سوڭعى ديەۆالۆاسيادان كەيىن 1 دوللاردىڭ باعاسى – 300 تەڭگەگە كوتەرىلدى. حالىق جاپپاي ايىرباس ورىندارىنىڭ تابىلدىرىعىن تورۋىلداپ، قايتسەك پايدا كورىپ قالامىزدىڭ قامىنا كوشتى. ادەتتەگىدەي ۇكىمەت پەن ۇلتتىق بانكتىڭ الدىندا ەرەۋىلگە شىعىپ، نارازىلىق شارالارىن ۇيىمداستىرعان دا جوق. وعان مۇمكىندىك تە جوق. ويتكەنى ، دەدوللاريزاسيالانۋ جوباسى –دەدەموكراتيزاسيانى كۇشەيتكەنى جاسىرىن ەمەس.
ال تاۋەلسىزدىك العان شيرەك عاسىردا تەڭگە ءوز ەركىنەن تىس 40 رەت قۇنسىزدانعان.
ۇكىمەت پەن ۇلتتىق بانكتىڭ تەڭگەنى ەركىن اينالىمعا جىبەرۋى حالىق پەن بيلىكتىڭ اراسىن الشاقتاتا تۇسكەنى بەلگىلى. كەلىمبەتوۆتىڭ قات-قابات جالعان مالىمەتتەرىنەن كەيىن حالىق ءوز بيلىگىنە سەنبەيتىنىن مينيستر مىرزالاردىڭ وزدەرى دە مويىنداعان. مويىنداماسقا شارالارى قالدى ما؟! قازاقستاننىڭ قازىرگى بيلىگى قوعامدىق پروسەستەرگە قاتىستى حالىق الدىنداعى ءوزىنىڭ ستراتەگيالىق ىقپالىن جوعالتا باستاعانى تۋرالى وسىنىڭ الدىندا دا جازعان بولاتىنبىز.
ءماسىموۆ ۇكىمەتى مەن كەلىمبەتوۆ مىرزالار ەندىگى جەردە دوللاردى ۇستاپ تۇرا المايتىندىقتارىن ايتىپ، تەڭگەنى ەركىن اينالىمعا جىبەرگەن بولاتىن. ءتىپتى تەڭگەنى ۇستاپ تۇرۋ ءۇشىن قازىنادان 28 ميلليارد شىعىنداۋعا ءماجبۇر بولدىق دەگەن ەدى. دەموگوگ باسلىشاردىڭ بۇل باجايلاۋىنا مەملەكەت باسشىسى دا ءوز ءۇنىن قوسىپ، ءماسىموۆتى قولداعان بولاتىن. وسىدان كەيىن-اق، تەڭگەنىڭ اۋەلگى باعاسى ودان سايىن قۇلدىراپ كەتكەن. باستاپقىدا قۇنسىزدانۋ 30 پايىزدى قۇراعانىمەن، سوڭعى 1 ايدىڭ ىشىندە بۇل كورسەتكىش 50 پايىزعا جەتكەن.
اقىرى قولىنان تۇك كەلمەيتىنىن تاعى ءبىر مارتە جاسىرىپ قالۋعا تىرىستى ما، ايتەۋىر كەلىمبەتوۆ مىرزا «قاھارمان» ءرولىن سومداۋعا كىرىستى.
بۇگىن ۇلتتىق بانك تەڭگە باعامىن رەتتەيتىنىن مالىمدەدى. ءبىراق، ۇلتتىق بانك تەڭگەنىڭ ايىرباستاۋ باعامىنىڭ نارىقتىق دەڭگەيىنىڭ قالىپتاسۋىنا ارالاسپايدى، تەك ەلدىڭ قارجى جۇيەسىنىڭ تۇراقتىلىعىن قامتاماسىز ەتۋ قاجەت بولعان جاعدايدا، ۆاليۋتالىق وكتەمدىكتەردى جۇرگىزۋ جولىمەن ىشكى ۆاليۋتا نارىعىنا قاتىسۋعا مۇمكىندىگى بار. دەسەدە، جاعدايدى مۇنداي جولمەن رەتتەۋ- ماسەلەنى ۋاقىتشا عانا شەشەتىندىگىنە كوزىمىز جەتكەن. دەمەك، بۇل داعدارىستان قۇتقاراتىن جول ەمەس.
ءسويتىپ، بۇگىن «قاھارمان» ۇلتتىق بانك ارالاسقاننان كەيىن دوللار 30 تەڭگەگە ارزاندادى.
ۇب ينتەرۆەنسيا جۇرگىزۋگە شەشىم قابىلداعاننان كەيىن دوللار باعاسى 270،11 تەڭگەگە دەيىن تومەندەدى. بۇل تۋرالى «قامشى» پورتالى Tengrinews.kz-كە سىلتەمە جاساي وتىرىپ حابارلايدى.
17 قىركۇيەك كۇنى تاڭەرتەڭ جاسالعان ساۋدا 275 تەڭگەمەن باستالدى، ەڭ جوعارى باعا دا وسى. ال ەڭ تومەنگى باعا 268،1 تەڭگەگە تەڭ بولدى. ساۋدانىڭ جالپى كولەمى 233،5 ميلليون دوللاردان استى. بارلىعى 24 قاتىسۋشى بولدى.
وسىدان ءدال ءبىر اي بۇرىن قازاقستان پرەزيدەنتى نۇرسۇلتان نازاربايەۆ قارجىلىق قيىندىقتىڭ قازاقستاندى قوس بۇيىردەن قىسقالى تۇرعاندىعىن ايتىپ، ەكونوميكالىق داعدارىستىڭ كەلە جاتقاندىعىن ەسكەرتكەندە – قازاققا مىقتى «اقساقال بيلىكتىڭ» ءماسىموۆ پەن كەلىمبەتوۆكە ءتىسى باتپايدى دەدىك. سەبەبى تەڭگەنىڭ قۇنسىزدانۋى مەن دوللار باعاسىنىڭ كۇرت شارىقتاۋى – ءبىرىنشى كەزەكتە قاراپايىم حالىقتىڭ قالتاسىنا سالماق سالدى. اسىرەسە، يپوتەكاعا جانە نەسيەگە تۇرعىن ۇيلەر مەن مۇلىك العاندار 40 پايىزدىق ۇستەماقى تولەۋگە ءماجبۇرلى بولىپ قالدى. جوعارىداعى جايتتاردى ەسكەرە كەلە، ءبىر ەمەس، بىرنەشە مارتە حالىقتى الداپ سوققان الاياقتار جازاسىز قالماۋى ءتيىس دەپ توپشىلادىق.
تەڭگەنىڭ قۇلدىراۋى جىلجىمايتىن مۇلىك نارىعىنا دا تەرىس اسەر ەتكەنى بەلگىلى. ءبىراق رەسەيلىك ەكونوميست-ساراپشىلار «قازاقستان سانالى تۇردە ديەۆالۆاسيا جاساپ وتىرعان جالعىز مەملەكەت ەمەس» دەپ سەندىردى. ءيا، قازاقستانداعى قارجى جۇيەسى ءوز كەزەگىندە رەسەيدەگى سيتۋاسيالاردىڭ كوشىرمەسى سەكىلدى كورىنەتىنى دە جاسىرىن ەمەس.
ءتۇيىن: ۇلتتىق بانك تەڭگە باعامىن قاشانعا دەيىن ۇستاپ تۇرا الادى؟ ول ءۇشىن تاعى قانشا ميلليارد جۇمساۋى ءتيىس؟ كەلىمبەتوۆكە تاعى ءبىر مارتە سەنەمىز بە؟ الدە ءوزىمىزدى-وزىىز الداپ جۇرە بەرەمىز بە؟
نۇرگەلدى ءابدىعاني ۇلى
