رەسەيدەگى "ءبىرىنشى ارنا" تەلەارناسىنىڭ بۇرىنعى قىزمەتكەرى مارينا وۆسياننيكوۆا تىكەلەي ەفير كەزىندە ۋكرايناداعى سوعىسقا قارسى اكسيا جاساعانى ءۇشىن ادام قۇقىعى بويىنشا ۆاسلاۆ گاۆەل اتىنداعى سىيلىققا يە بولدى، دەپ جازادى dw.com.
ناۋرىز ايىندا وۆسياننيكوۆا "ءبىرىنشى ارنانىڭ" كەشكى جاڭالىقتار ەفيرىندە سويلەپ وتىرعان ديكتوردىڭ ارتىنا شىعىپ، "سوعىستى توقتاتىڭدار! پروپاگانداعا سەنبەڭدەر. بۇل جەردە وتىرىك ايتادى" دەگەن جازۋى بار پلاكات ۇستاپ، سوعىسقا قارسى اكسيا جاساعان.
ول رەسەيدە بولىپ جاتقان وقيعالاردى دجوردج ورۋەللدىڭ "1984" رومانىنداعى الەممەن سالىستىرادى.
وۆسياننيكوۆا حالىقتى رەسەيدىڭ ۋكرايناعا اگرەسسياسىن توقتاتۋدى تالاپ ەتۋگە شاقىرىپ، الەۋمەتتىك جەلى ارقىلى ۆيدەو ۇندەۋ جاساۋدى جالعاستىرىپ كەلەدى. كەيىن وعان زاڭسىز اكسيا وتكىزگەنى ءۇشىن 30 مىڭ رۋبل ايىپپۇل سالىنعان.
تەرگەۋ كوميتەتى قىلمىستىق كودەكستىڭ "رەسەي اسكەرى تۋرالى جالعان اقپارات تاراتۋ" دەگەن جاڭا بابى بويىنشا وۆسياننيكوۆانى تەرگەپ جاتىر. اتالعان باپپەن سوتتالعان ادام 3 جىلدان 15 جىلعا دەيىن بوستاندىعىنان ايىرىلۋى مۇمكىن.
پىكىر قالدىرۋ