«اكە – وتباسىنىڭ تىرەگى» اتتى فورۋم اياسىندا باستاۋىش سىنىپ وقۋشىلارى مەن اكەلەرىنىڭ قاتىسۋىمەن كونسەرتتىك باعدارلاما قويىلدى. كىشكەنە بۇلدىرشىندەر اكەلەرىمەن بي بيلەپ، ءان شىرقادى، قازاقى بولمىستى سىڭىرە بىلگەن بالالاردىڭ دومبىرا شەرتۋى كوپتى ءسۇيسىنتتى. وقۋشىلاردىڭ اكە تۋرالى ءبىر ۇزىك ويى جازىلعان حاتتارى دا كەلگەن قوناقتاردىڭ الدىندا وقىلىپ، فورمۋعا وزىندىك ءۇن قوستى.

 مەكتەپ ديرەكتورى نۇرماحانبەتوۆ عابيدوللا اكە تاربيەسىنىڭ ماڭىزدىلىعى جونىندە:

– بالانىڭ تاربيەسىندە اكەنىڭ ورنى ەرەكشە. مەكتەپ وقۋشىلارىنىڭ ساپالى ءبىلىم مەن جاقسى تاربيە الۋى وزەكتى ماسەلە. ال «ءبىر اكەنىڭ تاربيەسىن ءجۇز مەكتەپ بەرە المايدى». ءبىز ۇستاز تاراپىنان قانشا جەردەن ءبىلىم بەرسەك تە، سىزدەردىڭ بەرەر ۇلگى ونەگەلەرىڭىزدىڭ ورنى اسقاق. سوندىقتان مەكتەپتىڭ تاربيە جۇمىسىندا، ءبىلىم جۇيەسىندە سىزدەرمەن بىرلەسىپ كوپتەگەن ءىس اتقاراتىنىمىزعا سەنەمىن، – دەپ ەرتەڭگى بولاشاق ۇرپاعىمىزدىڭ بۇگىنگى تاربيەسى جايىندا وي قوزعادى.

شارا بارىسىندا وتباسىنداعى اكە تاربيەسىنىڭ الاتىن ورنى،ونىڭ ماڭىزدىلىعى جونىندە اڭگىمە ءوربىدى. مەكتەپتىڭ اكەلەر قاۋىممەن اتالعان تاقىرىپ جايىندا قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ەرلان ستامبەكوۆ،"بايدىبەك بابا" قورىنىڭ تەڭ ءتوراعاسى قانات ءدىنىستانوۆ، قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى ۆالەريي ۆاسيليەۆ ءوز ويلارىن ءبولىستى. سپورتشى ۆالەريي اناتوليەۆيچ بالاعا تاربيەسىندە ەسكەرۋ كەرەكتى بىرنەشە فاكتورلارعا توقتالدى.

– بالاعا ەشقاشان كۇشپەن، قاتتى داۋىس كوتەرۋ ارقىلى اقىل ۇيرەتپەۋ كەرەك. ايتقان اقىلىڭ دارۋى ءۇشىن نەنىڭ دۇرىس، نەنىڭ بۇرىس ەكەنىن، جاساعان ءىسىنىڭ كەم-كەتىگىن ادامي جۇمساق تىلمەن ايتۋ ارقىلى جەتكىزۋ كەرەك. ۇلىما عانا ەمەس، سپورت ۇيىرمەسىنە كەلگەن بالالارعا دا سولاي قارايمىن. 14 شاكىرتىم الەم چەمپيونى اتاندى. ءوز بالام 32 مەدال الدى. بۇنىڭ ءبارى ديسيپلينا مەن اكەلىك مەيىرىمنىڭ جەمىسى. الايدا بۇعان اقى سۇراماۋ كەرەك. بالا تەك الۋشى. قارتايعاندا ءبىر شىنىاياق سۋ بەرە مە، بەرمەي مە ول ءبىر قۇدايدىڭ قولىندا. پسيحولوگيالىق تۇرعىدا ولاردى قارىز جاساماۋىمىز قاجەت، – دەپ ارى قاراي ۇل مەن قىز بالاعا اكەلىك مىندەتتەرگە مىسال كەلتىردى. 

قانات ءدىنىستانوۆ بالانىڭ ۇلگەرىمىنە اناسىمەن تەڭ دەڭگەيدە اكەسى دە جاۋاپتى ەكەنى، مەكتەپ جۇمىستارىنا، جينالىستارىنا وتباسى بولىپ ات سالىسۋ ماسەلەسىن كوتەردى:

 – وتباسىنداعى ەر ادامنىڭ ءرولى تەك اقشا تابۋ، قاجەتتىلىكتەرىن قامتاماسۋ ەتۋمەن شەكتەلمەيدى. ويسىز ۇيلەنىپ، مۇڭسىز اجىراسۋ سياقتى ىندەت وسىدان شىعادى. شاڭىراقتا مامىلە كوپ بولۋى ءتيىس. ال ءبىز كوبىنە ءبىرىنشى سىنىپقا باراردا، سوسىن بىتىرەردە قاي باعىتتاعى وقۋدى تاڭدايتىنىن سۇراپ، ۇيلەنەر كەزدە ءبىر اقىلىمىزدى ايتىپ قويامىز. ال ابزالىندا اكە رەتىندە بالانىڭ ءار كۇنىندە كەڭەسشى، اقىلشى بولۋعا ءتيىستىمىز، – دەگەندى العا تارتتى.

       فورۋم مەكتەپ پەن وتباسىنىڭ ءوزارا بايلانىسىن نىعايتۋعا باعىتتالىپ، وتباسىنىڭ قارىم-قاتىناسىنداعى سەنىمدىلىكتى جانە سىيلاستىقتى قالىپتاستىرۋعا ۇلەس قوستى. بۇنداي شارالاردىڭ مەكتەپ قابىرعاسىندا ءوتۋى كىشكەنە بۇلدىرشىندەردىڭ ەرلىك رۋحىن كوتەرىپ، بالانىڭ وقۋ ورداسىنداعى ومىرىندە اكە ءرولىن بەكىتە تۇسەدى. اكەنىڭ بەرەتىن ءبىلىمى مەن اقىل، تاربيەسىن ەشبىر ۇستاز بەرە المايدى.