كەشە چەمپيوندار ليگاسىنىڭ توپتىق كەزەڭىندە قازاقستاندىق «استانا» فۋتبول كلۋبىمەن كەزدەسۋ وتكىزگەن تۇركيالىق «گالاتاساراي» كلۋبىنىڭ ويىنشىسى لۋكاس پودولسكيي ءوزىنىڭ الەۋمەتتىك جەلىدەگى ءاجۋاسى ءۇشىن تۇسىنىك بەرىپ، قازاقستاندىق كوماندانى ماقتاعان. بۇل تۋرالى «قامشى» پورتالى Vesti.kz-كە سىلتەمە جاساي وتىرىپ حابالايدى.

تۇرىكتىڭ "گالاتاساراي" كلۋبىنىڭ جانە گەرمانيا قۇراماسىنىڭ شابۋىلشىسى لۋكاس پودولسكي "استانا" كومانداسىمەن ماچتان كەيىن قارسىلاس كومانداسىن ماقتاپ، دەسە دە كومانداسىنىڭ تەڭ ويىن كورسەتكەنىنە كوڭىلى تولمايتىنىن مالىمدەگەن.

«ويىن كوڭىلگە قونبادى، سەبەبى 1:0 ەسەبىمەن ۇتىپ تۇردىق، كەيىن 2:1 ەسەبىمەن الدا كەلە جاتتىق، ءبىراق ءبىر عانا ۇپاي الدىق. ءۇش ۇپاي العىمىز كەلگەن. ولار دا ۇپاي الدى. ءبىراق ءبىز دە ۇتىلعان جوقپىز. ولار كۆاليفيكاسيا ارقىلى توپتىق كەزەڭگە ءوتتى. ال بۇل كەزەڭدە بارلىق كوماندا ءقاۋىپتى. ولار كۇرەستى، جۇگىردى جانە جاقسى وينادى»،-دەدى لۋكاس پودولسكيي.

سونداي-اق، نەمىس ۇلتتىق قۇراماسى مەن تۇركيالىق كوماندانىڭ ويىنشىسى لۋكاس پودولسكيي استانانىڭ ويىنى تۋرالى اعىنن جارىلا كەلە، «استانانىڭ" بۇگىن كۇرەسكەنىن، جۇگىرگەنىن چەمپيوندار ليگاسىندا ۇتۋعا لايىق ەكەنىن كورسەتتى»،-دەپ تۇيىندەگەن.

ال جۋرناليستەردىڭ، «ءسىز دوپتى قابىلداعاندا بارلىعىنىڭ ىسقىرعانىن نازارىڭىز شالدى ما؟» دەگەن سۇراعىنا فۋتبولشى ەش قىمسىنباستان، «مەن 25 جىلدان بەرى فۋتبول ويناپ كەلەمىن. سوندىقتان مۇنداي جاعدايعا ءمان بەرمەيمىن»،-دەپ جاۋاپ قاتقان.

الەمدىك دەڭگەيدەگى فۋتبول جۇلدىزى ءوزىنىڭ بورات تۋرالى كەلەمەجىنە قاتىستى «ءازىل تۋرالى! مەن مۇندا ءبىرىنشى رەت كەلىپ تۇرعان جوقپىن عوي. مەن گەرمانيا قۇراماسىمەن وسىندا كەلگەنمىن. سوندىقتان بۇل جاققا كەلۋدە ەشقانداي قيىنشىلىقتار جوق»، دەپتى تاعى.

وكىنىشتى. الەم سپورتشىلارىنىڭ سايقىمازاق ساشانىڭ (بورات كەيىپكەرىن) قازاقستاندى كەلەمەجدەۋ ءۇشىن الەۋمەتتىك جەلىلەردى پايدالانۋى قالىپتى جاعدايعا اينالىپ كەتكەندەي. اشىقتان- اشىق نامىسىمىزدى اياققا تاپتاپ، مەملەكەتىمىزدى مازاققا اينالدىرىپ جاتسا دا، ءبىزدىڭ قۇزىرلى ورگانداعىلار ءلام-ميم دەپ جاق اشپاۋى- كۇدىك تۋدىراتىنى جاسىرىن ەمەس.

تۇركيالىق «گالاتاساراي» فۋتبول كلۋبىنىڭ ويىنشىسى، شىققان تەگى نەمىس لۋكاش پودولسكيي ءوزىنىڭ تۆيتتەرىنە بوراتتىڭ سۋرەتىن جۇكتەپ ازىلدەگەن بولاتىن. ءازىلىنىڭ ارتى حالىقارالىق جانجالعا ۋشىعىپ كەتە جازداعان نەمىس فۋتبولشىسى دەرەۋ كەشىرىم سۇراعان ەدى.

ال «گالاتاساراي» فۋتبولشىسىنىڭ بۇل قۇرمەتسىزدىگىنە قازاقستاندىق جانكۇيەرلەر، قىزاناق لاقتىرۋ كەرەك دەگەن شەشىمگە كەلگەن بولاتىن. دەگەنمەن، كەزدەسۋ كەزىندە الاڭعا شىققان فۋتبولشىعا جانكۇيەرلەر نارازىلىق ىسقىرىعىن كورسەتتى.

ايتا كەتەيىك، چەمپيوندار ليگاسىنىڭ توپتىق كەزەڭىندە العاشقى كەزدەسۋىن وتكىزگەن قازاقستاندىق «استانا» كومانداسى مەن تۇركيالىق «گالاتاساراي» اراسىنداعى ماچ 2:2 ەسەبىمەن تەڭ اياقتالعان. ال وسى ويىندا پودولسكيي انتيقاھارمان اتانعان. وسىنىڭ الدىندا «بەنفيكامەن» كەزدەسۋىندە قازاقستاندىق كوماندا 2:0 ەسەبىمەن ەسە جىبەرگەن بولسا، كەلەسى كەزدەسۋ 21-قازاندا مادريد قالاسىندا وتەدى. «استانا» كلۋبىنىڭ ەندىگى قارسىلاسى «اتلەتيكو» كومانداسى بولماق.

نۇرزات توعجان
«قامشى» سىلتەيدى