1984 جىلدىڭ 7 قاراشاسىندا الماتى وبلىسى، جامبىل اۋدانىندا ومىرگە كەلگەن. م. ح. دۋلاتي اتىنداعى تاراز مەملەكەتتىك ۋنيۆەرسيتەتىنىڭ «الەم تىلدەرى» فاكۋلتەتىن ءتامامداعان. 2001 جىلى «جىر-پەرزەنت» اتتى تۇڭعىش جىر-جيناعى، 2011 جىلى «كيەلى تۇندەردىڭ دۇعاسى» اتتى كىتابى جارىق كورگەن. 2001 جىلى «اباي وقۋلارىندا» باس جۇلدەنى العان. 2006 جىلعى حالىقارالىق «شابىت» فەستيۆالىندە «ادەبيەت» اتالىمى بويىنشا گران-پري جانە پرەزيدەنت كۋبوگىن يەلەنگەن. 2009 جىلى باياناۋىل تاقىرىبىندا جازعان «ۇزدىك جۋرناليست» التىن بەلگىسىن العان. جامبىل وبلىستىق «اق جول»، «ار-اي»، رەسپۋبليكالىق «كەنتاۆر» ادەبي اپتالىعى، «قازاق ادەبيەتى» گازەتتەرىندە قىزمەت ەتكەن. ءقازىر رەسپۋبليكالىق قوعامدىق-ساياسي «ايقىن» گازەتىنىڭ ءتىلشىسى. استانا قالاسىندا تۇرادى. ۇيلەنگەن. ەكى ۇل، ءبىر قىزدىڭ اكەسى.
ورەلى ءسوز ۇستاعانداردىڭ ەلدى دە ۇستايتىنى تاريحتان بەلگىلى. ءبىز مۇندا توبىردى ايتىپ وتىرعان جوقپىز نەمەسە ءسوزدىڭ كيەسىن بىلمەيتىن «قالامگەرسىماقتاردى» دا ايتىپ وتىرعان جوقپىز. كىمنىڭ قالامعا سۇيەنىپ تۇرعانىن، كىمنىڭ قالامدى سۇيەپ تۇرعانىن وقىرمان مەن ۋاقىت بەلگىلەيدى. بىزدىكى «قازاق ادەبيەتى» دەيتىن التىن تەڭىزدە قاي قالامگەردىڭ قانداي ەسكەك ۇستاپ جۇرگەندىگىن، قاي ارنادا اعىپ جاتقانىن بۇگىنگى وقىرمان تارازىسىنا سالۋ. وقىرمان ويىن ءدوپ باسىپ، قىزۋ تالقىلانعان قۋاتتى ءسوزدىڭ يەسىن دەر شاعىندا باعالاي ءبىلىپ، كىتابىن شىعارۋعا «قامشى» سايتى قال-قادەرىنشە تىرىسىپ باعادى. ءادىل تورەشى بولۋعا سىزدە تىرىسىپ كورىڭىز ورەلى وقىرمان!كوز جاسى كىنامشىل سەزىمدەر كەشىرتكەن كەزىمنىڭ بۇلتى اۋىپ بارادى باسىمنان. مەن بيىك تۇرۋدى ۇيرەندىم، ءوزىمنىڭ ءبىر تامشى جاسىمنان. بالا-اڭسار ساعىمى ويناعان دالانىڭ توسىندە، كەزىندە كوكتەمگى جاڭبىردىڭ، العاشقى كوز جاسىم تامعانى ەسىمدە – بر تامشى ۋىتى تاعدىردىڭ. و، سوندا سەزسەمشى، وتەمىن قانشالىق ازاپتى بولارىن تولەۋدىڭ: الەمنىڭ وزگەرىپ كەتەرىن، وزگەرىپ كەتەرىن ولەڭنىڭ! بۇل دۇنيە تىم باسقا بولاتىن، جاس ىرشىپ تۇسكەنشە جاناردان، سول ءبىر جاس – قارا ءتۇن، اق نۇردان جارالعان، تىرس ەتتى... قارا جەر ءدىر ەتتى!.. توپىراق بولمىسى وزگەردى: وزگەرتتى ول گۇلدەردى، قۇستاردى، جۇرەكتى... ءسوز دە ەندى بىلسەمشى كەلمەسىن قالپىنا بۇرىنعى، اۋىتقىپ كەتەرىن عاسىردان! ...ۇيرەندىم مەن سولاي بيىكتە تۇرۋدى كوزىمنىڭ ءبىر تامشى جاسىنان. سودان سوڭ... تاۋلار دا جىلاعان، دالا دا جىلاعان، ەشكىم دە بولمادى سەبەبىن سۇراعان، سەبەبىن بىلمەدى ءبىر ادام. ولار دا وزگەرگەن، وزگەرگەن ولەڭمەن... ...ءبىر تامشى جاس تامىپ كەتپەۋىن كوزدەردەن، كۇزەتىپ كەلەم مەن و، سول ءبىر تۇماندى جىلداردان! كەشسەم دە باسقا مۇڭ، مەن ەندى جوقتامان جىلداردى ۇرلانعان، مەنى ەندى جىلاتا كورمەشى، اسپانىم!.. ءدال ءقازىر... ءدال ءقازىر... تەك باسقا قالادا، سەن جايلى ويلاندى ءبىر ادام، قالاعا، جىميعان، جىلاعان، ءدال ءقازىر ارىلعان كۇنادان، ءدال ءقازىر كۇناعا باتاتىن، قارادى ول: سەن جايلى ويلاندى، تەرەزە الدىنا بايلاندى، ەسىنە ءتۇسىردى جايدارلى، كەزىڭدى، كەزىڭدى جابىققان، ونىڭ شىن سۇيەرىن جاڭا ۇققان كەزىڭدى، كەزىڭدى سۇيىكتى بولۋدان جالىققان، سۇيۋگە ۇمتىلعان وزگەنى، وزگەگە ارنالعان سوزدەرىڭ، وزگەگە قاراعان كوزدەرىڭ، مۇڭايتىپ تۇرعانىن سەزبەدىڭ، ءدال ءقازىر... تەك باسقا قالادا، سەن جايلى ويلانعان ادامدى، وزىڭە اينالعان ادامدى، وزىڭە بايلانعان جاناردى... ءدال ءقازىر... تەك باسقا قالادا... * * * سەنگەم بۇگىن! جاڭا كۇن شۋاعى دا، تەڭىزدىڭ تولقىنى دا، قاراشا تۇمانى دا، نايزاعاي جارقىلى دا، ءساۋىردىڭ جاڭبىرى دا، تاۋلاردىڭ كيەسى دە، قۇستاردىڭ تاعدىرى دا، جولداردىڭ يەسى دە، تاڭداردىڭ سالەمى دە، كەشكىلىك ءسۇيىسۋ دە، دالانىڭ سەلەۋى دە، كىتاپتىڭ ءيىسى دە، اعاشتىڭ تامىرى دا، گۇلدەردىڭ عۇمىرى دا، كوكجيەك ساعىمى دا، قاناتتىڭ قىبىرى دا، الەمنىڭ جۇمباعى دا، مانگىلىك مۇڭدارى دا، ماحاببات قۇربانى دا، ساعىنىش قۇلدارى دا، كۇنتىزبە كۇندەرى دە، عاسىرلار جانى مۇڭلى، ساعاتتىن تىلدەرى دە، ءبارى دە ءبارى ءبىلدى: جىر جازعىم كەلگەندىگىن! اقىن قىزعا تاۋلار اقىن بولار ما ەدى تىم بيىك، تەڭىز اقىن بولار ما ەدى تۇڭعيىق، جولدار اقىن بولار ما ەدى تاعدىرلى، مەزگىل اقىن بولار ما ەدى جاڭبىرلى، قۇستار اقىن بولار ما ەدى ەرىكتى، گۇلدەر اقىن بولار ما ەدى كورىكتى، القىزىل تاڭ، القوڭىر ءتۇن قۇمارلى، تاستار اقىن بولار ما ەدى شىدامدى، اسپان اقىن بولار ما ەدى سۇيەۋسىز، قۇربىڭ اقىن بولار ما ەدى كۇيەۋسىز، بالكىم، اقىن بولار ما ەدى كەڭ دالا، نەگە اقىن بولدىڭ ەكەن سەن عانا؟!. قىجىلداق ...قۇلىقسىز، قۇمارلىقسىز كەسىمسىزدىڭ كەيپىنە ەندى-اۋ داۋرەن ەسىل، ءبىزدىڭ. بارادى باتپىراۋىق ويناي-ويناي، اتسىز جىل، نىسپىسىز اي، ەسىمسىز كۇن! ۋاي، داۋرەن، ءسىزدىڭ سەرتكە بويلاي دا الماي، باس قويىپ، بار مەن جوقتى ويلاي دا الماي، اتسىز وي، سويسىز سەزىم، ەسىمسىز مۇڭ، بارادى باتپىراۋىق ويناي دا الماي! سىرلاسۋ، قاسام ءىشۋ، تىلدەسۋسىز، كەزەڭگە تاپ كەلگەنىم ءبىر كەشۋسىز... بارامىن باتپىراۋىق سەكىلدەنىپ، دوس – اتسىز، دۇشپان – سويسىز، قۇربى – ەسىمسىز!.. * * * اسقاقتىق تۋرالى اسپاندا، ازاتتىق تۋرالى اق جۇلدىز، اقپانار نۇرىن شاشقاندا، ويلادىم... ءوزىڭ تۋرالى؛ جابىعۋ تۋرالى جىلدارعا، جالعىزدىق تۋرالى شىڭداردان، زارىعا قاراپ تۇرعاندا، اڭسادىم... ءوزىڭ تۋرالى؛ كوز جاسى تۋرالى نوسەردە، وتكەن كۇن تۋرالى اۋىر بۇلت، كۇرسىنىپ تەرەڭ كوشەردە، جىلادىم... ءوزىڭ تۋرالى؛ ساعىنىش تۋرالى تۇندەردە، اي نۇرى ءالسىز تۇسكەندە، ءۇمىتىم تۋرالى گۇلدەرگە، مۇڭايدىم... ءوزىڭ تۋرالى؛ ماڭگىلىك تۋرالى جولداردا، قارسى الۋ تۋرالى قۇشتارلىق، ءمۇسىن بوپ قاتىپ قالعاندا، قول سوزدىم... ءوزىڭ تۋرالى، و، مەنىڭ تاۋەلسىزدىگىم! مۇڭۇرعان كۇز نەگە جىلايدى، مەن بە ەكەم جىلاتقان؟! جاپىراق قۇلايدى، قۇلاتقان – مەن ەمەس تاعى دا! كەشىردى ول باسىنان نە ءداۋىر؟ و، ءبىراق وسىنىڭ بارلىعى جانىما، سونشالىق نەگە اۋىر؟ نەلىكتەن كىنالى سەزىنەم ءوزىمدى، كوزىنىڭ جاسىنا؟ ءسۇيۋدى، سەزۋدى، ۇيرەتكەندەگىڭ وسى ما، قىركۇيەك؟ دەرتىڭدى كوتەرتۋ ءۇشىن بە؟ جۇتقىزىپ جاسىڭدى؟ كۇزگى باك ىشىندە قاڭعىرتىپ باسىمدى؟ سۇرانام، سەزدىرگىڭ كەلەدى و، نەنى؟ جاپىراق قۇلاعان – جىلاعان جۇرەكتىڭ ولەڭى ەكەنىن ءوزىم دە بىلەمىن! ەسىمە سالماشى! دەرت – ولگەن! جۇرەگىم – ونسىز دا، كۇز، سەنىڭ كىتابىڭ... قاراشا تۇنىندە ورتەلگەن! ويانعان ساعاتىڭ، ساعاتىڭ سوعاردا، ۋاقىتقا، تاريحقا، زامانعا، الەمگە، قوعامعا، ادامعا، وعان دا، ماعان دا سەن قارسى جۇرەسىڭ، بىلەسىڭ – بۇل سەنىڭ عۇمىرلىق ۇلەسىڭ! عۇمىرلىق ۇلەسىڭ: توقتاتپاۋ – ءومىر مەن ءولىمنىڭ كۇرەسىن... و، جەردىڭ تاكاپپار تۇرعىنى، و، جەردىڭ تاكاپپار تۇرعىنى، سەن قارسى جۇرەسىڭ، بىلەسىڭ: ءوزىڭدى تاپقانشا ءبىر كۇنى!.. وزىڭمەن بەتپە-بەت كەلگەنشە، ءوزىڭدى جۇزبە ءجۇز كورگەنشە، ءوزىڭدى مايداندا جەڭگەنشە، ءوزىڭدى ءوزىڭ كەپ كومگەنشە! عاپىل جۇرەكتىڭ تاسقا اينالۋى ءۇشىن، قاسىرەت شەگۋ مىندەتتى ەمەس، باۋىرعا تاستىڭ بايلانۋى ءۇشىن، جاسىڭدى توگۋ مىندەتتى ەمەس: ءبىر عانا ءسوز جەتەدى – جەمىر! كوز جەتەدى – شەگىر! ءبىر عانا ءسات جەتەدى ءتۇڭىلۋ ءۇشىن، لاعىل تاستى قۇرت تەسۋى ءۇشىن؛ ال تاستىڭ قۇم بولىپ ۇگىلۋى ءۋشىن، قۇمعا گۇل ءوسۋى ءۇشىن، جەتكىلىكسىز ءومىر! قايىرىم وزگەرتكىڭ كەلسە دە وزگەرتە المايتىن، ءبىر جول بار، ەكى رەت جۇرۋگە بولمايتىن، وزەن بار، ەكى رەت كەشۋگە بولمايتىن، جۇمباق بار، ەكى رەت شەشۋگە بولمايتىن، ەسىك بار، ەكى رەت اشۋعا بولمايتىن، پەرنە بار، ەكى رەت باسۋعا بولمايتىن، ءبىر سىر بار، ەكى رەت بىلۋگە بولمايتىن، ءومىر بار، ەكى رەت سۇرۋگە بولمايتىن، قانات بار، ەكى رەت كاعۋعا بولمايتىن، شىراق بار، ەكى رەت جاعۋعا بولمايتىن، ول – قىزدىڭ جۇرەگى: جارىق كۇن، قارا ءتۇن، ەكى رەت، ەكى رەت كەشىرە الاتىن! *** ۇيىقتاپ جاتىپ، جىلاپ شىقتىڭ تۇنىمەن، سەن كۇلىپ ەڭ، مەن دە سودان كۇلىپ ەم. نەگە، نەگە، بەيساناعا ەندىڭ سەن، نەگە، نەگە، بەيۋاقتا ءجۇرىپ ەڭ؟ تۇزىڭ با الدە، ءوزىڭ دە الدە جەڭىل مە ەڭ؟ جۇرەكتى ايا جارالماعان تەمىردەن. ءتاڭىر ساعان بەرمەگەندى، بوتام-اۋ، نەگە ىزدەدىڭ، نەگە ىزدەيسىڭ ومىردەن؟! جۇرەككە اۋىر – كوڭىلىڭنىڭ كەمسەڭى، جۇرەككە اۋىر – سەنىمىڭنىڭ ولشەمى، جۇرەككە اۋىر – جالعىزدىقتىڭ كوز جاسى، قالاي عانا قورعاي الام مەن سەنى؟ *** سەزىم سەرىدەن بولعاندا، ويىم وردەن، قۇسالى وتكەن كۇندەردىڭ قايىرى ەلدەن. بۇلتتى كۇنى نە امال بوزداعاننان، كوپ ادامعا نە ابزال كەيىگەننەن؟! وزەگىمنەن شىمىرلاپ شىقتى مۇڭىم، ايتشى سونى قاي كىسى ۇقتى، كۇنىم؟ ساعان ءمالىم، قالقاتاي، مەن مۇڭايسام، ايعا ۇلىعان ارمانعا كۇپتىلىگىم. سىرتقى باردى تۇگەندەپ، ىشكى جوعىن، ءتاڭىر جاقتى تۇسپالداپ ءتۇستى جولىم. ...جۇرەگىمنىڭ باسىندا قىپ-قىزىل شوق، اۋزىمدى اشسام ۇرادى ىستىعى ونىڭ. * * * مەنى كوپ ساقتايدى ىشتەگى ءبىر ۇستام، وزگەرمەس كەنەتتەن، قۇبىلماس وقىستان: سولتۇستىك باتىستان، وڭتۇستىك شىعىستان، سولتۇستىك شىعىستان، وڭتۇستىك باتىستان، جەل سوقتى، جەل سوقتى، قاي تۇستان، بىلمەيمىن، تۇستىك پە، تەرىستىك؟ سوعادى-سوقپايدى، ايتپايمىن، اشپايمىن، جىلامان، كۇلمەيمىن، ىشتەگى ءبىر ۇستام مەنى كوپ ساقتايدى. تاۋلارىم، كولدەرىم، ورمانىم، جولدارىم، جەلمەنەن جىبەردى وڭدەرىن-تۇستەرىن، جەل سوقتى، جەل سوقتى، جەتكىزدى ول ءبارىن، مەنى كوپ ساقتايدى ءبىر ۇستام ىشتەگى. جەل سوقتى، جەل سوقتى، سەرگىتتى سوققان جەل، اۋىرلاۋ-جەڭىلدەۋ، ازىراق-كوبىرەك، سەن كەلسەڭ، سەن كەلسەڭ جەل سوقپاس جاقتان كەل، ىشتەگى ءبىر ۇستام ساقتايدى مەنى كوپ!.. ءسات جۇلدىزدان جارىق جەتكەنشە، ساعىنىپ ۇلگەردىم سەنى، جانىمنان تۇرىپ كەتكەنشە، ساعىنىپ ۇلگەردىم سەنى، كوبەلەك قانات قاققانشا، ساعىنىپ ۇلگەردىم سەنى، قالالار شامىن جاققانشا، ساعىنىپ ۇلگەردىم سەنى، ءبىر تامشى تامام دەگەنشە، ساعىنىپ ۇلگەردىم سەنى، ءبىر شىرپى جانام دەگەنشە، ساعىنىپ ۇلگەردىم سەنى، ءبىر ويدان قايتام دەگەنشە، ساعىنىپ ۇلگەردىم سەنى، ءبىر ءسوزدى ايتام دەگەنشە، ساعىنىپ ۇلگەردىم سەنى، قۇس ۇشىپ قونام دەگەنشە، ساعىنىپ ۇلگەردىم سەنى، قۋ كوڭىل قالام دەگەنشە، ساعىنىپ ۇلگەردىم سەنى، زارىڭدى تارتام دەگەنشە، ساعىنىپ ۇلگەردىم سەنى، جۇگىڭدى ارتام دەگەنشە، ساعىنىپ ۇلگەردىم سەنى، پەررونعا شىعام دەگەنشە، ساعىنىپ ۇلگەردىم سەنى، ءبارىن دە ۇعام دەگەنشە، ساعىنىپ ۇلگەردىم سەنى، ساعىنبان ەندى دەگەنشە، ساعىنىپ ۇلگەردىم سەنى، «ماحاببات ءولدى» دەگەنشە، ءولتىرىپ كەتشى مەنى! * * * جۇرەگىم – جەردىڭ سەرىگى، اينالا ۇشار ول سەنى. اۋىر ما اقىن ءومىرى، ءداۋىر مە ونىڭ ولشەمى؟ بىلدىك ءبىز نەنىڭ ولشەمىن، سەزدىك پە ءمانىن تاعدىردىڭ؟ ...تۇسىڭە كىرسەم مەن سەنىڭ، شىراق جاق تۇندە، جان قۇربىم! سەن كەشىر، مۇڭلى ءبىر مەن بە، وڭىندە ءحالدى سۇرار كىم؟ اداسىپ ءجۇرىپ تۇندەردە، تۇسىڭە كىرگەن شىعارمىن... ءجۇزىمدى ەلدەن جاسىردىم، جالعىزدىعىمنىڭ اتىنان!.. مەن اقىن – مۇڭلى عاسىردىڭ تۇسىندە ولەڭ وقىعان! بەسىنشى ماۋسىم وتكەن كوكتەم، قۇستاردىڭ قيالىنان، وتكەن جاز دا، گۇلدەردىڭ تۇستەرىنەن، وتكەن كۇز دە، جاپىراق جۇرەگىنەن، وتكەن قىس تا، اق قاردىڭ ارمانىنان، وتكەن ءبارى، سەنى ەسكە ءجيى الۋدان، ءجيى-جيى سەن جايلى ءتۇس كورۋدەن، ءجيى-جيى سەنى ويلاپ تۇنەرۋدەن، ءجيى-جيى سەن جايلى تولعانۋدان، وتكەم مەن دە... وتكەن قۇستار، كوكتەمنىڭ اڭسارىنان، وتكەن گۇلدەر، جازدىڭ دا سامالىنان، وتكەن جاپىراق، كۇزدىڭ دە كوڭىلىنەن، وتكەن اق قار، قىستىڭ دا باۋىرىنان، وتكەن ءبارى، كەشكىلىك ءان سالۋدان، باسقان ىزگە ءار كۇنى ورالۋدان، وزگە جۇرتقا ەسۋاس كورىنۋدەن، ساعىنۋدان، كۇتۋدەن، جاۋىعۋدان، وتكەم مەن دە... مىنە، سولاي بەسىنشى ماۋسىم كەلگەن. جۇرمەگەي دەپ وكپەلەپ بەكەر بىزگە، ءبىر گۇل تاستاپ كەتكەم مەن كەتەردە ىزگە، ءبىر جىر جازىپ كەتكەم مەن وتەر كۇزگە. جولداردى ءشوپ باسقانشا، شوپتەرگە شىق تۇنعانشا، شىقتارعا كۇز قونعانشا، اق قاردا ءىز قالعانشا... جولىعۋ كەرەك پە وسى ەكەۋمىزگە؟... * * * وزىڭدە - ءوزىڭ، وزىمدە دە - ءوزىڭ، ءوز، ءوز، ءوز... وزەۋرەپ بۇگىن ءوزىڭدى ويلار كەز ەمەس. ەركىندىگىڭدى قۇرمەتتەي الام مەن سەنىڭ، ەركىنسۋ ءبىراق ەسىرۋ دەگەن ءسوز ەمەس. ءوزىمشىل ۇلدىڭ ءبىرى مەن ەدىم، مەن ەدىم، تاكاپپار ەتكەن ءتاڭىرىم مەنەن ولەڭىم! مەن ءبىراق، كۇنىم، ەركىندىك دەگەن دۇنيەنىڭ، سالدارىن ەمەس، قۇرمەتتەۋشى ەدىم سەبەبىن. ەركىڭدى، ويدى، تاڭداۋدى، اردى، ءتوزىمدى – تاۋەلسىز ەتتىم، بودانىڭ ەتتىم سەزىمدى. ...ءومىردى مىناۋ وزگەرتىپ كەتەم دەپ ءجۇرىپ، وزگەرتىپ الدە الدىم با ەكەم ءوزىمدى؟! جۇرەگىمدى ساقتا جۇرەگىڭدى ساقتا، جۇرەگىمدى ساقتا، بۇل الاعاي شاقتا، بۇل بۇلاعاي شاقتا! كۇنگە كەرەك جۇرەك، تۇنگە كەرەك جۇرەك، ساعان قۇنسىز بولسا، گۇلگە كەرەك جۇرەك! جۇرەگىڭدى جەمە، جۇرەگىمدى جەمە، ءوزىڭ سۇيمەگەن سوڭ، وزگە سۇيمەس دەمە. جۇرەگىڭدى قورعا، جۇرەگىمدى قورعا، سوعىپ ءجۇر ول زورعا، سوعاتىنداي سورعا. جۇرەگىمدى تىڭدا، جۇرەگىڭدى تىڭدا، شاقىرماشى قۇزعا، باتىرماشى مۇڭعا. جۇرەگىڭە – راحىم، جۇرەگىمە – راحىم، جۇرەك دەگەن – سۇلۋ، جۇرەك دەگەن – اقىن. جۇرەگىڭدى ساقتا، جۇرەگىمدى ساقتا، يا، ءتاڭىرىم، كوز بەر، جۇرەك كوزى جوققا! * * * وسى بىزدە سەزىم كوپ پە ومىرشەڭ؟ "سەنى سونشا جەك كورەمىن!" دەدىڭ سەن... ءبىراق نەگە سەن قۋاندىڭ مەن جەڭسەم، سەن جىلادىڭ جەڭىلسەم؟ ايتپا، ايتپا، سەزەر ءىشىم ار جاعىن، مەن سەزبەگەن ايتشى، كۇربىم، بار ما مۇڭ؟ مەنى سولاي جەك كورۋىڭ ارقىلى، جاقسى كورە الماۋىڭنان قورعادىڭ. ءبىر سەزىم بار ءبىزدى جىلاتپاي تۇرعان، ءدال كوكتەمدەي... ءالى ءبۇر اتپاي تۇرعان. قورىقپايمىن – ايتىپ ۇناتپاعاننان، ۇرەيلەنەم – ىشتەي ۇناتپايتىننان. شىدا، شىدا كوركەم كوكتەم كەلگەنشە، بۇل كوكتەمدى كۇتە الدى ما ەل مەنشە؟ مەنى سولاي تازا، ادال جەك كورشى، كىسىمشىلدەۋ، كىرشىل جاقسى كورگەنشە!
پىكىر قالدىرۋ