كەشە اتىراۋدا وتكەن جيىندا ەلباسى «قازاقستاندا جاسالعان» دەگەن ماركاعا نازار اۋدارۋ كەرەكتىگىن ەسكەتتى. اتىراۋ، اقتوبە، ماڭعىستاۋ، باتىس قازاقستان وبلىستارىنىڭ اكىمدەرىنە جەڭىل ونەركاسىپتى دامىتۋعا كەڭەس بەردى. پرەزيدەنت قازاقستاندىق كيىمدەردىڭ شەتەلدىكىنەن ەش كەم تۇسپەيتىنىن تىلگە تيەك ەتتى. سونىمەن قاتار، وتاندىق كيىمدى ينۆەستيسيالار جانە دامۋ ءمينيسترى اسەت يسەكەشيەۆ كيىپ جۇرەتىنىن وزگەلەرگە ۇلگى ەتىپ كورستتى. شىنىندا دا ءبىزدىڭ سايدىڭ تاسىنداي ەتىپ سايلاپ قويعان قالاۋلىلارىمىز بەن مينيسترلىكتەگىلەردىڭ بارالىعى ەلىمىزدە تىگىلگەن كيىم كيەتىن بولسا، قازاقستاندىق برەند جاساپ شىعۋعا بولادى. كاسىپتىڭ ەڭ نەگىزگى قوزعاۋشى كۇشى-جارناما. ءوز سوزىندە نازاربايەۆ: «قازاقساندىق ونىمدەرىڭ جارناماشىسىمىن»،-دەپ ايتىپ ءوتتى. ەندى وسى تۇستا، نازاربايەۆ وتانىمىزدا تىگىلگەن كيىمدى عانا كيەدى ەكەن دەپ بارلىعى قازاقستاندىق ءونىمدى قولداۋعا كىرىسىپ كەتە مە؟ البەتتە جوق. سەبەبى ءبىزدىڭ حالىقتى تولىقتاي كيىممەن قامتاماسىز ەتە الاتىن ۇلتتىق برەند ءالى قالىپتاسپاعان. تەك، ءىشىنارا ۇلتتىق برەندكە بەرىلگەن ادامدار وزدەرى ىزدەپ تاۋىپ جۇرگەن ءيميدجى قالىپتاسپاعان كاسىپورىندار عانا بار. ونىڭ ۇسىنە ۇلتتىق ءونىم دەگەندە ءبىز ەڭ نەگىزگى ماسەلەنى اجىراتىپ الۋعا ءتيىسپىز. ماتا تۋرسيادان شىعىپ، كيىم وسى جەردە تىگىلسە، ول قازاقستاندىق پا، الەدە تۇرىكتەردىڭ ءونىمى بولا ما؟ ارينە قازاقستاندىكى بولادى. سەبەبى، ول وزگە ەلدە جاي عانا ماتا بولعان، ال ءبىزدىڭ ەلدە ديزاينى قالىپتاسقان كاپ-كادىمگى كيىمگە اينالدى. ءبىراق ءبىز ونى تۇتىنۋشىعا ۇسىنعاندا كيىمنىڭ تىگىلگەن وتانىن ەمەس، ماتاسىنىڭ شىققان جەرىن اتاعاندى قۇپ كورەمىز. سەبەبى تۇتىنۋ پسيحولوگياسى سولاي قالىپتاسقان. تۋرسيا دەسە الۋعا بولادى. قازاقستان دەسە، كەۋدەمىزگە كۇمان مەن سەنىمسىزدىك ورنايدى. الايدا، كيىم وندىرەتىن كاسىپورىن ەلباسى مىسالعا كەلتىرگەندەي، پرەزيدەنتكە كيىم تىككەنىن جارناما رەتىندە پايدالانسا، جاعداي وزگەرۋى بەك مۇمكىن. انىعىندا قازاقستاندىق ءونىمدى تۇتىنۋعا ەل تۇرعىندارىنىڭ ەشقايسىسى قارسى ەمەس. «قازاقستاندا جاسالعان» دەگەن كيىمدى ماقتانىشپەن كيىپ جۇرگىمىز كەلەدى. ءبىزدىڭ دە پرەزيدەنتىمىز سەكىلدى ماقتانىپ وتىرعىمىز –اق كەلەدى. ءبىراق قايدان، قالاي الۋعا بولاتىنىن ءبىز بىلمەيمىز. جەڭىل ونەركاسىپ يەلەرىنە قولداۋ قاجەت. اسىرەسە، ۇلتتىق ءونىمىمىزدى جارنامالاۋعا بيلىك تۇرعىسىنان مۇددە قاجەت. الدىمەن ماتانى سىرتتان تاسىپ، ودان سوڭ وزىمىزدە وندىرۋگە ارەكەت جاساۋ ءلازىم. كيىم ونەركاسىبىن دامىتۋ ءۇشىن ماتانى بىلاي ىسىرعاندا، ءجىپ پەن ينەگە دەيىن وزىمىزدەن شىققانى دۇرىس. ءجىپتى ءبىر ەلدەن، ينەنى تاعى ءبىر شەتەلدەن، ماتانى مۇحيتتىڭ ارعى جاعىنان تاسىعان كيىم ونەركاسىبىنىڭ نە ءمانىسى بار؟
اينۇر تولەۋ
