جامبىل وبلىسى بايزاق اۋدانىنداعى اسكەري قويمادا بولعان جارىلىستان زارداپ شەككەندەر سانى 32 ادامعا جەتتى. بۇل تۋرالى وبلىس اكىمدىگىنىڭ باسپا ءسوز قىزمەتى حابارلادى.

وسى نىساننىڭ جانىندا بايزاق اۋدانىنىڭ ءۇشبۇلاق (120 تۇرعىن)، جىبەك جولى (500 تۇرعىن)، قاينار (85 تۇرعىن) ەلدى مەكەندەرى ورنالاسقان، ولار قازىرگى ۋاقىتتا ەۆاكۋاسيالانعان.

ءورتتى ءسوندىرۋ ءۇشىن ءتجد-نىڭ 12 تەحنيكاسى مەن 42 قىزمەتكەرى، سونداي-اق اسكەري بولىمنەن 8 قىزمەتكەر مەن 2 تەحنيكا جۇمىلدىرىلعان.

پرەزيدەنت قاسىم-جومارت توقايەۆ Twitter-دەگى پاراقشاسىندا قورعانىس، توتەنشە جاعدايلار مينيسترلەرى، ىشكى ىستەر ءمينيسترىنىڭ ورىنباسارى جامبىل وبلىسىنا ۇشىپ كەتكەنىن حابارلادى.

– جاقىن ماڭداعى اۋىلداردىڭ تۇرعىندارىن كوشىرۋ تۋرالى شەشىم قابىلداندى. وبلىستىق توتەنشە جاعدايلار دەپارتامەنتىنىڭ 30-عا جۋىق قىزمەتكەرى مەن اسكەري قىزمەتشىلەر جاراقات الدى، – دەپ جازدى توقايەۆ.

وقيعا ورنىنا ءمينيستردىڭ ورىنباسارى گەنەرال-لەيتەنانت رۋسلان شپەكبايەۆتىڭ باسشىلىعىمەن قورعانىس مينيسترلىگىنىڭ كوميسسياسى جىبەرىلگەن.

ءورتتى تولىق جويۋ بويىنشا جەدەل شتاب جۇمىس ىستەپ جاتىر. قىلمىستىق ءىس قوزعالدى. تجم، ءىىم بولىمشەلەرى جۇمىلدىرىلدى. تەمىرجول قاتىناسى ۋاقىتشا توقتاتىلدى.

بۇگىن شامامەن 19.00-دە جامبىل وبلىسى بايزاق اۋدانىندا ورنالاسقان اسكەري بولىمدە قويمالاردىڭ ءبىرىنىڭ جانىندا ءورت شىعىپ، سونىڭ سالدارىنان بەلگىسىز زاتتار جارىلعان. الەۋمەتتىك جەلىدە سناريادتار جارىلىپ جاتقان ۆيدەولار تارالۋدا. تاراز قالاسى تۇرعىندارىنىڭ ايتۋىنشا، جارىلىس داۋسى ءالى دە ءىستىلىپ جاتىر.