاراجىعا تۇسىرگەن» دەگەن كۇدىك كەلتىرىلۋدە.

قايرات قوجامجاروۆ، مەملەكەتتىك قىزمەت جانە جەمقورلىقپەن كۇرەس اگەنتتىگىنىڭ ءتوراعاسى:

-قولدى بولعان قارجىنىڭ جالپى سوماسى 10 ميلليارد 200 ميلليون تەڭگەنى قۇراپ وتىر. ونىڭ ىشىندە جەكە ەرمەگيايەۆ مىرزانىڭ ءوزى 4 ميلليارد 200 ميلليوندى زاڭسىز يەمدەنگەندىگى دالەلدەندى. سونداي-اق، زاڭسىز جولمەن قولدى بولعان اقشاعا ءقوناقۇي جانە اۆتو كولىك ساتىپ الىنعاندىعى دا انىقتالدى. بۇل «ەكسپو»-عا بولىنگەن قاراجاتقا ساتىپ الىنعان اكتيۆتەردەن وزگەسى دە جەتەرلىك. ءتۇرعىنۇي، اۆتوكولىك، ءقوناقۇي كەشەندەرى ت.ب.

ال، 13-ماۋسىمدا «استانا ەكسپو-2017» ۇلتتىق كومپانياسى اق ەكس-باسشىسى تالعات ەرمەگيايەۆ پەن ونىڭ كومەكشىلەرى اسا ءىرى كولەمدە پارا الدى جانە بيۋدجەت قارجىسىن تالان-تاراجعا سالدى دەگەن ايىپ بويىنشا ءۇيقاماققا الانعان بولاتىن.

سونداي-اق، «استانا ەكسپو-2017» قۇرىلىس دەپارتامەنتىنىڭ ەكس-باسشىسى قاجىمۇرات ۇسەنوۆ تە ەرمەگيايەۆپەن بىرلەسكەنى ءۇشىن ءۇيقاماققا الىنعان.

كەيىنىرەك، قۇقىق قورعاۋ ورگاندارى ماماندارى «ەكسپو ءىسىنىڭ» ءۇشىنشى فيگۋرانتى رەتىندە كومپانيانىڭ اتقارۋشى ديرەكتورلارىنىڭ ءبىرى سۋلامبەك باركينحويەۆتى دا قاماۋعا العاندىعى تۋرالى وسىعان دەيىن جازعان بولاتىنبىز.

اتاۋى عانا وزگەرگەن، ءبىراق جەمقورلىقپەن كۇرەسەتىن قايرات  قوجامجاروۆ مىرزا ءدال وسىدان ءبىر جىل بۇرىن ءىرى تۇتقىنداۋلار ابدىشيەۆپەن اياقتالمايتىنى تۋرالى ەمەۋرىن تانىتقانى ەسىڭىزدە بولار. سول ءسوزى راسقا اينالۋدا بۇگىندە.

كەزىندە اتىنان ات ۇركەتىن ءقازىر تاراپ كەتكەن قارجى پوليسياسىن باسقارعان قايرات قوجامجاروۆ جەمقورلارمەن بەل شەشە كۇرەسۋدە. قاۋىپسىزدىك كەڭەسىنىڭ حاتشىلىعىنان كەيىن اتاۋى عانا وزگەرگەن اگەنتتىككە ەكىنشى رەت باسشى بولىپ تاعايىندالعان قوجامجاروۆتىڭ قارقىنى قاتتى. ماجىلىسكە كەلگەن ول بيۋدجەت اقشاسىن ۇرلاپ، پارا الۋعا دانىككەن ارىپتەستەرىمەن قالاي كۇرەسەتىنىن تۇسىندىرگەنى دە ەسىمىزدە. ايتپاقشى ايتىپ ەدى عوي، قوجامجاروۆ مىرزا، «جاڭا باستىق كەلسە، ول ءوزىنىڭ كومانداسىن بىرگە الىپ كەلەدى.  ولار مۇنى تەك ءبىر عانا سەبەپپەن ىستەيدى. قىلمىس جاساۋ ءۇشىن جانە سول قىلمىسىن اشكەرەلەمەۋ ءۇشىن. باسقالاي بولۋى مۇمكىن ەمەس!»،-دەپ.  قالاي ايتقان، ءا؟

دەسە دە، قازاقستاندىقتاردىڭ اراسىندا «ەرمەگيايەۆكە قاستاندىق جاسالعان»، «ونى ادەيى ارانداتىپ جىبەردى»، «ەرمەگيايەۆ بولىسپەي قويعان عوي» دەگەن سىبىستار دا جوق ەمەس. سوندا بيلىكتىڭ كوزىنە «جەمقور» بولىپ، ال حالىقتىڭ كوزىندە «التىن كورىپ جولدان تايعان پەرىشتە» وبرازىنداعى ەرمەگيايەۆ شىنىمەن پاراقور ما؟ الدە... جەمقورلىقپەن كۇرەس اگەنتتىگى باسشىسى قايرات قوجامجاروۆ مىرزانىڭ ءوزى ايتتى، « بارلىعى دالەلدەندى» دەپ. «اقساقال بيلىك» قالىپتاستىرعان «كوماندالىق جۇيەگە» اشىق قارسى شىعا الاتىن قوجامجاروۆتىڭ سوزىنەن كەيىن الىپ-قوسارىمىز بولماس. ەرمەگيايەۆ كومانداسىنىڭ قىلمىستىق ىسىنە قاتىستى تەرگەۋ ناتيجەلەرى بەلگىلى بولدى. ەندى حالىق اۋزىندا ايتىلىپ جۇرگەندەي «پودستاۆا» قۇربانى بولعان  تالعات ەرمەگيايەۆ قانداي ءۋاج ايتادى دەگەن سۇراق قالدى. وسى تۇستا ەسكەرە كەتكەنىمىز تاعى ءجون بولار. قۇتىلعاندار مەن تۇتىلعاندار تۋرالى قيسسانىڭ ءبىرىنشى ءبولىمى وسىلاي اياقتالۋعا جاقىن. احمەتوۆ، ابدىشيەۆ، ەرمەگيايەۆ  – قارىشتاپ دامىعىسى كەلەتىن قازاقستاننىڭ كوررۋپسيا دەيتىن «كەسەلىن» جۇقتىرعاندار ما؟

ەلباسىنا سەرت بەرىپ، سەنىمىن اقتاماعاندار تۋرالى وسىنىڭ الدىندا دا جازعان بولاتىنبىز.

ەسكە تۇسىرە كەتەيىكشى، احمەتوۆ ۇستالعاندا «ەشتەڭە ايتپايمىن. كىنالى بولسام قاماڭدار» دەدى.  ابدىشيەۆ مىرزا تۇتىلعاندا «كوررۋپسيانى ەشكىم جەڭگەن ەمەس» دەگەن. ەرلان ارىن شە؟ «ەلباسىنان كەشىرىم سۇرايمىن» دەپ ەدى عوي. ەندى ەرمەگيايەۆ نە دەيدى ەكەن؟

نۇرگەلدى ءابدىعاني ۇلى