ۇلىق مەرەكە -قۇربان ايتقا بىرەر كۇن قالدى. وسىعان وراي باس ءمۇفتي الەۋمەتتىك جەلى پايدالاناتىن مۇسىلماندارعا سويىلعان مالدىڭ قاسىندا تۇرىپ سەلفي جاساماۋىن ءوتىندى. بۇل تۋرالى «قامشى» پورتالى  كتك ارناسىنا سىلتەمە جاساي وتىرىپ حابارلايدى.

ەستەرىڭىزدە بولسا، بىلتىرعى قۇربان ايت مەركەسىندە سويىلعان مالدىڭ جانىندا سۋرەتكە تۇسكەن جۇلدىزداردى الەۋمەتتىك جەلى پايدالانۋشىلارى قاتتى سىناعان بولاتىن. ءدىني باسقارما وسى سىندى ەسكەرە وتىرىپ، بيىل ەرتەرەك ەسكەرتۋ جاساپ جاتسا كەرەك.

“ مۇسىلماننىڭ ىستەپ جاتقان يگى امالى ماقتان ءۇشىن بولماۋى كەرەك. بەينەتاسپاعا ءتۇسىرىپ، ەلگە كورسەتكەنى -ماقتان ءۇشىن بولىپ كەتەدى. ءسىز بىرەۋگە ساداقا بەرسەڭىز دە، وڭ قولىڭىز بىلسە، سول قولىڭىز بىلمەۋى كەرەك”، – دەيدى  باس ءمۇفتي ەرجان قاجى مالعاج ۇلى.

مۇسىلماندار قاپەرىنە:

بيىل ايت نامازى الماتى جۇرتى ءۇشىن تاڭعى 7:30 وقىلادى. استانالىقتار نامازدى 7:45-تە باستايدى. ءقازىردىڭ وزىندە  قۇرباندىق شالۋ ءۇشىن بۇل ەكى شاھاردا  مال سوياتىن 29 ارنايى ورىن دايىندالعان. ءتىپتى قاساپشىلارعا دەيىن ترەنينگتەر وتكىزىلىپ، مالدى مۇسىلماندىق جولمەن سويۋ ەرەجەلەرى ءتۇسىندىرىلىپ جاتىر ەكەن.

ءمۇفتيات مال باعاسىن دا كاسىپكەرلەرمەن كەلىسىپ قويىپتى. ياعني، قۇربان ايتتا ساتىلاتىن قويدىڭ باعاسى 30 مىڭنان اسپاۋى ءتيىس.

قۇرباندىققا ءبىر جاسار قوي، ەكى جاسار سيىر، بەس جاسار تۇيە شالىنادى. سويىلاتىن مال ارىق، اقساق، سوقىر، شۇناق بولماۋى ءتيىس.

اينۇر تولەۋ

 «قامشى» سىلتەيدى