قورعانىس مينيسترلىگى جامبىل وبلىسىندا اسكەري ءبولىم قويماسىنداعى جارىلىستان تاعى ءبىر اسكەري قىزمەتشى كوز جۇمعانىن حابارلادى. 

مينيسترلىك جارىلىستان تاعى ءبىر اسكەري قىزمەتشى – ءورت ءسوندىرۋ كومانداسىنىڭ باستىعى، كەلىسىمشارت قىزمەتىنىڭ ستارشيناسى 1992 جىلعى ەركىن نادىربەكوۆ قازا تاپقانىن مالىمدەدى.

– ول ينجەنەرلىك ءوق-دارى قويماسىنداعى ءورتتى ءسوندىرۋ جۇمىسىن باسقارعان. جارىلىستان كەيىن وقيعا ورنىندا قازا بولدى. 27 تامىز كۇنى جوعالعاندار قاتارىنا ەنگەن اسكەري قىزمەتشىلەر اراسىندا بولعان، – دەپ مالىمدەدى ۆەدومستۆو.

قورعانىس مينيسترلىگىنىڭ باسشىلىعى مارقۇمنىڭ وتباسى مەن جاقىندارىنا كوڭىل ايتتى. مينيسترلىك ونىڭ وتباسىنا قاجەتتى كومەك كورسەتۋگە ۋادە ەتتى. 

الدىن الا اقپارات بويىنشا اۋرۋحاناعا 90-عا جۋىق ادام ءتۇستى، ونىڭ 49-ى – توتەنشە جاعداي دەپارتامەنتىنىڭ قىزمەتكەرلەرى. ق ر ءبىلىم جانە عىلىم مينيسترلىگى بالالاردىڭ قۇقىقتارىن قورعاۋ كوميتەتىنە كەلىپ تۇسكەن اقپاراتقا سايكەس "جامبىل وبلىسىندا (بايزاق اۋدانى) زارداپ شەككەندەردىڭ اراسىندا بالالار جوق" دەپ مالەمدەدى.

اسكەري ءبولىم قويماسىنداعى جارىلىستا جوعالعان بىرنەشە قىزمەتكەر ىزدەستىرىلىپ جاتىر. 

وقيعا ورنىندا توتەنشە جاعداي ءمينيسترى باستاعان جەدەل توپ جۇمىس ىستەۋدە. بۇعان دەيىن تاراز ماڭىنداعى جارىلىستان ءتورت اسكەري قىزمەتشىنىڭ كوز جۇمعانى حابارلانعان بولاتىن.