قازاقستان مەن وزبەكستان ەكى ەلدىڭ ءبىرقاتار وڭىرىندە جارىق ءسونۋىن بىر-بىرىنەن كورىپ جاتىر.
قازاقستاندىق "KEGOC" كومپانياسى ەلەكتر ەنەرگياسىنىڭ توقتاۋىنا وزبەكستان، قىرعىزستانداعى ەنەرگيا جۇيەسىندە تۋىنداعان اپاتتىق جاعداي سەبەپ ەكەنىن ءمالىم ەتكەن.
"2022 جىلدىڭ 25 قاڭتارىندا ساعات 11.59-دا (نۇر-سۇلتان ۋاقىتىمەن) ورتالىق ازيا (وزبەكستان، قىرعىزستان) ەنەرگيا جۇيەسىندە تۋىنداعان ايتارلىقتاي اپاتتىق تەڭگەرىمسىزدىكتىڭ سالدارىنان "سولتۇستىك-شىعىس-قازاقستاننىڭ وڭتۇستىگى" 500 كۆ ەلەكتر ەنەرگياسى ترانزيتىنە ارنالعان قۋاتتىڭ تومەندەۋى ورىن الدى. سونىڭ سالدارىنان "سولتۇستىك-شىعىس-قازاقستاننىڭ وڭتۇستىگى" ءترانزيتىنىڭ اپاتتى ءبولىنۋى ورىن الىپ، قازاقستاننىڭ وڭتۇستىك ايماعىنداعى تۇتىنۋشىلاردىڭ باسىم بولىگى ءۇشىن جارىق ءوشتى. شەكتەلۋ كولەمى شامامەن 1 500 مەگاۆاتتى قۇرايدى. قازىرگى ۋاقىتتا جۇيە وپەراتورى «KEGOC» اق اپاتتى جويۋ ءىس-شارالارىن قابىلداپ جاتىر" دەلىنگەن كومپانيا اقپاراتىندا.
ال وزبەكستان ەنەرگەتيكا مينيسترلىگى تاراتقان اقپاراتتا اپاتتىق جاعداي قازاقستاندا تۋىنداعانى ايتىلادى.
"قازاقستان رەسپۋبليكاسى ەلەكتر جەلىسىندەگى ءىرى اپات سالدارىنان الماتى، شىمكەنت قالالارىندا، تۇركىستان وبلىسىندا ەلەكتر ەنەرگياسىن تاسىمالداۋدا كىدىرىستەر تۋدى" دەلىنگەن اقپاراتتىق حابارلامادا.
پىكىر قالدىرۋ