ۋكراينانىڭ ناتو-عا كىرۋىنە قارسى بولعان رەسەيدىڭ تالابىن اقش قابىلدامادى.
اقش مەملەكەتتىك حاتشىسى انتوني بلينكەن رەسەيدىڭ ۋكراينا داعدارىسىن شەشۋ جونىندەگى تالاپتارىنا رەسمي جاۋاپ بەردى.
بلينكەن ماسكەۋگە ەشقانداي جەڭىلدىك بەرمەدى، ءبىراق ول "ەگەر رەسەي كەلىسسە، ەلەۋلى ديپلوماتيالىق جولدى" ۇسىناتىنىن ايتتى.
رەسەيلىك تاراپ ناتو-مەن كەلىسە وتىرىپ، بلينكەننىڭ جاۋابىن زەرتتەيتىنىن ايتتى.
رەسەي ناتو اسكەري اليانسىنىڭ كەڭەيۋىنە جانە قاۋىپسىزدىك ماسەلەلەرىنە قاتىستى الاڭداۋشىلىقتارىنىڭ جازباشا ءتىزىمىن جاريالادى. ولاردىڭ اراسىندا ۋكراينا مەن باسقا ەلدەردى ناتو-عا قوسپاۋ تالابى بولدى.
سوڭعى اپتالاردا ۋكراينا شەكاراسى ماڭىنا ءجۇز مىڭعا جۋىق رەسەيلىك سارباز جينالۋدا. باتىس ەلدەرى مۇنى ىقتيمال شابۋىلعا دايىندىق دەپ سانايدى. رەسەي مۇنى جوققا شىعارادى.
بلينكەننىڭ ايتۋىنشا، اقش-تىڭ جاۋابى ۋكراينانىڭ ەگەمەندىگى مەن ناتو سياقتى قاۋىپسىزدىك وداقتارعا قوسىلا الۋ قۇقىعىن ايقىن كورسەتەدى.
"قالاي جاۋاپ بەرۋ كەرەكتىگىن رەسەي شەشەدى. ءبىز قالاي بولسا دا دايىنبىز" دەدى ول.
ايتا كەتەيىك، باتىس ەلدەرى ۋكرايناعا شابۋىل جاسالعان جاعدايدا رەسەي پرەزيدەنتى ۆلاديمير پۋتينگە تىكەلەي باعىتتالعان شارالار تۋرالى ەسكەرتكەن. سونىمەن قاتار ولار بۇل قادامنىڭ رەسەيگە زاردابى اۋىر بولاتىنىن جاريالاعان.
پىكىر قالدىرۋ