رەسەي قارۋلى كۇشتەرى سيرياداعى «يسلام مەملەكەتى» سودىرلارىنا قارسى اۋەدەن العاشقى سوققىلارىن جاساي باستاعان. لوندونداعى «ادام قۇقىقتارىن قورعاۋ» ۇيىمىنىڭ تاراتقان اقپاراتتارىنا سۇيەنسەك، بومبالاۋ ناتيجەسىندە 27 ادام قازا بولعان. ولاردىڭ ىشىندە 6 بالا كوز جۇمعاندىعى جانە 10-ى جاراقات العاندىعى انىقتالعان. بۇل تۋرالى «قامشى» پورتالى nur.kz-كە سىلتەمە بەرە وتىرىپ حابارلايدى.

ايتا كەتەيىك، 29-قىركۇيەك كۇنى رف پارلامەنتى مۇشەلەرى پرەزيدەنت ۆلاديمير ءپۋتيننىڭ اسكەري كۇش قولدانۋ جونىندەگى ءوتىنىشىن ماقۇلداعان. ال سيريا تەرريتورياسىندا اۋە شابۋىلى تۋرالى ەسكەرتپە شابۋىلدان ءبىر ساعات بۇرىن بەرىلگەن. كەيبىر دەرەكتەرگە سۇيەنسەك، رەسەي قارۋلى كۇشتەرى 1991 جىلدان بەرى قاراي سيريا اۋماعىندا اسكەري وپەراسيالار جاساماعان.

اقش اسكەرىنىڭ وكىلى رەسەيلىك اۋە كۇشتەرى تەك حومستىڭ ماڭىن ەمەس، ودان دا كەڭىرەك اۋقىمدى نىسانا ەتىپ العانىن ايتتى.

رەسەيدىڭ قورعانىس مينيسترلىگى اۋە شابۋىلى تەك يسلامشىل سودىرلاردىڭ پوزيسياسىنا جاسالعانىن مالىمدەدى. حومس – پرەزيدەنت باشار اسادتىڭ باتىس سيريانى باقىلاۋىندا ۇستاۋى ءۇشىن ماڭىزدى ايماق.

ەگەر سودىرلار بۇل ايماقتى باسىپ السا، داماسك پەن رەسەيدىڭ اسكەري-تەڭىز بازاسى ورنالاسقان لاتاكيا مەن تارتۋس پورتتارىن جالعاپ تۇرعان جول قيىلماق.

اقش باستاعان كواليسيا بۇعان دەيىن دە يراك پەن سيرياداعى “يسلام مەملەكەتى” سودىرلار ۇيىمىنىڭ پوزيسيالارىن بومبالاعان.

ۆاشينگتون سيريادا تۇراقتىلىق ورناتۋ ءۇشىن ەڭ اۋەلى پرەزيدەنت باشار اساد بيلىكتەن كەتۋى ءتيىس دەپ سانايدى. ماسكەۋ كەرىسىنشە اسادتىڭ رەجيمىن ساقتاپ قالۋعا بەيىل.

ايتا كەتەيىك، وسىنىڭ الدىندا رەسەي پرەزيدەنتى ماسكەۋ سيريادا قانداي دا ءبىر اسكەري وپەراسيالار جۇرگىزبەيتىنىن مالىمدەگەن.

نۇرزات توعجان