كۇنى كەشە فرانسيادا ەكى جىل جالعىز ءومىر سۇرگەن بالانىڭ اناسىنا قاتىستى سوت ۇكىمى شىقتى. بەزبۇيرەك انا 18 ايعا تۇرمەگە توعىتىلدى.

CNN تەلەارناسىنىڭ حابارلاۋىنشا، فرانسيانىڭ ەكى مىڭنان استام تۇرعىنى بار نەرساك قالاسىندا 2020 جىلدان 2022 جىلعا دەيىنگى ارالىقتا توعىز جاستاعى بالا ءوز پاتەرىندە جالعىز تۇرىپ كەلگەن.

اناسى نەرساكتان بەس شاقىرىمدا ورنالاسقان باسقا قالاداعى كوڭىل قوسقان ەر ادامىنىڭ قولىنا كوشىپ العان، ۇلىنا وتە سيرەك بارىپ تۇرعان.

ال بالا اش قالماس ءۇشىن ۇرلىق جاساعان. وسىلايشا ول ەكى جىل بويىنا قولىنا تۇسكەن پەچەنە، قالبىرداعى تاماق ونىمدەرى، قىزاناق سىندى كوكونىستەردى تالعاجۋ ەتىپ ءومىر ءسۇرىپتى.

قىستا پاتەردە ىستىق سۋ مەن جىلۋ ءجيى بولماعان. سوعان قاراماستان، بالا مەكتەپكە بارىپ جۇرگەن، ساباق ۇلگەرىمى دە جاقسى بولعان. بالانىڭ جاپادان جالعىز ءوز بەتىمەن قيىن جاعدايدا ءومىر ءسۇرىپ جاتقانىن جەرگىلىكتى بيلىك ەكى جىلدان كەيىن ءبىر-اق بىلگەن.

"ماعان بالانىڭ شەشەسى 2022 جىلدىڭ مامىرىندا جولىقتى. ول اقشاعا قاتىستى ماسەلەلەرى بارىن ايتىپ، ءوز شاعىمىن ايتتى. سودان كەيىن ءبىز وعان ءتورت ازىق-تۇلىك تالونىن بەردىك. ءبىراق ول ودان باس تارتىپ، ونىڭ ورنىنا دايىن قۇرعاق تاعامداردى الۋدى ءجون كوردى. وسى اراسى مەندە كۇدىك تۋعىزدى. كەيبىر ادامدار قالادا جالعىز تۇراتىن بالا بارىن ايتقان. سودان وسى فاكتى بويىنشا پوليسياعا حابارلاستىم"، دەيدى نەرساك مەرى باربارا كۋتيۋرە.

وسى وقيعادان كەيىن ايەل ادامعا قاتىستى تەرگەۋ باستالىپ، اقىرىندا ول ۇستالىپ، سوتتالدى. ال بالا قىركۇيەك ايىنان باستاپ الەۋمەتتىك قىزمەت قامقورلىعىنا الىنىپتى.