"يرينا كاي̆راتوۆنا" مۋزىكالىق توبى instagram پاراقشاسىندا جاڭا مۋزىكالىق ۆيدەو تيزەرىن جاريالادى. جەلىدەگى جازبادا بەينەبايان ەلوردا كۇنى مەن قازاقستان تۇڭعىش پرەزيدەنتىنىڭ تۋعان كۇنى – 6 شىلدەدە شىعاتىنى حابارلانعان.
ۆيدەودا كوستيۋم-شالبار كيگەن ەر ادامدار مەن جارتىلاي جالاڭاش ءبيلىپ جۇرگەن قىزداردىڭ الدىندا كرەسلودا موينىنا التىن القا تاعىنعان حالاتتاعى ەر ادامنىڭ ريزا بولىپ وتىرعانى بەينەلەنگەن.
جەلى قولدانۋشىلارى جازبا استىنا ءتۇرلى پىكىر قالدىرىپ جاتىر. ءبىرى "توپ كەزەكتى بومبا دايىنداپ قويعانىن" جازسا، كەيبىرى "كەزەكتى رەت جوعارىداعىلاردى (شەنەۋنىكتەر - رەد) كەلەمەجدەيتىن ۆيدەو شىعار" دەپ توپشىلايدى. ال كەي قولدانۋشىلار ۆيدەونى "نازاربايەۆتىڭ تۋعان كۇنىنە جاسالعان سىيلىق" دەپ جازعان.
پوسموترەت ەتۋ پۋبليكاسيۋ ۆ Instagram
"يرينا كاي̆راتوۆنا" قازاقشا، ورىسشا ارالاستىرىپ ءان جازاتىن، youtube جەلىسىنە ارنالعان ساتيرالىق جوبالار جاسايتىن شىعارماشىلىق توپ. ولار اندەرى مەن جوبالارىندا ەلدەگى جەمقورلىق، كوزبوياۋشىلىق، وتباسىلىق زورلىق-زومبىلىق سياقتى ساياسي، الەۋمەتتىك تاقىرىپتاردى، قوعامدا قىزۋ تالقىلاناتىن ماسەلەلەردى قوزعايدى. توپ رەجيسسەرى – قۋانىش بەيسەكەيەۆ. ۆيدەولارداعى اشىق تا استارلى كورىنىستەردى نەگىزىنەن قۋانىش بەيسەكەيەۆ ويلاپ تابادى.
2020 جىلدىڭ سوڭىندا شىققان "5000" دەپ اتالاتىن كليپ قوعامدا قىزۋ تالقىلانىپ، جىلى قابىلداندى. مۋزىكالىق ۆيدەودا 1937-1938 جىلدارداعى ساياسي رەپرەسسيا، جاۋگەرشىلىك سوعىستاردا قازاق حالقىنىڭ قىرىلعانى، ساياسي ولىمدەر، ەلورداداعى LRT قۇرىلىسى، بىلتىر شىلدەدە ەپيدەميولوگيالىق احۋال اسقىنىپ، ادامدار كوروناۆيرۋستان كوپتەپ قايتىس بولىپ جاتقاندا استانا كۇنىندە قالا اكىمشىلىگىنىڭ ساليۋت ۇيىمداستىرعانى سەكىلدى وقيعالاردىڭ ەلەمەنتتەرى كورسەتىلگەن. ۆيدەو بۇگىندە 27 ميلليونعا جۋىق قارالىم جيناعان. 437 مىڭ قولدانۋشى لايك، 10 مىڭ قولدانۋشى ديزلايك باسقان. 60 مىڭعا جۋىق كوممەنت جازىلعان.
ءبىر جارىم اي بۇرىن توپتىڭ رەسەيلىك جۋرناليست يۋريي دۋدكە بەرگەن سۇحباتى جاريالاندى. 2 ساعاتقا جۋىق ۋاقىتقا سوزىلاتىن سۇحبات نەگىزىنەن توپ شىعارماشىلىعى، ولاردىڭ قازاقستان قوعامىنداعى جاعدايلارعا بەينەباياندارى ارقىلى كوزقاراس ءبىلدىرۋى، قازاق حالقىنىڭ مەنتاليتەتى تۋرالى ءوربيدى.
سۇحباتتىڭ 33 مينۋتىندا توپ رەجيسسەرى قازاقستانداعى جەمقورلىق، بيۋدجەت قاراجاتىن جىمقىرۋ دەرەكتەرى تۋرالى ايتادى.
– قازاقستاندا وتە ءجيى جىمقىرادى. بۇل ەلدەگى باستى ماسەلەلەردىڭ ءبىرى. ۇرلايتىن ادامدا "ۇرلاۋ - جامان ارەكەت" دەگەن مورالدىق پرينسيپ بولمايدى. ونداي ادامدار دامىمايدى، ولار كەلەسى ۇرپاق تۋرالى ويلامايدى، ەلدىڭ دامۋى تۋرالى باسىن قاتىرمايدى. مۇنداي ادامدار اقىرىنا دەيىن ءوزىنىڭ بيلىگىن ساقتاپ قالۋعا تىرىسادى. ويتكەنى ولار ءۇشىن بيلىك اقشا تابۋدىڭ وڭاي جولى بولىپ كەتكەن. مۇنداي ادامدا بيلىكتە وتىرعاندا، ماڭىنا ناعىز كوشباسشىلاردى، ەمەس، وزىنە ادال ادامداردى جينايدى. ايتالىق، اكىم مىقتى ساياساتتانۋشى، توپ-مەنەدجەر بولعانى ءۇشىن ەمەس، بيلىككە ادال بولعانى ءۇشىن عانا ورىنتاعىندا وتىر. بۇل ولار ءۇشىن وتە ماڭىزدى. بيلىكتەگى تىزبەك وسىندايلاردان قۇرالعان. ال مۇنداي ۇكىمەتتە دامۋ بولمايدى، – دەيدى قۋانىش بەيسەكەيەۆ.
رەجيسسەر سونداي-اق قازاقستاننىڭ تۇڭعىش پرەزيدەنتى نۇرسۇلتان نازاربايەۆ ساياساتىنا سىني كوزبەن قارايتىنىن جاسىرمايدى.
پىكىر قالدىرۋ