«كازاقستاندى» «قازاق ەلى» دەپ اتاۋدى ۇسىنعان پرەزيدەنتتىڭ ۇسىنىسىنىڭ استارىندا نە جاتىر؟ مەنىڭشە، بۇل – وسى ۋاقىتقا دەيىن مەملەكەت اتىن «قازاقىلاندىرۋ» تۋرالى باستاما كوتەرىپ كەلە جاتقان ءبىراز ۇيىمدار مەن تۇلعالاردىڭ ۇسىنىسىنىڭ ابدەن ورىندى ەكەندىگىن ءارى ونىڭ ۋاقىتى كەلگەنىن مويىنداۋ. ول تۇرعىدان العاندا، پرەزيدەنتتىكى ابدەن دۇرىس. جالپى، ساياسي تۇرعىدان العاندا قازاق ۇلتىنىڭ مۇددەسىن مەنسىنبەي ءارى كورە الماي جۇرگەن بەلگىلى توپتار ءۇشىن بۇل دەگەنىڭىز - مىقتى سيگنال. بىزبەن ايتىسۋعا ەتى ۇيرەنىپ قالعان ولار ەندى پرەزيدەنتپەن ءسوز تالاستىرىپ كورسىن! سونىمەن بىرگە، ەل اتاۋىن وزگەرتۋ – اسا ماڭىزدى، كەرەك دەسەڭىز، تاريحي تۇرعىدان ايتقاندا، مىڭ جىلدا ءبىر بولاتىن شارۋا، سوندىقتان اسىعىپ-ۇسىگۋدىڭ كەرەگى جوق. كەلىسىپ قويعان ات كەمشىن بولماس. جاڭا اتاۋدى ىشكى جانە سىرتقى العىشارتتار مەن فاكتورلار تۇرعىسىنان مەيلىنشە تەرەڭ زەرتتەپ الۋ كەرەك. ماسەلەن، جاڭا اتاۋ حالىقارالىق ارەنادا، ماسەلەن، اعىلشىن جانە باسقا تىلدەردە قالايشا تراسنكريپسيالانادى؟ ەل ازاماتتارى قالاي اتالماق جانە تب.؟ ءوز باسىم «قازاق رەسپۋبليكاسى» دەگەن اتاۋدى قالار ەدىم. بۇل اتاۋدا مەملەكەتتىڭ يەسى مەن ونىڭ ساياسي دامۋىنىڭ باستى باعىتى – رەسپۋبليكا، ياعني «حالىق بيلىگى» - ناقتى تۇردە كورسەتىلگەن. سونىمەن بىرگە، مەملەكەت اتاۋىن وزگەرتۋ – قازىرگى قوعامداعى ماڭىزدى جالعىز شارۋا دەپ ايتۋدان دا اۋلاقپىن. ۋاقىت كەلە، وعان دا كەلەرمىز. ءبىر انىعى - مۇنداي باستاما ەل ىشىندە قوردالانىپ قالعان وزەكتى پروبلەمالاردى – جۇمىسسىزدىق، باسپانانىڭ جوقتىعى، جالاقى مەن زەينەتاقىنىڭ ازدىعى، الەۋمەتتىك تەڭسىزدىك – شەشە قويمايدى. بالكىم، وسىناۋ يدەيانى جاريالاي ارقىلى بيلىك جۇرتتىڭ نازارىن سول پروبلەمالاردان باسقا جاققا بۇرعىسى كەلەتىن دە بولار. نە بولسا دا ءبارىن، سونىڭ ىشىندە، وسى باستامانىڭ باياندى بولۋىن نە بولماۋىن، ۋاقىت كورسەتەدى. بيلىك ءبىر نارسەنى باستاپ، سوسىن ونىڭ اياعى سيىرقۇيىمشاقتانىپ كەتەتىنى دە بار ەمەس پە؟...

     مەملەكەتتىڭ اتاۋىن قازاقىلاندىرۋ يدەياسى دۇرىس-اق. ەسكەرەر مىناداي جايتتار بار. ءوز تىلىمىزدەگى اتاۋىمەن قاتار ونىڭ، ماسەلەن، اعىلشىن تىلىندەگى ترانسكريپسياسىن جانە ەل ازاماتتارىنىڭ سول اتاۋعا بايلانىستى اتالۋىن دا مىقتاپ ەسكەرۋ قاجەت دەپ ويلايمىن. جانە دە ەلباسىنىڭ بۇل ۇسىنىسى ەل ىشىندە قوردالانىپ قالعان ماڭىزدى پروبلەمالاردى تاسادا قالدىرماۋى ءتيىس.

P.S.:  كەيبىر بەيرەسمي مالىمدەمەلەرگە  قاراعاندا، بۇل  يدەيا  2014 جىلى ساۋىردە  قابىلداناتىن "ەۋرازيالىق وداق" تۋرالى  كەلىسىمشارتتى  بۇركەمەلەۋدىڭ  ءبىرامالى دەسەدى. قوعام نازارىن  ۋاقىتشا وسى ماسەلەگە  اۋدارىپ، ەكىنشى ءتۇيىندى شەشۋدىڭ جولى  بولىپ جۇرمەسە  يگى. "قازاق ەلى" يدەياسى پارودوكسالدى  قۇبىلىس سەكىلدى. پوليەتنوستى مەملەكەتتى ءبىر ۇلتتىڭ  اتىمەن اتاۋ ەلىمىزدىڭ كوپۆەكتورلى ساياساتىنا قاراما-قايشى ەمەس پە؟  ەل بولاشاعانىنا قاتىستى مۇنداي جوتالى  ماسەلە  ءاربىر وتانداسىمىزدىڭ كوكەيىندە جۇرسە كەرەك. ال،  ءسىز نە  دەيسىز،  قازاق بالاسى؟