ءار قازاق پاتريوت، ءار قازاق باۋىرمال، ءار قازاق ۇلتشىل. ءبىراق، شىنايى ىسكە كەلگەندە كوبىمىزدىڭ قولىمىزدان كەلىپ جاتقانى شامالى. «اعايىن تاتۋ بولسا، ات كوپ»،- دەگەندەي اعايىنشىلدىقتىڭ، باۋىرمالدىقتىڭ، جاناشىرلىقتىڭ، ادامشىلىقتىڭ ۇلگىسىن يساتاي سىماعۇل اتتى ازامات كورسەتتى. ءۇش قازاقتىڭ بىرەۋى شەتتە، ءتىپتى اراسىندا بوسقىن قازاقتىڭ بارىن ەسكەرسەك، يستايدىڭ جاساعان ەرلىگىن قولىنان كەلگەن قاراپايىم ءار قازاق جاساي الادى. ول سونشالىقتى قيىن دا شارۋا ەمەس.

ەستەرىڭىزدە بولسا، وسى اپتانىڭ باسىندا «قامشى» پورتالىندا «بوسقىندار اراسىندا قازاقتار دا بار. ازاتتىعى بار ەل قانداستارىن وققا توسىپ وتىرا بەرە مە؟»،- دەگەن اتپەن ماقالا جارىق كوردى (http://qamshy.kz/home/show/1503). اۋعانىستاننان قونىس اۋدارىپ، يرانعا بارىپ بوسقىن بولعان، ءوز اتى ءجونىن جانىبەك ءناسىر ۇلى دەپ تانىستىرعان ازاماتتىڭ قالاي بوسقىن بولعانىنان باستاپ، بوسقىندىق ءومىرىن تانىستىرا كەلىپ، ازات قازاق ەلىنىڭ ازاماتى بولعىسى كەلەتىن نيەتىن جازعان ەدى. ءوز ازات وتانى بار ازاماتتىڭ بوسقىن بولىپ جۇرگەنى سول ۇلتتىڭ بارشا ازاماتىنىڭ سۇيەگىنە تاڭبا ەكەنى انىق. الەۋمەتتىك جەلى مەن سايت وقىرماندارى جانىبەككە دەگەن جاناشىرلىقتارىن ءبىلدىرىپ جاتتى. بارشا اعايىننىڭ باۋىرىنا دەگەن ىزگى الاڭداۋشىلىق پىكىرلەرىنىڭ ىشىندە ەرەكشە كوزگە تۇسكەنى- يساتاي سماعۇل دەگەن قولدانۋشىنىڭ پىكىرى بولدى.  سايتتاعى ماقالانىڭ استىنا «اسسالاۋماعالەيكوم باۋىرىم، ون سوتىق جەرىم بار كولىمنان كەلەتىنى سول. مەندە بيلىك دەيتىن- بيلىك جوك. قولىمنان كەلەرى وسى كەلەم دەسەڭ، حابارلاس: 87022339085، اقتوبە وبل. العا اۋد. ەسەت باتىر اۋىلى.»، - دەپ پىكىرىن قالدىرىپ، ارتىنان مەنىڭ فەيزبۋكتاعى پاراقشاما «تۇردىبەك، مەندە بيلىك جوك كولىمدا. ءبىراق ءۇيىمنىڭ كاسىندا ون سوتىق جەرىم بار. كەلەم دەسەڭ تەگىن بەرەم دەپ جازعام پىكىرىنە تەل قالدىردىم. ءدال سول جەرگە ءالىم كەلەدى، سالىپ جاتكان ءۇيىم جوك، بوسقا تۇر. قولىمنان كەلگەنى سول. اياققا تۇرىپ كەتەر دوكۋمەنت جاعىنان كومەكتەسەيىكشى وداندا؟ وسى فب-دا اۋزىمەن وراق وراتىندار كوپ قوي، وسىندايدا ايتارعا ءسوز تاپپاي كالادى! مەنىڭ دە وڭىپ تۋرعانىم شامالى، ءبىراق باسىمدا تاۋەلسىزدىگىم بار. قوينىمدا وتانىم بار. تۇرىپ جاتقان باسپانام بار كەلسىن، باۋىر بولىپ كەتەرمىز.»،- دەپ ءوزىنىڭ ازاماتقا ساي مارتتىك ويىن ءبىلدىرىپتى. مەن دە يساتايعا حابارلاسىپ، جانىبەككە بۇل سالەمىن جەتكىزەتىنىمدى ايتقانمىن. الداعى ۋاقىتتا يساتاي جانىبەككە ءوز سىيلىعىن تابىستاۋىنىڭ كۋاسى بولا جاتارمىز.

يساتاي سوزىندە ءوزىنىڭ شالقىپ تاسىپ وتىرماعانىن، قولىنداعى بارى سول ەكەنىن ايتىپ، «استىنداعى جالعىز اتىن سويىپ بەرۋگە» دايىن ەكەنىن بىلدىرگەن. باۋىرىمىزدىڭ بۇل ادامگەرشىلىگىنە كىمنىڭ دە بولسىن جۇرەگى ەلجىرەمەي تۇرماس. « بار بايلىعىم –تاۋەلسىزدىك، وتانىمنىڭ ازاماتتىعى»،- دەگەن يساتايدان ءار قازاق ۇيرەنسە دەيمىز. ىشتەگى بولسىن، سىرتتاعى بولسىن ءبىر قازاققا ەكىنشى بىرەۋىمىز وسىلاي قولىمىزدان كەلگەن كومەگىمىزدى اياماساق، ەرتەڭ ءبىر دە ءبىر قازاق دالادا قالماسى انىق! جۇرەگىمىزدى سىزداتقان ونىڭ دارمەنسىز جاعدايىنا قول ۇشىن بەرگىمىز-اق كەلەدى. يساتايدان باسقا دا وقىرماندار كومەك بەرۋگە ۇمتىلىپ وتىر.  ءبىراق جانىبەكتىڭ جالعىز-اق ارمانى بار. ول قازاق ەلىنىڭ ازاماتتىعىن الۋ. ءقازىر ونىڭ بوسقىن دەگەن قۇجاتى عانا بار. ال قۇجات ماسەلەسىن قاراپايىم قازاق ەمەس، ىقپالدى ازاماتتار عانا شەشە الادى. ونسىز دا از عانا قازاقتىڭ ءبىر توبىن قازاقتىقتان شىعارىپ تاستاماۋ كەرەك دەپ ەسەپتەيمىن.

تۇردىبەك قۇرمەتحان