Aتىراۋدا كەشە «ازاماتتىق باستاما» قوزعالىسى بەلسەندىلەرىنىڭ ۇيىمداستىرۋىمەن كوممۋنالدىق تاريفتەردىڭ وسۋىنە جانە ايماقتاعى ەكولوگيالىق جاعدايدىڭ ناشارلاۋىنا بايلانىستى نارازىلىق اكسياسى ۇيىمداستىرىلعان. بۇل تۋرالى «قامشى» پورتالى ازاتتىققا سىلتەمە جاساي وتىرىپ حابارلايدى.

اتىراۋ تۇرعىندارى بۇگىنگى ميتينگكە «تازا اتىراۋ ءۇشىن!»، «ءتاريفتى وسىرمە!»، «تاريف وسكەندە حالىق كۇيزەلەدى، بيلىكتىڭ ارانى اشىلا بەرەدى، زاڭ جۇمىس ىستەمەيدى»، «مەن اكىمدەر جالاقى الۋ ءۇشىن سالىق تولەيمىن»، «اكىم باقتىقوجا ىزمۇحامبەتوۆ، ءتاريفتى اۋىزدىقتاي الماساڭ، جالاقى الما!» دەگەن جازۋلار ۇستاپ شىققان.

بۇل تۋرالى «ازاتتىققا» ميتينگ ۇيىمداستىرۋشىلارىنىڭ ءبىرى - «ارلان» قوعامدىق بىرلەستىگىنىڭ جەتەكشىسى ماكس بوقايەۆ حابارلاعان.

قوعامدىق بىرلەستىك جەتەكشىسى ماكس بوقايەۆتىڭ ايتۋىنشا، جيىندى ۇيىمداستىرۋداعى باستى ماقسات – ايماقتا قوردالانعان الەۋمەتتىك، ەكولوگيالىق جانە ەكونوميكالىق كۇردەلى پروبلەمالارعا مەملەكەتتىك ورگانداردىڭ نازارىن اۋدارۋ.

ماكس بوقايەۆ، «ارلان» قوعامدىق بىرلەستىگىنىڭ جەتەكشىسى:

– اسىرەسە سوڭعى كەزدە كوممۋنالدىق قىزمەت تۇرلەرى باعاسىنىڭ قىمباتتاۋى مەن قورشاعان ورتانىڭ جاعدايى تۇرعىنداردى الاڭداتادى، بيلىك بۇل ماسەلەلەردە حالىقتىڭ پىكىرىن ەسكەرمەي وتىر. ءبىز بيلىكتەن ايماققا قاتىستى شەشىمدەردى قوعامنىڭ پىكىرىن ەسكەرىپ قابىلداۋدى تالاپ ەتتىك. ميتينگ رەزوليۋسياسى ءتيىستى ورگاندارعا جىبەرىلەدى

ميتينگكە قاتىسۋشىلار بيلىكتەن مەكتەپتە بالالاردى تەگىن تاماقپەن قامتاماسىز ەتۋدى، تابيعات قورعاۋ زاڭىن بۇزعاندارى ءۇشىن كومپانيالاردان تۇسكەن ايىپپۇلداردى ايماقتىڭ ەكولوگياسىن جاقساتۋعا قالدىرۋدى تالاپ ەتكەن. سونىمەن بىرگە، كاسىپكەرلەر پايدالانىلعان گاز ءۇشىن وزدەرىنەن مونوپوليست مەكەمەنىڭ الدىن الا تولەم سۇراماۋى تۋرالى بيلىككە ۇسىنىس بىلدىرگەن.

بەلسەندى ءبىر جارىم ساعاتقا جالعاسقان ميتينگكە جۇزدەن اسا ادام قاتىسقانىن حابارلاعان.