ەل تاۋەلسىزدىگىنىڭ 30 جىلدىعى اياسىندا جاڭاوزەن قالاسىنىڭ تاريحي-ولكەتانۋ مۇراجايىندا «مۋزەي ءتۇنى» ءوتتى. شارا  «مۋزەي – مادەنيەت ورتالىعى رەتىندە ءداستۇردىڭ كەلەشەگى» دەپ اتالدى. بۇل تۋرالى جاڭاوزەن قالالىق مادەنيەت جانە تىلدەردى دامىتۋ ءبولىمىنىڭ باسشىسى گۇلايىم ازان ءمالىم ەتتى.

ونىڭ ايتۋىنشا، ماماندار كەلۋشىلەرگە مۋزەي ەكسپوزيسياسى بويىنشا ەكسكۋرسيالىق باعدارلامالار مەن «جاڭاوزەن قالاسى: كەشە جانە بۇگىن» ارحيۆ قورىنان دەرەكتى ۆيدەوسيۋجەتتەر كورسەتتى. شاراعا قالا تۇرعىندارى، مەكتەپ پەن ارناۋلى وقۋ ورىندارىنان، مەملەكەتتىك جانە وندىرىستىك مەكەمەلەردەن قىزمەتكەرلەر كەلدى.

-«مۋزەي - عىلىمي، مادەني-تاريحي ورتالىق. مۇندا بىرنەشە ءداۋىردىڭ تاريحىن، ەتنوگرافياسىن، تاريحي تۇلعالارىن، ونەرىن، حالىقتىڭ ءسالت-داستۇرىن جيناقى تۇردە ۇرپاقتان ۇرپاققا تانىتادى. وسى ماقساتتا ءۇش زالداعى ۇلتتىق قۇندىلىقتار كورەرمەندەرگە تانىستىرىلدى. مۋزەي تۇنىندە قالامىزدىڭ حالىقتىق «دومبىرا سازى» فولكلورلىق ءانسامبلى، «دومبىرا داستان» ءانسامبلى، «التىن داريا» اجەلەر ءانسامبلى، كۇيشىلەر وداعىنىڭ ءتوراعاسى مارات قاماراتدين ۇلى جانە باسقا دا تالانتتار ونەر كورسەتتى. الداعى ۋاقىتتا مۋزەي ەكسپوناتتارىنىڭ قاتارىن ءالى دە تولىقتىرىپ، قالا تۇرعىندارىنىڭ نازارىنا ۇسىنۋدى جوسپارلاپ وتىرمىز. مۋزەيدەگى شارالار جالعاسىن تابادى»، - دەدى قالالىق مادەنيەت جانە تىلدەردى دامىتۋ ءبولىمىنىڭ باسشىسى.