ۇلىبريتانيا حانزاداسى ەندريۋ "جيىرما جىلدان استام ۋاقىت بۇرىن جىنىستىق زورلىق-زومبىلىق كورسەتتى" دەگەن ۆيردجينيا دجۋففرەنىڭ ايىپتاۋىن جوققا شىعارىپ، اقش قازىلار القاسىنان سوت تالقىلاۋىن سۇرادى.

يورك گەرسوگى حانزادا ەندريۋ – بريتان كورولدىك وتباسىنىڭ مۇشەسى. پاتشايىم ەليزاۆەتا II مەن حانزادا ءفيليپپتىڭ ءۇشىنشى بالاسى جانە بريتان تاعى مۇراگەرلەرىنىڭ ءبىرى.

38 جاستاعى دجۋففرە وتكەن تامىزدا يورك گەرسوگىن سوتقا بەرگەن. ول قارجىگەر جانە سەكسۋالدىق قىلمىسكەر دجەففري ەپشتەيندى "مەنى ساۋدالاپ، ۇرىپ-سوقتى" دەپ ايىپتاعان.

اقش-تىڭ مانحەتتەندەگى وكرۋگتىك سوتىنا بەرگەن ارىزىندا 61 جاستاعى ەندريۋ 1999 جىلدار شاماسىندا ەپشتەينمەن كەزدەسكەنىن مويىندادى، ءبىراق ءدجۋففردىڭ وعان "جىنىستىق زورلىق-زومبىلىق جاسادى" دەگەن مالىمدەمەسىن جوققا شىعاردى.

"حانزادا ەندريۋ وسى ارقىلى شاعىمدا كورسەتىلگەن ارەكەتتەر بويىنشا القابيلەردىڭ سوت تالقىلاۋىن تالاپ ەتەدى" دەپ جازدى ونىڭ ادۆوكاتى سارسەنبى كۇنگى وتىنىشىندە.

حانزادا قىلمىستىق جاۋاپكەرشىلىككە تارتىلعان جوق. ول كورولدىك مىندەتتەرىنەن باس تارتۋعا ءماجبۇر ەتكەن ايىپتاۋلاردى جوققا شىعارادى.

وسى ايدىڭ باسىندا بريتان كورولدىك وتباسى ەندريۋدى اسكەري رولدەرى مەن كورولدىك قامقورلىعىنان ايىرعان. بۇدان بىلاي ونىڭ "كورولدىك مارتەبەسى" بولمايتىنى ايتىلدى.

13 قاڭتارداعى بۋكينگەم سارايىنىڭ مالىمدەمەسىندە "يورك گەرسوگى ەشقانداي قوعامدىق مىندەتتەر اتقارمايدى جانە بۇل ءىستى ءوزىن جەكە ازامات رەتىندە قورعايدى" دەلىنگەن.

دجيۋففرە 2001 جىلى ناۋرىزدا گيسلەين ماكسۆەللدىڭ لوندونداعى ۇيىندە ەندريۋدىڭ وعان جىنىستىق زورلىق-زومبىلىق جاساعانىن ايتادى. وتكەن ايدىڭ سوڭىندا اقش-تىڭ قازىلار القاسى ماكسۆەللدى ءجاسوسپىرىم قىزدارعا جىنىستىق زورلىق-زومبىلىق جاساۋدا ەپشتەينگە كومەكتەسكەنى ءۇشىن كىنالى دەپ تاپتى.

حانزادانىڭ ادۆوكاتتارى بۇعان دەيىن دجۋففرەنىڭ سوت ءىسىن "نەگىزسىز" دەپ اتاپ، ونى قوسىمشا وتەماقى سۇرادى دەپ ايىپتاعان. دجۋففرە ەپشتەيندەن 2009 جىلعى ازاماتتىق كەلىسىمدە 500 000 دوللار العان.

اقش وكرۋگىنىڭ سۋدياسى ليۋيس كاپلان سوت پروسەسى 2022 جىلدىڭ قىركۇيەگى مەن جەلتوقسانى ارالىعىندا باستالۋى مۇمكىن ەكەنىن ايتتى. ەگەر دجۋففرە سوتتا جەڭىسكە جەتسە، ەندريۋ كەلتىرىلگەن شىعىندى وتەۋى مۇمكىن. دجۋففرەنىڭ سۇراعان سوماسى بەلگىسىز.