دەنساۋلىق ساقتاۋ ۆيسە-مينيسترى، قازاقستاننىڭ باس سانيتار دارىگەرى ەرلان قياسوۆ قىزمەتىنەن بوساتىلدى. بۇل تۋرالى پرەمەر-مينيستردىڭ باسپا ءسوز قىزمەتى مالىمدەدى.
ۆەدومستۆو مالىمەتىنشە، قياسوۆ ەرلان اڭساعان ۇلى بەرگەن وتىنىشىنە سايكەس قىزمەتىنەن كەتكەن.
ە. قياسوۆ 2020 جىلدىڭ قىركۇيەگىندە دەنساۋلىق ساقتاۋ ۆيسە-مينيسترى، قازاقستاننىڭ باس سانيتار دارىگەرى قىزمەتىنە تاعايىندالعان.
ول 1973 جىلى الماتى وبلىسىندا دۇنيەگە كەلگەن.
قازاق مەملەكەتتىك مەديسينا ۋنيۆەرسيتەتىن، ورتالىق ازيا ۋنيۆەرسيتەتىن، ءال-فارابي اتىنداعى قازاق ۇلتتىق ۋنيۆەرسيتەتىن، تۇران-استانا ۋنيۆەرسيتەتىن ءتامامداعان.
ەڭبەك جولىن 1990 جىلى "الماتى قالاسىنىڭ جەدەل مەديسينالىق جاردەم اۋرۋحاناسى" رەانيماسيا جانە قارقىندى تەراپيا بولىمشەسىنىڭ سانيتارى بولىپ باستادى.
1997-1999 جىلدارى الماتى قالاسىنداعى اۋە كولىگىندەگى ورتالىق سانيتارلىق-ەپيدەميولوگيالىق ستانسياسىنىڭ سانيتارلىق دارىگەرى، دارىگەر-ەپيدەميولوگى بولدى.
1999 جىلدان باستاپ 2020 جىلعا دەيىن قازاقستان پرەزيدەنتى ءىس باسقارماسىنىڭ مەديسينالىق ورتالىعىنىڭ قۇرىلىمىندا، سانيتارلىق-ەپيدەميولوگيالىق ستانسيادا جالپى گيگيەنا بويىنشا سانيتارلىق دارىگەر، جەدەل ءبولىم مەڭگەرۋشىسى، سانيتارلىق-ەپيدەميولوگيالىق قاداعالاۋ باسقارماسىنىڭ ەپيدەميولوگيالىق ءبولىمىنىڭ باستىعى، "سانيتارلىق-ەپيدەميولوگيالىق ساراپتاما ورتالىعى" رمك ديرەكتورى، باسشىنىڭ ورىنباسارى بولىپ جۇمىس ىستەگەن.
پىكىر قالدىرۋ