ق ر پارلامەنتى ءماجىلىسىنىڭ حالىقارالىق ىستەر، قورعانىس جانە قاۋىپسىزدىك جونىندەگى كوميتەتى ق ر ءماجىلىسى ۆيسە-سپيكەرىن تاعايىندادى. ول الەۋمەتتىك جەلىدە «سەكىرگىش-سەركە» اتانىپ كەتكەن گەنەرال-مايور اباي تاسبولاتوۆ.

«سىزدەر ونى جاقسى بىلەسىزدەر. ول اباي تاسبولاتوۆ»،-دەدى ءماجىلىس ءتوراعاسى قابيبوللا جاقىپوۆ مىرزا. ال پلەنارلىق وتىرىسقا قاتىسۋشى دەپۋتاتتار ادەتتەگى ماقۇلداعىشتىعىنان تانباي، بۇل جولى دا ءبىر اۋىزدان تاسبولاتوۆتىڭ كانديداتۋراسىن ماقۇلدادى.

بۇل تۋرالى «قامشى» پورتالى  total.kz سايتىنا سىلتەمە جاساي وتىرىپ حابارلايدى.

ءار جىلداردا اباي تاسبولاتوۆ مىرزا بولىمشە كومانديرلىگىنەن رەسپۋبليكالىق گۆارديا قولباسشىلىعىنا دەيىن كوتەرىلىپ، ءتۇرلى مەملەكەتتىك قىزمەتتەردە بولعان.

اباي تاسبولاتوۆ كىم؟

اباي تاسبولاتوۆ 1951 جىلى سقو بۇرىنعى لەنين اۋدانىندا دۇنيەگە كەلگەن. رف اسكەري اكادەمياسىنىڭ باس شتابىندا جوعارى اكادەميالىق كۋرستان ءتالىم العان. اسكەري اتاعى – گەنەرال-مايور. تاريح عىلىمىنىڭ دوكتورى، پروفەسسور.

ەڭبەك ءوتىلى؟

ي.س.كونيەۆ اتىنداعى الماتى قالالىق جالپى اسكەري ۋچيليششەسىنىڭ روتا كومانديرى بولعان(1973-1980). 1992-1997 جىلدارى اتالمىش وقۋ ورنىنىڭ باسشىسى بولادى. تاسبولاتوۆ قازاقستان قارۋلى كۇشتەرىنىڭ اسكەري اكادەمياسىنىڭ باسشىسى بولىپ 1997-2002 جىلدار ارالىعىندا قىزمەت ەتكەن. 2006 جىلى ق ر قورعانىس ءمينيسترىنىڭ ورىنباسارى. 2011-2012 جىلدارى ق ر پارلامەنتى ماجىلىسىنە دەپۋتات بولىپ نۇر وتان پارتياسىنىڭ اتىنان تۇسكەن.

العان ماراپاتتارى:

ق ر 2-دارەجەلى «داڭق» وردەنىنىڭ يەگەرى. ەڭ باستىسى 2008 جىلى «ءتىل جاناشىرى»  ەركەرتكىش مەدالىن العان.

حالىق الدىنداعى ماسقارالىعى

دەپۋتات اباي تاسبولاتوۆ ءوزىنىڭ ايگىلى «سەكىرگىشتىگىنەن» كەيىن اتى تانىلا باستاعان. دەپۋتاتتىڭ ەتيكاعا مۇلدە قايشى بۇل ارەكەتى الەۋمەتتىك جەلىدە دەرەۋ تانىمالدىلىققا يە بولىپ، قىزۋ پىكىر-تالاس تۋدىرعان بولاتىن. وندا دەپۋتات تاسبولاتوۆ ءماجىلىستىڭ كەزەكتى وتىرىسىنا كەشىگىپ كەلىپ، دوڭگەلەك ۇستەلگە سەكىرىپ مىنگەن ەدى.كوپشىلىكتى سىيلاماعان بۇل ارەكەتىنە وزگە دەپۋتاتتار  قول سوعىپ، وتىرىك كۇلگەننەن وزگە ەمەۋرىن تانىتپادى. ال ءدال سول كەزدە مەكتەپتەرگە  ەلەكتروندى وقۋلىق جۇيەسىن ەنگىزۋ ماسەلەلەرى تالقىلانىپ جاتقان بولاتىن.

ال وسى وقيعادان كەيىن تاسبولاتوۆتى سوزگە تارتقان جۋرناليستەرگە «سەندەردىڭ باسقا شارۋالارىڭ جوق پا؟!» دەپ لەپىرىپ تاستاعانى تاعى بار.

ال سەكىرسە دە، لەپىرسە دە جوق، كوپىرسە دە ءوزى بىلەتىن تاسبولاتوۆتىڭ بەيمادەني ارەكەتىنە قاتىستى ارىپتەستەرى ايگۇل سولوۆيەۆا «بۇل كىشكەنە عانا ەركەلىك. ءبىراق ادەپكە قايشى» دەگەن بولاتىن. ال كاراتيست دەپۋتات جامبىل احمەتبەكوۆ «كەرەك بولسا، جۇمىس ورنىنا وتىرۋ ءۇشىن مەن «سالتو» سەكىرىپ بەرە الامىن. ال وسىنداي ماڭىزدى ماسەلە تالقىلانىپ جاتقان كەزدە بۇلاي جاساۋ مادەنيەتسىزدىك بولدى» دەيدى.

ال،  abai.kz سايتىنىڭ جازۋىنشا، تاريح عىلىمىنىڭ كانديداتى جۇمامۇرات ءشامشى مىرزا پارلامەنت دەپۋتاتى، گەنەرال-مايور اباي تاسبولاتوۆتى كورىپ قالىپ: -اسسالاۋماعالايكۋم، ابەكە، قالىڭىز قالاي؟—دەسە، ول كىسى «ەلباسىنىڭ ارقاسىندا» دەپ جاۋاپ بەرگەن-مىس.

قازىرگى زاماننىڭ گەنەرالى باياعى زاماننىڭ باتىرىلارى سياقتى ارىستانداي ايباتتى، جولبارىستاي قايراتتى بولماس پا ەدى؟..

جالپى، بوداندىقتا كوپ بولعان ەل جالتاق، تايعاق، كونگىش بولاتىنىن يتالياندىق عۇلاما نيكولو  ماكياۆەللي ايتقان ەكەن. ءدال ايتسا كەرەك-تى.

«نۇرقازاقستاندا» اتقارىلعان كەز كەلگەن بولماشى ىستەردىڭ بارلىعىن ەلباسىنىڭ ەسىمىمەن بايلانىستىرۋ بۇگىنگى كۇننىڭ باستى –موداسىنا اينالىپ كەتكەنى دە جالعان ەمەس.

ءتۇيىن: ەكس-دەپۋتات، ۆيسە-سپيكەر داريعا نۇرسۇلتان قىزى اكەسىنىڭ جارلىعىمەن ۆيسە-پرەمەر-مينيستر لاۋازىمىنا كوتەرىلگەننەن كەيىن ماجىلىستەگى ورىنتاق بوساپ تۇرعانى بەلگىلى. ءماجىلىس ءتوراعاسى قابيبوللا جاقىپوۆ ءوزىنىڭ كومەكشىسى ەتىپ باسقا-باسقا ەمەس ءدال وسى تاسبولاتوۆتى تاڭداعانىنىڭ استارىندا نە جاتىر؟ بىرىنشىدەن – گەنەرال-مايور، اسكەري تاجىربيەسى جەتكىلىكتى. ەكىنشىدەن – پروفەسسور، تاريحتى جەتىك بىلەتىن عىلىم دوكتورى. حالىقتىڭ اراسىندا «سەكىرگىش - سەركە» اتانىپ كەتكەن اباي تاسبولاتوۆ مىرزا ۆيسە-سپيركەر بولعاندا نە وزگەرەدى، نە وزگەرمەيدى؟ ونسىز دا ادەپ دەگەننەن ادىرە دەپۋتاتتار مەن شەنەۋنىكتەر از با ەدى؟ بىزگە نە كەلىپ، نە كەتىپ جاتىر، دەيمىز اۋىر كۇرسىنىپ...

نۇرگەلدى ءابدىعاني ۇلى