بۇرىن قاراعاندى فارماسيەۆتيكا كلاستەرىنە بەرىلگەن "فيتوحيميا" عىلىمي-وندىرىستىك كەشەنى مەملەكەت مەنشىگىنە قايتارىلادى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ ءمالىم ەتتى.
"ينستيتۋتتىڭ ماڭىزى مەن الەۋەتى زور. ىشكى اۋديت قىزمەتىنىڭ تەكسەرۋ جۇمىسى كەلىسىمنىڭ مەملەكەتكە ءتيىمسىز ەكەنىن كورسەتتى، مۇلىكتىك كەشەندى باعالاۋعا، ونىڭ قۇنى مەن ءبولىپ تولەۋگە قاتىستى سۇراقتار تۋىندادى. سول سەبەپتى مەملەكەت مەنشىگىنە قايتارۋ باستاماسى كوتەرىلدى. ءتيىستى قۇجاتقا قول قويىلىپ، راسىمدەر جۇرگىزىلىپ جاتىر. سونىمەن قاتار قاراعاندى قالاسىنىڭ ساياباق ايماعىنداعى جەرلەردى قالانىڭ ورتالىق ساياباعىنىڭ ءبىر بولىگى رەتىندە مەملەكەت مەنشىگىنە قايتارۋ ماسەلەسى قاراستىرىلاتىن بولادى" دەپ جازدى مينيستر telegram پاراقشاسىندا.
"قاراعاندى فارماسيەۆتيكا كلاستەرىنىڭ ارتىندا وليگارح قايرات بورانبايەۆ تۇر" دەگەن اقپارات بار. بيزنەسمەن ناۋرىز ايىنان بەرى قاماۋدا وتىر. ول كۆازيمەملەكەتتىك سەكتوردا ءىرى كولەمدە قارجى جىمقىرۋ كۇدىگى بويىنشا تەرگەلىپ جاتىر. قايرات بورانبايەۆ 2022 جىلعى دەيىن ەلدەگى ەڭ باي 15 ادامنىڭ قاتارىنا كىرەتىن. قاماۋدا وتىرۋىنا بايلانىستى Forbes Kazakhstan جۋرنالى ونى بيىلعى رەيتىنگىنە قوسقان جوق. ول "قايرات" فۋتبول كلۋبى، الماتىداعى Esentai Mall، Esentai Tower، "المالى" ساۋدا ويىن-ساۋىق كەشەندەرى، "راحات پالاس" ءقوناقۇيى يەلەرىنىڭ ءبىرى. McDonald’s قازاقستان، رەسەي فرانچايزينگىنىڭ باسشىسى.
بورانبايەۆتىڭ ەكس-پرەزيدەنت ن.نازاربايەۆپەن تۋىستىق قارىم-قاتىناسى دا بولعان. قىزى اليما نازاربايەۆتىڭ 2020 جىلى قايتىس بولعان جيەنى ايسۇلتان نازاربايەۆتىڭ ايەلى بولعان.
پىكىر قالدىرۋ