1-قازاننان بەرى كۇن سايىن ەلىمىزدىڭ باس قالاسى – استانادا «بايتەرەك» مونۋمەنتى، «تۇلپار» كوپىرى، الماتىدا بالۋان شولاق اتىنداعى سپورت سارايى كەشكە قاراي جارىق ارقىلى كۇلگىن تۇسكە اينالعانى بايقالعان. بۇل تۋرالى «قامشى» پورتالى حابارلايدى. ەلىمىزدەگى قىز-كەلىنشەكتەردىڭ قۇرمەتىنە ارنىپ، ادەيى سولاي جارىقتاندىرۋ ءتاسىلى جۇزەگە اسىپ جاتىر ەكەن.

 وسىلايشا وتاندىق ماممولوگ ماماندار ايەلدەر مەن قىزداردىڭ نازارىن قاتەرلى ىسىكپەن كۇرەسۋگە، ونىڭ الدىن الۋعا، دەر كەزىندە ەمدەلۋگە شاقىرۋدى ماقسات ەتەدى. سەبەبى، قازان ايى – ءسۇت بەزى قاتەرلى ىسىگىمەن بۇكىلالەمدىك كۇرەس ايى.

ۇيىمداستىرۋشىلار «كۇلگىن ءتۇس – نازىكتىككە شاقىرادى، ءومىر سۇرۋگە قۇشتارلىقتى ارتتىرادى» دەيدى. سوندىقتان، ەلىمىزدىڭ نەگىزگى قالالارىندا ءوتىپ جاتقان بۇل شارا ارقىلى بۇكىل ايەل قاۋىمىنا «دەنساۋلىق – ءبىرىنشى بايلىق» ەكەنىن تاعى ءبىر رەت ەسكە سالۋدى ءجون كورگەن. مۇنداي اۋقىمدى شارا رەسەي مەن ۋكراينا ەلدەرىندە دە وتكىزىلمەك.

بۇعان قوسا، ومىراۋ وبىرىمەن كۇرەس ايى اياسىندا قازاق ونكولوگيا جانە راديولوگيا عىلىمي-زەرتتەۋ ينستيتۋتى مەن «قازاقستاننىڭ ونكولوگتار مەن راديولوگتار قوعامى» قوعامدىق بىرلەستىگى «ءسۇت بەزى قاتەرلى ىسىگىنىڭ جۇيەلى تەراپياسى» اتتى حالىقارالىق عىلىمي-پراكتيكالىق كونفەرەنسيا وتكىزەدى. بۇل باس قوسۋعا ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ تۇرعىندارعا ونكولوگيالىق كومەك كورسەتۋ دەپارتامەنتى مۇرىندىق بولدى.

ددسۇ-نىڭ مالىمەتىنشە، جىل سايىن ميلليوننان اسا ايەل وسى دەرتپەن اۋىرادى. وعان قوسا، ماماندار بۇل اۋرۋدىڭ جىلدان-جىلعا «جاسارىپ» كەلە جاتقانىن ايتادى. ال، قازاقستاندا ومىراۋ قاتەرلى ىسىگى ونكواۋرۋلار اراسىندا ءبىرىنشى ورىندا، ال ءولىم-جىتىم كورسەتكىشى بويىنشا ءۇشىنشى ورىندا تۇر.