ەرلان جامانتايەۆ قازاقستان فۋتبول ليگاسىنىڭ (QFL) پرەزيدەنتى بولىپ سايلاندى.
اتالعان شەشىم ليگا مۇشەلەرىنىڭ سىرتتاي وتىرىسىندا قابىلداندى. داۋىس بەرۋشىلەردىڭ كوپشىلىگى 50 جاستاعى ەرلان جامانتايەۆتىڭ كانديداتۋراسىن ماقۇلدادى. ەرلان جامانتايەۆ بۇرىن كاسىبي فۋتبولمەن اينالىسىپ، "ۇشقىن-يسكرا" اتتى جەكەمەنشىك كلۋبتىڭ جەتەكشىسى، باس باپكەرى بولدى. ءتۇرلى جىلدارى جاعاجاي فۋتبولىنان قازاقستان ۇلتتىق قۇراماسىن تىزگىندەپ، قازاقستان فۋتبول فەدەراسياسىنىڭ بۇقارالىق، ايەلدەر فۋتبولى جانە فۋتزال دەپارتامەنتىن باسقاردى. جامانتايەۆ 2021-2023 جىلدارى "اقتوبە" فۋتبول كلۋبىنىڭ باسقارما ءتوراعاسى قىزمەتىن اتقارىپ، قازاقستان چەمپيوناتىنىڭ كۇمىس جۇلدەسىن جەڭىپ الدى. وسىعان دەيىن 2024 جىلى ءبىرىنشى ليگانىڭ بەس دۇركىن جەڭىمپازى اتانعان "وقجەتپەس" فك ديرەكتورى بولدى. سونداي-اق، ول "جەكە فۋتبول مەكتەپتەرى مەن اكادەميالارىنىڭ رەسپۋبليكالىق ليگاسى" قاۋىمداستىعىنىڭ باس حاتشىسى مىندەتىن اتقارادى.
پىكىر قالدىرۋ