بۇگىن ۇكىمەت قازاقستاننىڭ مەملەكەتتىك قارىزى 39،1 ترلن تەڭگەگە جەتكەنىن حابارلادى. بۇل – جالپى ىشكى ءونىمنىڭ (ءجىو) 21،1%-ى. قارجى ءمينيسترى ءمادي تاكييەۆ ۇكىمەت وتىرىسىندا وسىنداي مالىمەت كەلتىردى.
شىن مانىندە، قازاقستاننىڭ جالپى سىرتقى قارىزى 170،5 ملرد دوللاردان، ياعني 88 ترلن تەڭگەدەن اسادى. وسىنداي مالىمەتتى وتكەن اپتادا عانا ۇلتتىق بانك جاريالاعان. بۇل 2025 جىلعى 1 ساۋىردەگى جاعداي.
تاكييەۆ جالپى ىشكى ءونىمنىڭ ءوسۋ قارقىنى تۋرالى ايتتى. ونىڭ پىكىرىنشە، سونىڭ ارقاسىندا وڭ ديناميكا ساقتالعان. ەگەر 2020 جىلى مەملەكەتتىك قارىز مولشەرى ءجىو-نىڭ 29،2% قۇراسا، 2024 جىلى ول 23،5% بولعان.
– وسىلايشا، مەملەكەتتىك قارجىنى باسقارۋدىڭ 2030 جىلعا دەيىنگى تۇجىرىمداماسىندا بەلگىلەنگەن جىو-گە 32% -دىق مەملەكەتتىك قارىز ءليميتى ساقتالادى، – دەپ سەندىردى مينيستر.
ۇكىمەت بەرەشەكتى 2،5 ملرد دوللارعا ەۋروبوند شىعارۋ ارقىلى وتەۋدى دە جوسپارلاپ وتىر. قارجى مينيسترلىگى قۇندى قاعازداردى بيىل 24 ماۋسىمدا ساۋداعا شىعارعان.
وتكەن اپتادا عانا قازاقستان ۇكىمەتى يسلام دامۋ بانكىنەن 1،1 ملرد دوللارعا دەيىن نەسيە العالى جاتقانى ءمالىم بولدى. 11 شىلدەدە ۇلتتىق بانك ءتوراعاسى تيمۋر سۇلەيمەنوۆ قازاقستاننىڭ سىرتقى قارىزى اسا كوپ ەمەس دەپ ەسەپتەمەيتىنىن ايتقان.
