اقتاۋداعى ءبىلىم وردالارىندا «ۇلتتىق رۋح، ۇلتتىق سانا» جاڭا جوباسى باستاۋ الدى. ۇلتتىق قۇندىلىقتارىمىزدى ناسيحاتتاۋدى ماقسات ەتكەن جوبا اياسىندا قالاداعى بىرنەشە مەكتەپتىڭ تورىندە قازاقتىڭ كيىز ۇيلەرى تىگىلىپ جاتىر. بۇل تۋرالى قوعامدىق كوممۋنيكاسيا ورتالىعىندا وتكەن بريفينگىدە اقتاۋ قالاسىنىڭ اكىمى نۇرداۋلەت قيلىباي ءمالىم ەتتى. 

قالا اكىمىنىڭ ايتۋىنشا، №21 ورتا مەكتەپتە ورنالاسقان كيىز ۇيدە وقۋشى قىزدار ءۇشىن ءتۇرلى قولونەر بۇيىمىن، ال ۇلدار ءۇشىن كيىز ءۇيدى جىعىپ، قايتا تىگۋدى ۇيرەتەتىن ارنايى وقۋ كۋرستارى باستالىپ كەتكەن.  

-«باستى ماقساتىمىز ۇلتىمىزدىڭ قۇندىلىعى، اسىل مۇرامىزدى كەيىنگى ۇرپاققا جەتكىزۋ. قازىرگى تاڭدا كيەلى شاڭىراقتى جاسايتىن شەبەرلەردىڭ سانى جوققا جاقىن. ءداستۇردى ءۇزىپ الماۋ كەرەك دەگەن ويمەن، مەكتەپتەگى وقۋشىلارىمىزعا وسى ءىستى ۇيرەتۋ ءۇشىن كىشىگىرىم ماكەتىنە تاپسىرىس بەرگەن بولاتىنبىز. ازىرگە ەكى مەكتەپكە ورناتىلدى. ەكىنشىسى №29 ورتا مەكتەپكە قويىلادى. ۇلتتىق ۇيلەر كاسىپكەرلەردىڭ قولداۋىمەن الىندى»، - دەدى نۇرداۋلەت قيلىباي.

ايتا كەتەيىك، جوبانىڭ تۇجىرىمداماسى ماڭعىستاۋ وبلىسى قولونەرشىلەر اسسوسياسياسىنىڭ باسشىسى، ءداستۇرلى قولونەردى دارىپتەۋشى  اۋەس ساعىنايەۆامەن بىرلەسىپ جاساقتالدى. اتالعان جوبا اياسىندا ناۋرىز ايىندا قالا اكىمىنىڭ جۇلدەسى ءۇشىن مەكتەپتەردە  «كيىز ءۇي – FEST» شاراسىن ۇيىمداستىرۋ جوسپارلانىپ وتىر.